एभरेष्ट बैंकद्वारा अनलाइन आन्तरिक राजस्व कर भुक्तानी प्रणाली शुरू

एभरेष्ट बैंक (EBL) ले फोन पे सँगको प्राविधिक सहकार्यबाट पुस २८ गतेदेखि महालेखा नियन्त्रक कार्यालयको साथ एकीकृत अनलाइन आन्तरिक राजस्व कर भुक्तानी प्रणाली शुरू गरेको छ ।

एभरेष्ट बैंक लिमिटेडका प्रमुख कार्यकारी अधिकृत जी.के. नेगी र नेपाल सरकार, अर्थ मन्त्रालयका सचिव (राजस्व) रामशरण पुडासैनीको उपस्थितिमा अनलाइन आन्तरिक राजस्व कर भुक्तानी प्रणालीको डिजिटल रूपमा उद्घाटन गरिएको थियो ।

यस प्रणालीको सुरुवातसँगै कोभिड(१९ महामारीको समयमा कर भुक्तानी गर्न कर कार्यालयको भ्रमण गर्ने समस्या र लामो प्रक्रियाको अन्त्य गर्ने भएको छ । बैंकका व्यवस्थापकहरुका अनुसार यस विधुतिय भुक्तानी प्रणालीले ठूलो मात्रामा सेवाग्राहीलाई लाभ प्रदान गर्नेछ ।

प्रणाली सुरु समरोहमा मधु कुमार मरासानी (महालेखा नियन्त्रक, नेपाल सरकार), विनोद बहादुर कुँवर (महानिर्देशक, आन्तरिक राजस्व विभाग), दिवस कुमार सापकोटा (प्रमुख प्राविधिक अधिकृत) का साथै फोन पे र बैंकका वरिष्ठ अधिकारीहरु पनि उपस्थिति रहेको थियो ।

बैंकले देशैभरि छरिएर रहेको आफ्नो १०० शाखा संजाल, प्रादेशिक कार्यालय , १३२ एटीएम बुथ सहित विश्वव्यापी नेटवर्कबाट अत्याधुनिक मोबाइल र इन्टरनेट र एसएमएस बैंकिङ्ग सुविधा प्रदान गर्दै आइरहेको छ ।

बैंकले नेपाल सरकारको राजस्व संकलनको लागि ३३ वटा संकलन केन्द्रबाट समेत सेवा दिँदै आइरहेको छ । बैंकका ११ लाखभन्दा बढी सन्तुष्ट ग्राहकहरु रहेको बैंकले जनाएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।