राष्ट्रिय बीमा कम्पनी खुद नाफा साढे ४३ प्रतिशतले घट्यो, इपिएसमा १०४ रुपैयाँ गिरावट

नेपाल स्टक एक्ससचेञ्जमा सूचीकृत कम्पनीमध्ये दोस्रो उच्च शेयरमूल्य रहेको राष्ट्रिय बीमा कम्पनी लिमिटेड (RBCL) को खुद नाफा ४३.५७ प्रतिशतले घटेको छ ।

अघिल्लो आवको यसै अवधिमा ६३ करोड ८५ लाख ६६ हजार रुपैयाँ नाफा गरेको कम्पनीको नाफा समीक्षा अवधिमा घटेर ३६ करोड ३ लाख २८ हजार रुपैयाँमा संकुचित बनेको हो ।

चुक्ता पूँजी २६ करोड ६६ लाख ३९ हजार रुपैयाँ रहेको कम्पनीको वार्षिक प्रतिशेयर आम्दानी १०४.३५ रुपैयाँले घटेर १३५.१४ रुपैयाँमा झरेको छ । नाफा घटेसँगै कम्पनीको प्रतिशेयर आम्दानीमा पनि उच्च गिरावट आएको हो ।  अघिल्लो आवमा २३९.४९ रुपैयाँ रहेको थियो ।

यस अवधिमा कम्पनीको प्रतिशेयर नेटवर्थ १२८०.८१ रुपैयाँ र मूल्य आम्दानी अनुपात १५९.८४ गुणा छ ।

कम्पनीले गत आर्थिक वर्षको चौथो त्रैमाससम्म २२ करोड ६९ लाख रुपैयाँ खुद बीमा शुल्क संकलन गरेको छ । अघिल्लो आवमा २२ करोड ४५ लाख रुपैयाँ संकलन गरेकोमा १.०७ प्रतिशतले बढेको हो ।

समीक्षा अवधिसम्ममा कम्पनीले लगानी, कर्जा तथा अन्यबाट हुने आय पनि २२ करोड ५५ लाख रुपैयाँबाट घटेर १४ करोड ६ लाख रुपैयाँमा सीमित भएको छ। इस अवधिमा कम्पनीले पुनर्बीमा कमिसनबाट १७ करोड ६९ लाख रुपैयाँ आम्दानी गरेको छ । अघिल्लो आवमा १७ करोड ४८ लाख रुपैयाँ आम्दानी गरेको थियो ।

कम्पनीको बीमा कोषमा २ अर्ब ४३ करोड ४२ लाख रुपैयाँ र जगेडा कोषमा ३ अर्ब १४ करोड रुपैयाँ सञ्चित छ । समीक्षा अवधिमा बीमा कोषको आकार ८ प्रतिशत र जगेडा तथा कोषको आकार ६ प्रतिशतले बढेको छ ।

कम्पनीले यस अवधिमा ४ करोड २५ लाख रुपैयाँ खुद दाबी भुक्तानी गरेको छ । कम्पनीको जारी बीमालेखको संख्या ४६ हजार ८८३ रहेको छ ।  जसमध्ये ८हजार ५२५ वटा बीमालेख नवीकरण गरिएका छन् । हालसम्म कम्पनीले ९ हजार ६७९ वटा दाबी वापत १५ करोड १८ लाख भुक्तानी गरेको छ ।

नेपाल स्टक एक्ससचेञ्जमा सूचीकृत कम्पनीमध्ये युनिलिभर नेपाल लिमिटेडको सबैभन्दा उच्च शेयरमूल्य रहेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।