आर्थिक क्षेत्रले गति लिएसँगै कर्जा विस्तारमा बैंकहरु आक्रमक, निक्षेपको तुलनामा कर्जा प्रवाह दोब्बर

कोरोना कारण प्रभावित भएको आर्थिक क्षेत्रले गति लिएसँगै बैंकहरुमा कर्जाको माग बढेपछि बैंकहरु कर्जा विस्तारमा आक्रमक देखिएका छन् । फागुन महिना लागेपछि बैंकहरुमा थपिएको निक्षेपको तुलनामा कर्जा प्रवाह झण्डै दोब्बर पुगेको छ ।

पछिल्लो ३ सातामा अर्थात फागुन लागेयता नै बैंकहरुले ७० अर्ब कर्जा प्रवाह गरेका छन् । जबकी यस अवधिमा ३६ अर्ब मात्र निक्षेप थपिएको छ । पछिल्ला दिनहरुमा आयातमा आएको वृद्धि र शेयर तथा घरजग्गाको कारोबारमा आएको उत्साहले बैंकहरुमा कर्जाको माग बढेको हो ।

कोरोनाका कारण अन्य क्षेत्रको कर्जा ठप्प भएको समयमा समेत घरजग्गा, ओभरड्राफ्ट तथा मार्जिक प्रकृतिका व्यक्तिगत कर्जाको माग उल्लेख्य बढेको थियो ।कोरोनाका कारण आयात घट्ने र निर्यात बढ्ने अवस्थामा थियो ।

अतिआवश्यक वस्तु भन्दा अन्य वस्तु आयात गर्ने अवस्था थिएन । त्यसले गर्दा पनि बैंकहरुमा कर्जाको माग व्यक्तिगत प्रकृतिमा सिमित थियो । तर, पछिल्ला दिनहरुमा व्यापार व्यावसायहरुमा आएको गतिका कारण बैंकहरुमा कर्जाको माग पनि आउन थालेको हो ।

चालु आर्थिक वर्ष २०७७/७८ को पहिलो सात महिनामा ८ खर्ब बढीको आयात भएको छ । सात महिनाको (साउनदेखि माघ मसान्तसम्म) तथ्याङ्क अनुसार आठ खर्ब तीन अर्ब ६४ करोड बढीको आयात भएको छ ।

कोरोनाका कारण आर्थिक गतिविधि ठप्प सरह भएपछि बैंकहरुमा पैसा थुप्रिएको थियो । बैंकिङ प्रणालीमा निक्षेप थपिने, कर्जा रोकिने हुदाँ अधिक तरलताको समस्या देखियो । अधिक तरलताका कारण बैंकहरुले निक्षेपमा दिन ब्याजदर घटाएपछि बैंकहरुबाट निक्षेपमा राखिएको पैसा समेत बाहिरिन थालेको थियो ।

चालु आर्थिक वर्षको फागुन महिनाको तेस्रो सातामा बैंकहरुले २६ अर्ब रुपैयाँ कर्जा प्रवाह गरेका छन् । जबकी यसअवधिमा १३ अर्ब मात्र निक्षेप संकलन गरेका छन्। फागुनको दोस्रो सातमा बैंकहरुले २७ अर्ब कर्जा प्रवाह गरेका थिए भने सो अवधिमा ११ अर्ब निक्षेप थपिएको थियो । त्यस्तै पहिलो सातामा १७ अर्ब कर्जा प्रवाह हुँदा १३ अर्ब मात्र निक्षेप थपिएको थियो । माघको अन्तिम सातामा बैकहरुमा २ अर्ब निक्षेप थपिदा कर्जा प्रवाह २९ अर्बले बढेको थियो ।

फागुन महिनाको तीन सातामा बैंकहरुले ७० अर्ब कर्जा विस्तार गरेका छन् । यस अवधिमा बैंकहरुमा ३६ अर्ब मात्र निक्षेप संकलन गरेका छन् । पछिल्लो तीन सातमा बैंकहरुमा थपिएको निक्षेप भन्दा कर्जा झण्डै झण्डै दोब्बर रहेको छ ।

फागुन २१ गतेसम्ममा वाणिज्य बैंकहरुले ३८ खर्ब २३ अर्ब रुपैयाँ निक्षेप संकलन गरेको छन् । यो अवधिमा बैंकहरुले ३३ अर्ब ८८ अर्ब रुपैयाँ कर्जा प्रवाह गरेका छन्।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।