चालु आवको ९ महिनामा १८ अर्बको सार्वजनिक निष्काशन गर्न बोर्डबाट अनुमति

चालु आर्थिक वर्षको ९ महिना अर्थात चैत मसान्तसम्ममा पूँजीबजारको नियामक निकाय नेपाल धितोपत्र बोर्डले १७ अर्ब ८४ करोड ८८ लाख ७१ हजार १०० रुपैयाँ बराबरको सार्वजनिक निष्काशनको लागि अनुमति दिएको छ ।

विभिन्न २६ कम्पनीले सो बराबरको अनुमति पाएका हुन् । जसमध्ये १२ कम्पनीले साधारण शेयर (आईपीओ) दश कम्पनीले ऋणपत्र र चार कम्पनीलाई सामुहिक लगानी कोषको इकाई बिक्रीका लागि अनुमति प्रदान गरिएको धितोपत्र बोर्डले जनाएको छ ।

यस अवधिमा ११ अर्ब ५८ करोड ८८ लाख ७१ हजार १०० रुपैयाँ बराबरको ११ करोड ५८ लाख ८८ हजार ७२१ कित्ता साधारण शेयर आईपीओ, २ अर्ब ९६ करोड रुपैयाँ बराबरको २ करोड ९६ लाख कित्ता इकाई ऋणपत्र (१ करोड १८ लाख ४० हजार सर्वसाधारणमा) र ३ अर्ब ३० करोड रुपैयाँ बराबरको म्युचुअल फण्डको इकाई बिक्रीका लागि धितोपत्र बोर्डले अनुमति दिएको हो ।

सार्वजनिक निकाष्काशनका लागि बोर्डबाट अनुमति पाएका सबै प्राथमिक निष्काशनहरु (साधारण शेयर, डिबेञ्चर, म्युचुअल फण्ड) बिक्रीमा आइसकेकाले केही समय प्राथमिक बजारमा सार्वजनिक निष्काशन शुन्य हुने देखिएको हो ।

• आईपीओ

चालु आव यता नियामक निकाय नेपाल धितोपत्र बोर्डबाट निष्काशन अनुमति पाएका सबै कम्पनीले साधारण शेयर जारी गरिसकेका छन् । हालसम्म १५ कम्पनीले ११ करोड ५८ लाख ८८ हजार ७२१ कित्ता शेयर जारी गर्न बोर्डमा अनुमति पाएकोमा सबै निष्काशन आइसकेका हुन् ।

नेपाल धितोपत्र बोर्डले पछिल्लो पटक फागुन ७ गते ६६ लाख कित्ता आईपीओ जारी गर्न अनुमति पाएको ज्योति लाइफले फागुन २१ देखि २६ गतेसम्म शेयर जारी फागुन १३ गते बाँडफाँड समेत गरिसकेको छ । कम्पनीको शेयर फागुन २५ गते बुधबारदेखि धितोपत्रको दोस्रो बजारमा २ दिन कारोबारमा आइसकेको छ ।

सोभन्दा अघि माघ २१ गते अनुमति पाएको रुरु हाइड्रोपावर कम्पनीले फागुन ७ देखि २१ गतेसम्म स्थानीयलाई ४ लाख ७ हजार ७०६ कित्ता शेयर जारी गरी चैत ९ गते बाँडफाँड गरिसकेको छ । कम्पनीले उत्तिनै संख्यामा सर्वसाधारणमा चैत २० देखि २४ गतेसम्म बिक्रीमा ल्याएको शेयर भने बैशाख ३ गते शुक्रबार बाँडफाँड हुँदैछ ।

रुरुभन्दा अघि माघ ८ गते शेयर जारी गर्न अनुमति पाएको महिला लघुवित्तले ३० माघदेखि फागुन ५ गतेसम्म ४ लाख कित्ता शेयर जारी गरीसकेको छ । कम्पनीको फागुन १४ गते बाँडफाँड भई धितोपत्र बजारमा चैत ३ गतेदेखि कारोबार भैरहेको छ ।

अर्को कम्पनी ग्रीन लाइफले माघ २ गते नियामक निकाय धितोपत्र बोर्डबाट अनुमति पाएकोमा माघ २३ देखि २७ गतेसम्म ३४ लाख ९६ हजार ४०० कित्ता शेयर जारी गरी फागुन ७ गते बाँडफाँड भई चैत ३ गतेदेखि नै कारोबार भैरहेको छ ।

स्थानीय र सर्वसाधारणलाई गरी ४३ लाख ५० हजार कित्ता शेयर जारी गर्न अनुमति पाएको सिंगटी हाइड्रोपावकर कम्पनीले पनि स्थानीय बासिन्दाका लागि माघ ४ गते फागुन ३ गतेसम्म शेयर जारी गरी फागुन १९ गते बाँडफाँड गरेको छ । कम्पनीले चैत ६ देखि १० गतेसम्म सर्वसाधारणमा जारी गरेको २९ लाख कित्ता शेयर फागुन २७ गते बाँडफाँड भएको छ । कम्पनीको शेयर सूचीकरण भई कारोबारमा आउन बाँकी छ ।

सिंगटीभन्दा अघि अनुमति पाएका सबै कम्पनीले साधारण शेयर जारी गरिसकेका छन् ।

• डिबेञ्चर

चालु आव यता नेपाल धितोपत्र बोर्डबाट दश बैंक तथा वित्तीय संस्थाले २ करोड ९६ लाख इकाई ऋणपत्र अनुमति पाएका छन् । जसमध्पे ४० प्रतिशत बराबररको १ करोड १८ लाख ४० हजार सर्वसाधारणमा र ६० प्रतिशत अर्थात १ करोड ७७ लाख ६० हजार इकाई व्यक्तिगत तवरबाट बिक्री सकिएको छ ।

पछिल्लो पटक ग्लोबल आइएमई बैंकले फागुन १६ गते ३० लाख कित्ता इकाई ऋणपत्र बिक्रीका लागि अनुमति पाएको थियो । उक्त ऋणपत्र बैंकले चैत १ देखि १६ गतेसम्म निष्काशन गरी चैत २३ गते बाँडफाँड गरिसकेको छ ।

सोभन्दा अघि ३० लाख कित्ताका लागि निष्काशन अनुमति पाएको एनसीसी बैंकले १३ चैतदेखि १८ चैतसम्म ऋणपत्र जारी गरी चैत २७ गते बाँडफाँड गरेको छ ।

• म्युचुअल फण्ड

म्युचुअल फण्डतर्र्फ चालु आव यता चार वटा फण्ड व्यवस्थापकले ३३ करोड इकाई जारी गर्न अनुमति पाएका थिए । अनुमति पाएका सबै म्युचुअल फण्डको इकाई बिक्रीमा आइसकेको छ ।

पछिल्लो पटक फागुन १६ गते १० करोड इकाई जारी गर्न अनुमति पाएको सनराइज ब्लूचिप फण्डले चैत १ गतेदेखि ८ गतेसम्म फण्डको इकाई बिक्रीमा ल्याएकोमा चैत १३ गते नै बाँडफाँड गरिसकेको छ ।

फागुन ३ गते ८ करोड इकाई जारी गर्न अनुमति पाएको कुमारी इक्वीटी फण्डले फागुन १४ गतेदेखि २५ गतेसम्म निष्काशन तथा बिक्री खुला गरी चैत्र ५ गते बाँडफाँड गरिसकेको छ ।

सोभन्दा अघि इकाई जारी गर्न अनुमति पाएका सानिमा लार्ज क्याप फण्ड र एनआईसी एशिया डेब्ट म्युचुअल फण्डले पनि इकाई जारी गरिसकेका छन् । सानिमा लार्ज क्याप फण्डले १० करोड इकाई र एनआईसी एशिया डेब्ट म्युचुअल फण्डले ५ करोड इकाई बिक्री गरेको हो ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।