शिखर इन्स्योरेन्सको पौने १६ लाख कित्ता संस्थापक शेयर सर्वसाधारण सरह खरीद बिक्री गर्न सकिने

शिखर इन्स्योरेन्स कम्पनी (SICL) मा रहेको १५ लाख ८२ हजार ६७१ कित्ता संस्थापक शेयर रुपान्तरण (कन्भर्जन) भई साधारण शेयरतर्फ थपिएको छ ।

कम्पनीले उक्त संख्याको संस्थापक शेयरलाई साधारणमा परिणत गरेको हो । यससँगै कम्पनीको संस्थापक शेयर हिस्सा घटेको छ भने सर्वसाधारणको शेयर हिस्सा बढेको छ ।

रुपान्तरण पश्चात कम्पनीमा संस्थापक सर्वसाधारण समूह तर्फको शेयर अनुपात ५१ः४९ कायम भएको छ । यसअघि कम्पनीमा स्थापक शेयर पूँजीको हिस्सा ६० प्रतिशत र सर्वसाधारणको ४० प्रतिशत थियो ।

शिखर इन्स्योरेन्सको २०७७ चैत ९ गते सोमबार सम्पन्न १५ र १६ औ वार्षिक साधारण सभाले आर्थिक वर्ष २०७६/७७ को मुनाफाबाट २७.७६ प्रतिशत बोनस शेयर वितरण पश्चात कायम हुने चुक्ता पूँजी एक अर्ब ७३ करोड रुपैयाँमा सर्वसाधारण शेयर धनीको हिस्सा ४९ प्रतिशत पुर्याउने विशेष प्रस्ताव पारित गरेको थियो ।

सोही सभाले संस्थापक शेयर पूँजीको हिस्सा ६० प्रतिशतबाट घटाएर ५१ प्रतिशतमा झार्ने प्रस्ताव पनि पारित गरेको थियो । सोही अनुरुप मंगलबार नेप्से मार्फत कम्पनीले शेयर रुपान्तरण गरेको हो ।

संस्थापकतर्फको शेयर सर्वसाधारणमा रुपान्तरण भएसँगै कम्पनीको शेयर आपूर्ति बढ्ने भएको छ । विद्यमान संस्थापक शेयरधनीले आफुसँग रहेको कन्भर्जन भएको शेयर सर्वसाधारण शेयर सरह धितोपत्रको दोस्रो बजारमा खरीद बिक्री गर्न सकिने भएसँगै सर्वसाधारण शेयरको आपूर्ति बढेको हो ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।