सर्वोत्तम शेयर प्रकरणमा छानबिन कमिटीको प्रतिवेदन अनुसार कारबार्ही गछौंः अर्थमन्त्री शर्मा

अर्थमन्त्री जनार्दन शर्माले सर्वोत्तम शेयर खरीद प्रकरणमा मन्त्रीस्तरीय निर्णयबाट छानबिन कमिटी गठन भई प्रकृया अगाडि बढेको बताउँदै छानबिन समितिले दिने निष्कर्षका आधारमा कारवार्ही अगाडि बढाइने प्रतिबद्धता व्यक्त गरेका छन् । 

संघीय संसदको अर्थ समितिले शुक्रबार बोलाएको छलफलमा उपस्थित भएर अर्थमन्त्री शर्माले यस्ता बताएका हुन् । अर्थ मन्त्रालयले व्यक्तिले गरेको अनियमितताका सम्बन्धमा संस्थालाई पत्र काटेको विषयमा छलफल गर्न अर्थमन्त्रीलाई डाकेको थियो ।

अर्थमन्त्री शर्माले सर्वोत्तम प्रकरणमा नियमनकारी निकायको प्रमुखले आफ्नै परिवारभित्रका सदस्यको नाममा शेयर खरीद बिक्रीका ठूला-ठूला कारोबार भएको खबर सार्वजनिक भएसँगै मन्त्रालयले चासो दिएको र त्यससम्बन्धमा धितोपत्र बोर्डमा यथार्थ बुझ्न पत्राचार गरिएको बताए । बोर्डबाट प्राप्त संस्थागत जवाफले पनि नपुग्ने भएपछि मन्त्रीस्तरिय निर्णयबाट छानबिन कमिटी गठन भएर प्रकृया अगाडि बढेको उनको भनाई छ ।

बोर्डको संस्थागत जवाफपछि मन्त्रालयले बजारलाई सहि नियमन गर्न, जनतालाई वास्तविक कुरा जानकारी गराउने उदेश्यले मन्त्रालयका सचिव मघु मरासिनी र अर्थको वित्त महाशाखा प्रमुख समेत संलग्न रहेको दीर्घराज मैनाली सहित पाँच सदस्यीय छानबिन समिति गठन गरिएको छ ।

उनले भने ‘ पाँच सदस्य छानबिन समिति गठन भएपछि अहिले सो समितिले काम अन्तिम अन्तिम चरणतिर पुर्याएको छ । केही दिनमा नै प्रतिवेदन आउनेछ । त्यो रिपोर्ट आएपछि हामीले सत्य तथ्य सबैलाई जानकारी नै गराउँछौं । प्रतिवेदन हेरेर मन्त्रालयले कारबार्ही गर्नेछ ।’

मन्त्री शर्माले अर्थ मन्त्रालयले सधै लगानीकर्ताको हितमा काम गर्ने बताए । अनियमितताको विषयमा यो भयो भन्नु भन्दा पनि छानविनपछि आम लगानीकर्ताको हीतमा मन्त्रालयले कदम चाल्ने उनले भनाई थियो । ‘अहिले अनियमितता वा उठेको प्रश्नको निष्कर्षमा पुग्नुभन्दा छानबिनपछि यथार्थकुरा बाहिर आएपछि सार्वजनिक गर्ने र कारवाहीको आवश्यक प्रकृया चाल्न उपयुक्त हुन्छ । हाम्रो ध्यान जनताका कारोबारको संरक्षण, हितको संरक्षण गर्नतर्फ छ ।’ उनले भने ।

पछिल्लो समय नेपालको पूँजीबजार लाखौंको सहभागीतामा अगाडि बढिरहेको र मौद्रिक नीति आएसँगै कारोबार रकम समेत साढे २१ अर्ब नाघेको उनले बताए ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।