व्यवसाय विस्तारमा नयाँ बीमा कम्पनी आक्रमक, सानिमाको जीवन र निर्जीवन दुबै अगाडि

गत आर्थिक वर्षमा पुराना बीमा कम्पनीहरुभन्दा नयाँ बीमा कम्पनीहरुको व्यवसाय विस्तारको दर उच्च देखिएको छ । दशकौंदेखि बीमा बजारमा आफ्नो अघिपत्य जमाउँदै आएका कम्पनीहरुलाई तीन वर्षअघिदेखि सञ्चालनमा आएका कम्पनीहरुले टक्कर दिने किसिमले व्यवसाय बढाउँदै अगाडि बढेको देखिएको हो ।

अघिल्लो आर्थिक वर्षको तुलनामा गत आर्थिक वर्षमा धेरै व्यवसाय विस्तार दर धेरै हुने कम्पनीमा नयाँ कम्पनीहरु नै अगाडि देखिएका छन् । जीवन बीमातर्फ सबैभन्दा धेरै प्रतिशतले बीमा व्यवसाय बढाएका दश कम्पनीभित्र आठ वटा नयाँ कम्पनी रहेका छन् भने निर्जीवन बीमातर्फ शीष दशभित्र तीन निर्जीवन बीमा कम्पनी अटाएका छन् । निर्जीवनतर्फ शीर्ष तीनभित्र दुई नयाँ निर्जीवन बीमा कम्पनी रहेका छन् ।

नेपालमा बीमा व्यवसायको विस्तार कम भएको भन्दै सरकारको निर्देशनमा बीमा समितिले तीन वर्षअघि थप दश जीवन बीमा कम्पनी र तीन निर्जीवन बीमा कम्पनीलाई सञ्चालन अनुमति दिएको थियो । तीन वर्षको अवधिमा नै नयाँ बीमा कम्पनीको प्रगति उदाहरणीय देखिन थालेको छ ।

जीवन बीमा कम्पनीहरुको अघिल्लो आर्थिक वर्ष २०७६/७७ को तुलनामा गत आर्थिक वर्ष २०७७/०७८ मा कुल बीमाशुल्क २८.१५ प्रतिशतले बढेको छ । सञ्चालनमा आएका दश नयाँ जीवन बीमा कम्पनीको वृद्धिदर जीवन बीमा कम्पनीहरुको व्यवसायको वृद्धिदरको औषतभन्दा बढी छ । प्रभु लाइफ र महालक्ष्मी लाइफको व्यवसायको वृद्धिदर औषतभन्दा कम छ ।

यसैगरी अघिल्लो आर्थिक वर्ष २०७६/७७ को तुलनामा गत आर्थिक वर्ष २०७७/७८ मा निर्जीवन बीमा कम्पनीहरुको कुल बीमाशुल्क १६.७६ प्रतिशतले बढेको छ । सञ्चालनमा आएका तीन निर्जीवन बीमा कम्पनीहरु सानिमा जनरल, अजोड र जनरल इन्स्योरेन्सको व्यवसायको वृद्धिदर निर्जीवन बीमा कम्पनीहरुको औषतभन्दा बढी छ ।

सानिमा लाइफको वृद्धिदर धेरै,आठ नयाँ कम्पनीहरुको वृद्धि औषतभन्दा माथि

गत आर्थिक वर्ष २०७७/७८ मा दश नयाँ जीवन बीमा कम्पनीको वृद्धिदर जीवन बीमा कम्पनीहरुको व्यवसायको वृद्धिदरको औषतभन्दा बढी छ । प्रभु लाइफ र महालक्ष्मी लाइफको व्यवसायको वृद्धिदर औषतभन्दा कम छ । गत आर्थिक वर्षमा जीवन बीमा कम्पनीहरुको व्यवसाय वृद्धि (कुल बीमाशुल्क संकलन) २८.१५ प्रतिशतले बढेकोमा आठ बीमा कम्पनीहरुको वृद्धि सो भन्दा माथि देखिएको हो । 

गत आर्थिक वर्षमा सानिमा लाइफ इन्स्योरेन्सले सबैभन्दा धेरै बीमाशुल्क बढाएको छ । इन्स्योरेन्सले १३७.८० प्रतिशतले बीमाशुल्क वृद्धि गरेको हो । अघिल्लो आर्थिक वर्ष २०७६/७७ मा ८२ करोड रुपैयाँ कुल बीमाशुल्क आर्जन गरेको कम्पनीले गत आर्थिक वर्षमा १ अर्ब ९५ करोड रुपैयाँ कुल बीमाशुल्क संकलन गरेको हो ।

यसैगरी सन नेपाल लाइफले शतप्रतिशतले बीमाशुल्क बढाएको छ । गत आवमा कम्पनीले २ अर्ब २२ करोड रुपैयाँ कुल बीमाशुल्क संकलन गरेको हो । अघिल्लो आवमा कम्पनीले १ अर्ब ११ करोड रुपैयाँ कुल बीमाशुल्क संकलन गरेको थियो ।

यसैगरी आईएमई लाइफले ९९.२९ प्रतिशत, रिलायवल नेपाल लाइफले ८६.८८ प्रतिशत, रिलायन्स लाइफले ८३.५७ प्रतिशत, सिटिजन लाइफले ८३.१६ प्रतिशत, ज्योति लाइफ ६४.०२ प्रतिशत, युनियन लाइफ ४१.०४ प्रतिशत, प्रभु लाइफ २२.८८ प्रतिशत, र महालक्ष्मी लाइफले २१.८४ प्रतिशतले कुल बीमाशुल्क संकलन बढाएका छन् ।

गत आवमा आईएमई लाइफले २ अर्ब ७९ करोड, रिलायवल नेपालले २ अर्ब ९९ करोड, रिलायन्सले २ अर्ब ५७ करोड र सिटिजन लाइफले ३ अब ५९ करोड, ज्योति लाइफले ३ अर्ब १० करोड, युनियन लाइफले ६ अर्ब ७७ करोड, प्रभु लाइफले १ अर्ब ४५ करोड र महालइमी लाइफले १ अर्ब ६ करोड रुपैयाँ कुल बीमाशुल्क संकलन गरेको छ ।

बीमा समितिले उपलब्ध गराएको गत आर्थिक वर्षको तथ्याङ्कका आधारमा पुराना कम्पनीलाई पछि पार्दै नयाँ कम्पनी अघि बढेको देखिएको हो ।  समितिको तथ्यांकअनुसा दशकौंदेखि बीमा व्यवसाय सञ्चालन गर्दै आएका कम्पनी भन्दा पछिल्लो समयमा स्थापना भएका जीवन बीमा कम्पनीहरु व्यवसाय विस्तारमा आक्रमक देखिएका हुन् ।

सञ्चालनमा रहेका १९ जीवन बीमा कम्पनीहरुको गत आर्थिक वर्ष २०७७/७८ मा कुल बीमाशुल्क संकलन १ खर्ब २० अर्ब ९५ करोड छ । जसमा नयाँ बीमा कम्पनीको हिस्सा २३.५५ प्रतिशत रहेको छ । अघिल्लो आवमा कम्पनीहरुले ९४ अर्ब ३८ करोड रुपैयाँ कुल बीमाशुल्क संकलन गरेका थिए ।

सबैभन्दा धेरै प्रतिशतले बीमाशुल्क बढाउने कम्पनीको सूचीको शीर्ष पाँचभित्र सबै नयाँ जीबन बीमा कम्पनी समेटिएका छन् । जसमा पनि दुई नयाँ जीवन बीमा कम्पनीले शतप्रतिशत व्यवसाय बढाएका छन् ।

कुल बीमाशुल्क संकलन रकमका भने समीक्षा अवधिमा महालक्ष्मी लाइफले सबैभन्दा कम १ अर्ब ६ करोड रुपेयाँ संकलन गरेको छ । नेपाल लाइफले सबैभन्दा धेरै ३२ अर्ब ८४ करोड रुपैयाँ संकलन गरेको छ ।

निर्जीवन बीमा व्यवसायमा पनि नयाँ कम्पनीको वृद्धिदर अधिक

जीवन बीमा व्यवसायमा मात्र होइन निर्जीवन बीमा व्यवसायमा पनि नयाँ कम्पनीहरुको उपस्थिति बलियो देखिएको छ ।

अघिल्लो आर्थिक वर्ष २०७६/७७ को तुलनामा गत आर्थिक वर्ष २०७७/७८ मा निर्जीवन बीमा कम्पनीहरुको कुल बीमाशुल्क १६.७६ प्रतिशतले बढेको छ । नयाँ निर्जीवन बीमा कम्पनीको वृदिदर सोभन्दा धेरै रहेको छ ।

गत आवमा निर्जीवन बीमातर्फं पनि सानिमा जनरल इन्स्योरेन्सले निर्जीवन बीमा कम्पनीहरुमा सबैभन्दा धेरै ८५.७१ प्रतिशतले बीमाशुल्क संकलन वृद्धि गरेको छ । यस्तै अजोड इस्योरेन्सले ४७.६७ र जनरल इन्सयोरेन्सले २०.३७ प्रतिशतले व्यवसाय विस्तार गरेको छ ।

गत आव २०७७/७८ मा सानिमा जनरल इन्स्योरेन्सले ६५ करोड, अजोड इन्स्योरेन्सले १ अर्ब २७ करोड र जनरल इन्सयोरेन्सले ६५ करोड रुपैयाँ कुल बीमाशुल्क संकलन गरेको छ ।

सञ्चालनमा रहेका २० निर्जीवन बीमा कम्पनीहरुले ३० अर्ब ९० करोड ६८ लाख रुपैयाँ बीमा शुल्क आर्जन गरेका हुन् । सो मध्ये नयाँ तीन निर्जीवन बीमा कम्पनीको हिस्सा ८.११ प्रतिशत रहेको छ । अघिल्लो आवमा कम्पनीहरुले २७ अर्ब १५ करोड रुपैयाँ कुल बीमाशुल्क संकलन गरेका थिए ।

गत आवमा प्रभु इन्स्योरेन्स र हिमालयन जनरल बाहेक अरु सबै बीमा कम्पनीको बीमाशुल्क रकम बढेको छ । हिमालयन जनरलको कुल बीमाशुल्क रकम ५.११ प्रतिशत र प्रभु इन्स्योरेन्सको १२.९० प्रतिशतले घटेको हो ।

कुल बीमाशुल्क संकलन रकमका आधारमा भने समीक्षा अवधिमा सानिमा जनरल र जनरल इन्सयोरेन्स दुबैले ६५ करोड रुपेयाँ संकलन गरेका छन् । शिखर इन्स्योरेन्सले सबैभन्दा धेरै ३ अर्ब ९७ करोड रुपैयाँ संकलन गरेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।