जीवन बीमा कम्पनीद्धारा ६ महिनामा पौने ५७ अर्ब बीमाशुल्क संकलन, व्यवसाय वृद्धिदर नयाँको धेरै

चालु आर्थिक वर्षको पुस मसान्तसम्ममा १८ जीवन बीमा कम्पनीले ५६ अर्ब ६९ करोड ९७ लाख रुपैयाँ खुद बीमाशुल्क संकलन गरेका छन् । गत आवको सोही अवधिमा ४१ अर्ब ३७ करोड ३६ लाख रुपैयाँ खुद बीमा शुल्क संकलन गरेका थिए । औषतमा खुद बीमाशुल्क ३७.०४ प्रतिशतले बढेको हो ।

राष्ट्रिय बीमा संस्थानले भने हालसम्म पनि चालु आवको दोस्रो त्रैमासको वित्तीय विवरण प्रकाशित नगरेकाले सो कम्पनीको तथ्याङ्क समेटिएको छैन ।

चालु आर्थिक वर्षको पुस मसान्तसम्ममा जीवन बीमा कम्पनीतर्फ व्यवसाय वृद्धि गर्नेमा नयाँ जीवन बीमा कम्पनी पुराना कम्पनी भन्दा अगाडि देखिएका छन् । कम्पनीहरुले प्रकाशित गरेको चालु आवको दोस्रो त्रैमासको वित्तीय विवरणलाई हेर्दा गत आवको यसै अवधिमा तुलनामा नयाँ कम्पनीको खुद बीमाशुल्क वृद्धिदर उच्च देखिएको हो ।

चालु आर्थिक वर्षको दोस्रो त्रैमास २०७७/७८ को वित्तीय विवरण सार्वजनिक गरेका १८ जीवन बीमा कम्पनीहरुको खुद बीमाशुल्कको तथ्याङ्कलाई गत आव २०७६/७७ को पुस मसान्तसम्मको तथ्याङ्कसँग तुलना गरेर हेर्दा व्यवसाय विस्तारको वृद्धिदर धेरै हुने सूचीको शीर्ष पाँचमा चार नयाँ कम्पनी समेटिएका छन् भने एउटा मात्र पुरानो कम्पनी रहेको छ । यस अवधिमा सानिमा लाइफ, गुराँस लाइफ, आइएमई, प्रभु, ज्योति लाइफ इन्स्योरेन्सको व्यवसाय वृद्धिदर उच्च देखिएको छ ।

• सानिमा र गुराँस लाइफको शतप्रतिशत धेरैले बढ्यो, मेट लाइफको सुस्त

चालु आर्थिक वर्षको पुस महिनासम्ममा सानिमा र गुराँस लाइफ इन्स्योरेन्सले १०० प्रतिशतभन्दा धेरैले व्यवसाय वृद्धि गरेका छन् ।

पुराना तथा नयाँ सबै कम्पनीलाई पछि पार्दै सानिमा लाइफ व्यवसाय वृद्धिदरमा पहिलो नम्बरमा छ भने गुराँस लाइफ दोस्रो स्थानमा रहेको छ ।

सानिमा लाइफले सबैभन्दा धेरै १३४.७७ प्रतिशतले व्यवसाय वृद्धि गरेको छ । चालु आवको पुस मसान्तसम्ममा कम्पनीले ९५ करोड ६३ लाख रुपैयाँ खुद बीमा शुल्क संकलन गरेको छ । गत आवको यसै अवधिमा कम्पनीले ४० करोड ७३ लाख रुपैयाँ खुद बीमाशुल्क संकलन गरेको थियो ।

सानिमा लाइफ पछि धेरै व्यवसाय वृद्धि गर्ने कम्पनी गुराँस लाइफ रहेको छ । कम्पनीले १२०.३५ प्रतिशतले व्यवसाय वृद्धि गरेको हो । गत आवकोमा ९५ करोड ७७ लाख कम्पनीले बीमा शुल्क संकलन गरेको कम्पनीले चालु आवको पुसमसान्तसम्ममा २ अर्ब ११ करोड रुपैयाँ खुद गरेको हो ।

गुराँस लाइफसँगै आइएमई, प्रभु, ज्योति र रिलायन्स लाइफको व्यवसाय वृद्धिदर आक्रमक देखिएको छ । यी पाँच कम्पनीले पनि ९० प्रतिशत धेरैले व्यवसाय विस्तार गरेका छन् ।

गत आवको पुसको तुलनामा चालु आवको यसै अवधिमा आइएमई लाइफले ९८.५१ प्रतिशत, प्रभु लाइफले ९५.०९ प्रतिशत, रिलायन्सले ९२.०६ प्रतिशत, सूर्याले ७७.८५ प्रतिशत र सिटिजन लाइफले ७३.२९ प्रतिशतले बीमाशुल्क बढाएका हुन् ।

पुस मसान्तसम्ममा अन्य पाँच कम्पनीले ५० देखि ९० प्रतिशत भन्दा धेरैले व्यवसाय बढाउन सफल देखिएका छन् । सूर्या लाइफ, सिटिजन, महालक्ष्मी, सन नेपाल लाइफ, र रिलायबल लाइफको बीमाशुल्क संकलन ५० देखि ९० प्रतिशतको बीचमा बढेको छ ।

यस अवधिमा नेशनल लाइफ, एशियन लाइफ, युनियन लाइफ, प्राइम लाईफ, एलआईसी र नेपाल लाइफको बीमशुल्क संकलनको वृद्धिदर औषत छ । यी कम्पनीहरुले २२ देखि ४१ प्रतिशतको बीचमा व्यवसाय विस्तार गरेका छन् ।

मेटलाइफको व्यवसाय वृद्धिदर सबैभन्दा सुस्त देखिएको छ । कम्पनीको खुद बीमाशुल्क संकलन ६.६७ प्रतिशत मात्र बढेको छ गत आवको यसै अवधिमा २ अर्ब २९ करोडबाट २ अर्ब ४४ करोड रुपैयाँ पुगेको छ ।

• जीवन बीमा कम्पनीद्धारा औषत ३ अर्ब १४ करोड बीमाशुल्क संकलन

चालु आवको ६ महिनामा वित्तीय विवरण सार्वजनिक गरेका १८ जीवन बीमा कम्पनीले औषतमा ३ अर्ब १४ करोड ९९ लाख ८३ हजार रुपैयाँ खुद बीमाशुल्क संकलन गरेका छन् । गत आवको यसै अवधिमा औषत २ अर्ब २९ करोड ८५ लाख ३३ हजार रुपैयाँ रहेको थियो ।

समीक्षा अवधिमा खुद बीमाशुल्क औषत ३७.०४ प्रतिशतले बढेको हो । १३ कम्पनीले औषतभन्दा धेरै प्रतिशतले खुद बीमशुल्क संकलन बढाएका छन् भने पाँच कम्पनीको औषतभन्दा कम छ ।

चालु आर्थिक वर्षको पुस मसान्तसम्ममा १८ जीवन बीमा कम्पनीले ५६ अर्ब ६९ करोड रुपैयाँ खुद बीमा शुल्क संकलन गरेका छन् । गत आवको सोही अवधिमा ४१ अर्ब ३७ करोड रुपैयाँ कुल बीमा शुल्क संकलन गरेका थिए ।

यस अवधिमा नेपाल लाइफले सबैभन्दा धेरै १७ अर्ब ८ करोड ७६ लाख रुपैयाँ खुद बीमा शुल्क संकलन गरेको छ । गत आवको पुससम्ममा १३ अर्ब ९१ करोड रुपैयाँ बीमाशुल्क संकलन गरेको यस कम्पनीले एक वर्ष अवधिमा २२.८४ प्रतिशतले बीमाशुल्क संकलन बढाएको हो ।

त्यस्तै, लाइफ इन्स्योरेन्स कर्पोरेसन (नेपाल) एलआइसीले दोस्रो ठूलो ९ अर्ब ५६ करोड, र नेशनल लाइफले ५ अर्ब ४८ करोड रुपैयाँ कुल बीमा शुल्क संकलन गरेका छन् । यूनियन, एशियन, मेट लाइफ, सूर्या, गुराँस,प्राइम लाइफ, ज्योति, सिटिजन, रिलायबल नेपाल, आइएमई, रिलायन्स लाइफ इन्स्योरेन्सले एक अर्ब माथि बीमाशुल्क संकलन गरेका छन् ।

यता, सानिमा लाइफ, सन नेपाल लाइफ, प्रभु, महालक्ष्मी लाइफले भने अर्ब भन्दा कम खुद बीमाशुल्क संकलन गरेका छन् । सबैभन्दा कम खुद बीमाशुल्क संकलन गरेको महालक्ष्मी लाइफले ४७ करोड २८ लाख ७६ हजार रुपैयाँ खुद बीमा शुल्क संकलन गरेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।