वाणिज्य बैंकहरुको एक महिनाको नाफा ६ अर्ब , माघसम्म ९ बैंकको घट्यो

चालु आर्थिक वर्षको माघ महिनामा वाणिज्य बैंकहरुले ६ अर्ब ४ करोड १६ लाख रुपैयाँ खुद नाफा आर्जन गरेका छन् । पुसमसान्तसम्मको बैंकहरुले कुल ३४ अर्ब २० करोड ५९ लाख रुपैयाँ खुद नाफा गरेका थिए । पछिल्लो एक महिनामा बैंकहरुको नाफा ६ अर्ब ४ करोड १६ लाख (१७.६६ प्रतिशत) रुपैयाँले बढेको हो ।

चालु आवको ७ महिना अवधि (साउनदेखि माघसम्म) मा कुल ४० अर्ब २४ करोड ७५ लाख रुपैयाँ खुद नाफा आर्जन गरेका बैंकहरुको नाफामा माघको हिस्सा १५ प्रतिशत रहेको छ । बैंकहरुले चालु आवमा वितेका ७ महिनामा कै हाराहारीमा माघमा पनि नाफा आर्जन गरेका हुन् ।

प्राइम कमर्सियल बैंकले माघ महिनामा सबैभन्दा धेरै नाफा गरेको छ भने सबैभन्दा कम नाफा कृषि विकास बैंकको रहेको छ । प्राइमले ४८ करोड ३९ लाख नाफा कमाउँदा कृषि विकास बैंकले माघ महिनामा ६ अर्ब ९३ करोड रुपैयाँ मात्र नाफा गरेको छ ।

एनआईसी एशियाले दोस्रो ठूलो नाफा आर्जन गर्दै माघमा ४५ करोड ७३ लाख नाफा कमाउँदा नबिल बैंक ४३ करोड ८७ लाख, ग्लोबल आईएमई ३६ करोड ७३ लाख र राष्ट्रिय वाणिज्य बैंकले ३६ करोड ४३ लाख नाफा कमाएको छ ।

यस अवधिमा हिमालयन, नेपाल, कुमारी, नेपाल इन्भेष्टमेन्ट, एनएमबि, सिद्धार्थ, र एनसीसी बैंकले २० करोडभन्दा बढी ३० करोडभन्दा कम नाफा कमाएका छन् । थप १२ बैंकहरुको नाफा दश करोडभन्दा बढी बीस करोडभन्दा कम छ । सेञ्चुरी, मेगा र कृषि विकास बैंकको नाफा दश करोडभन्दा कम रहेको छ ।

चालु आवको ७ महिनामा ४० अर्ब बढी नाफा आर्जन, ९ बैंकको नाफा भने घट्यो

चालु आर्थिक वर्षको माघ मसान्तसम्मको अपरिष्कृत वित्तीय विवरण अनुसार अनुसार वाणिज्य बैंकहरुले कुल ४० अर्ब २४ करोड ७५ लाख रुपैयाँ खुद नाफा आर्जन गरेका छन् । पुसमसान्तसम्मको बैंकहरुले कुल ३४ अर्ब २० करोड ५९ लाख रुपैयाँ खुद नाफा गरेका थिए । पछिल्लो एक महिनामा बैंकहरुको नाफा ६ अर्ब ४ करोड १६ लाख (१७.६६ प्रतिशत) रुपैयाँले बढेको हो ।

गत आवको माघ मसान्तको तुलनामा भने बैंकहरुको नाफा करिब १२ प्रतिशतले वृद्धि भएको छ । २०७७ माघ मसान्तसम्मको वाणिज्य बैंकहरुले ३५ अर्ब ९५ करोड ५६ लाख नाफा कमाएका थिए । समीक्षा अवधिमा बैंकहरुको नाफा ११.९३ प्रतिशतले बढेको हो ।

नेपाल राष्ट्र बैंकले चालु आर्थिक वर्षको मौद्रिक नीति मार्फत सेयरमा गरेको लगानीमा कडाई गरेको छ । वित्तीय प्रणालीमा चालु आवको सुरुवात देखिनै बैंकहरुमा तरलता तथा कर्जा लगानी योग्य रकम अभावको समस्या देखियो । सो समस्या हालसम्ममा पनि कायम नै छ । तरलता समस्या तथा नेपाल राष्ट्र बैंकका कारण बैंकहरुको धेरै नाफा गर्न आम्दानी धेरै हुने क्षेत्र गैर–बैंकिङ क्षेत्रको आम्दानी खुम्चेको अवस्था छ ।

त्यति मात्र चालु आवको दोस्रो त्रैमासको अन्त्यतिर आयातमा समेत केही कडाइको नीति लियो । सरकारले आयातमा कडाई गरेसंगै बैंकहरुको रिटेल कर्जामा प्रवाहमा समेत असर गर्यो । केन्द्रीय बैंकले पुँजी, कर्जा तथा निक्षेप अनुपातको सट्टा कर्जा तथा निक्षेप अनुपात लाूु गर्यो । त्यसमा पनि ९० प्रतिशतको सीमा तोक्यो । यसको असर चालु आर्थिक वर्षको दोस्रो त्रैमासको वित्तीय विवरणमा देखिएको छ । यद्यपी यस्तो अवस्थामा पनि बैंकहरुको १२ प्रतिशतको नाफा वृद्धि हुनु लगानीकर्ताका लागि पनि सुखद पक्ष हो ।

गत आवको माघको तुलनामा चालु आवको यसै अवधिमा बैंकहरुको कमाउको नाफालाई हेर्दा ९ वाणिज्य बैंंकको नाफा घटेको छ । कुमारी, प्रभु, सनराइन, एभरेष्ट, नेपाल इन्भेष्टमेन्ट, सानिमा, कृषि, मेगा र एनएमबि बैंकको नाफा घटेको हो ।

यस अवधिमा १८ बैंकको नाफा बढेको छ । सिभिल बैंकले सबैभन्दा धेरै ११८ प्रतिशतले नाफा बढाउँदा अन्य चार बैंकहरु एनआईसी एशिया, एनसीसी, नेपाल एसबिआई र स्ट्याण्डर्ड चार्टड बैंकको नाफा ५० प्रतिशतले बढेको हो । सबैभन्दा कम नाफा बढेको प्राइम कमर्सियल बैंकले १.९४ प्रतिशतले नाफा वृद्धि गरेको छ ।

पाँच बैंकको नाफा २ अर्ब माथि, ग्लोबल पहिलो नम्बरमा

२०७८ माघ मसान्तसम्मको तथ्याङ्क अनुसार पाँच वाणिज्य बैंकले २ अर्बभन्दा धेरै नाफा आर्जन गरेका छन् । सबैभन्दा धेरै नाफा आर्जन गरेको ग्लोबल आइएमई बैंकले ३ अर्ब ३ करोड ६ लाख बढी नाफा कमाएको छ । गत आवको माघको तुलनामा बैंकको नाफा १२.१० प्रतिशतले बढेको हो । गत आवको माघसम्म बैंकले २ अर्ब ७० करोड ३४ लाख रुपैयाँ खुद नाफा गरेको छ ।

यस्तै एनआईसी एशिया बैंकले २ अर्ब ८५ करोड ९३ लाख, नबिल बैंक २ अर्ब ६२ करोड १ लाख नाफा कमाउँदा सरकारी लगानी रहेका राष्ट्रिय वाणिज्य बैंक नाफाको आधारमा चौथो स्थानमा रहेको छ । बैंकले २ अर्ब २८ करोड २९ लाख रुपैयाँ खुद नाफा कमाएको हो । यस्तै प्राइम कमर्सियल बैंकले २ अर्ब २५ करोड १६ लाख रुपैयाँ खुद नाफा आर्जन गरेको छ ।

एनएमबि बैंक, नेपाल इन्भेष्टमेन्ट, सिद्धार्थ र नेपाल बैंक गरी चारले दुई अर्बभन्दा कम साढे १ अर्बमाथि नाफा कमाउँदा थप ११ बैंकले अर्बमाथि नाफा आर्जन गरेका छन् । कृषि, मेगा, प्रभु, सिटिजन्स, सानिमा, स्ट्याण्डर्ड चार्टर्ड, कुमारी, माछापुच्छ्रे, एनसीसी, हिमालयन र एभरेष्ट बैंकको नाफा एक अर्बभन्दा धेरै छ ।

नेपाल एसबिआई, लक्ष्मी, सनराइज, नेपाल बंगलादेश, बैंक अफ काठमाण्डू, सेञ्चुरी र सिभिल बैंक गरी ७ बैंकको खुद नाफा ६० करोडभन्दा धेरै एक अर्बभन्दा कम रहेको छ ।

९ बैंकको नाफा घट्यो, कुमारीको सर्वाधिक

चालु आवको ७ महिना अर्थात माघसम्ममा सञ्चालनमा रहेका २७ मध्ये ९ बैंकको नाफा घट्दा कुमारी बैंकको सर्वाधिक घटेको छ । यसरी नाफा घट्ने बैंकको शीर्ष स्थानमा कुमारी बैंकको नाफा २०७७ माघको तुलनामा १८.३८ प्रतिशतले घटेको छ ।

यस्तै समीक्षा अवधिमा प्रभु र सनराइज बैंकको नाफा पनि १४ प्रतिशतभन्दा अधिक घटेको छ । एभरेष्ट बैंकको १२ प्रतिशत, नेपाल इन्भेष्टमेन्ट बैंक ११ प्रतिशत, सानिमा साढे २ प्रतिशत तथा कृषि विकास, मेगा र एनएमबि बैंकको नाफा पनि १ प्रतिशत बढीले घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।