समता घरेलु लघुवित्तको एफपीओ प्रत्याभूति एनआईबिएल एस क्यापिटलले गर्ने

समता घरेलु लघुवित्त वित्तिय संस्था लिमिटेड (SMATA) ले जारी गर्ने थप सार्वजनिक निष्काशन (फर्दर पव्लिक इस्यू) अर्थात एफपीओको प्रत्याभूति एनआईबिएल एस क्यापिटल लिमिटेड लाजिम्पाटले गर्ने भएको छ ।

लघुवित्तले थप सार्वजनिक निष्काशन (फर्दर पव्लिक इस्यू) मार्फत् सर्वसाधारणलाई जारी हुन बाँकी २ लाख ८९ हजार ४४० कित्ता एफपीओको प्रत्याभूतिकर्ताको रुपमा एनआईबिएल एस क्यापिटल लिमिटेडलाई नियुक्त गरिएको हो ।

प्रत्याभूतिकर्ता नियुक्ती सम्बन्धी सम्झौतापत्रमा चैत्र २५ गते समता घरेलु लघुवित्त वित्तीय संस्था लिमिटेडको तर्फबाट प्रमुख कार्यकारी अधिकृत डा. मदन घिमिरे र एनआईबिएल एस क्यापिटल लिमिटेडको तर्फबाट नायब महाप्रवन्धक सचिन्द्र ढुंगानाले हस्ताक्षर गरेका छन् ।

लघुवित्त कम्पनीले आफ्नो प्रबन्धपत्रमा भएको व्यवस्था बमोजिम संस्थापक : सर्वसाधारणकाे सेयर संरचना ७०ः३०  कायम हुने गरी २ करोड ८९ लाख ४४ हजार रुपैयाँ बराबरको २ लाख ८९ हजार ४४० कित्ता साधारण सेयरको थप सार्वजनिक निष्काशन (फर्दर पब्लिक इस्यू) गर्नुपर्ने अवस्था रहेको छ ।

घरेलु लघुवित्तलाई मर्जरपछि कम्पनीमा संस्थापक सेयरहिस्सा बढी रहेको छ भने सर्वसाधारणको हिस्स ३० प्रतिशतभन्दा कम छ । नेपाल राष्ट्र बैैकको व्यवस्था अनुसार बैंक तथा वित्तीय संस्थाहरुले आफ्नो चुक्ता पूँजीको न्यूनतम ३० प्रतिशत सेयर सर्वसाधारणमा जारी गर्नुपर्ने हुन्छ । सोही अनुसार लघुवित्तले प्रकृया अगाडि बढाएको हो ।

समता लघुवित्त र घरेलु लघुवित्त वित्तिय संस्था गाभिएपछि सेयर संरचना परिवतर्न भएको थियो। समताको १०० र घरेलुको ८० रुपैयाँ कायम हुने गरि दुबै संस्था गाभिएका थिए । गाभिएर कायम चुक्ता पूँजी २८ करोड ५६ लाख रुपैयाँबाट २० प्रतिशत बोनस वितरणपछि चुक्ता पूँजी ३४ करोड २७ लाख रुपैयाँ पुगेको हो।संस्थापकको ७० र सर्वसाधारणको ३० प्रतिशत बनाउनका लागि कम्पनीले २ करोड ८९ लाख ४४ हजार रुपैयाँको एफपीओ जारी गर्न लागेको हो।

एफपीओ निष्काशनका लागि फागुन तेस्रो साता आरविवि मर्चेन्ट बैकिङ्ग लिमिटेडलाई बिक्री प्रबन्धकमा नियुक्त गरिएको छ । सम्झौतापत्रमा समता घरेलु लघुवित्त वित्तीय संस्थाका प्रमुख कार्यकारी अधिकृत डा. मदन घिमिरे र आरविवि मर्चेन्ट बैंकिङ्गका प्रमुख कार्यकारी अधिकृत बद्रीप्रसाद प्याकुरेलले हस्ताक्षर गरेका थिए ।

समता घरेलु लघुवित्त वित्तिय संस्थाको स्थापना दिगो लघुवित्त सेवा प्रदान गर्ने, कृषि उत्पादन बढाउने, र गरिबजन समुदायमा आय तथा रोजगारी सिर्जना गर्ने उद्देश्यका साथ भएको हो । चुक्ता पूँजी ३४ करोड २७ लाख ४४ हजार रुपैयाँ रहेको लघुवित्तले पुस मसान्तसम्म ३ करोड ५५ लाख २७ हजार रुपैयाँ खुद नाफा आर्जन गरेर वार्षिक प्रतिसेयर आम्दानी २०.७३ रुपैयाँ कायम गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।