शिखर इन्स्योरेन्सको नबिकेको ७७ हजार ७२० कित्ता हकप्रद सेयर लिलाममा

शिखर इन्स्योरेन्स कम्पनी लिमिटेड (SICL) ले हकप्रदमा नबिकेको ७७ हजार ७२२ दशमलव ८८ कित्ता सर्वसाधारण तर्फको सेयर बोलकबोल लिलामबाट बिक्री गर्ने भएको छ ।

कम्पनीले बैशाख १९ देखि २६ गतेसम्म उक्त सेयरका लागि बोलपत्र आह्वान गरेको छ ।

यसअघि कम्पनीले चैत १ देखि २१ गतेसम्म चुक्ता पूँजीको ३० प्रतिशत हकप्रद सेयर निष्काशन गरेको थियो । उक्त अवधिमा संस्थापकतर्फ सबै सेयर बिक्री भएपनि नबिकेको हकप्रद सेयर सर्वसाधारण तर्फको हो ।

कम्पनीको १० कित्ता सयर बराबर ३ कित्ता (१०ः३)को अनुपातको हकप्रदमा आवेदन दिएकामध्ये रितपूर्वक आवेदन परेका २७ हजार ७१० जना आवेदकलाई ५१ लाख ९७ हजार ८५१ दशमलव १२ कित्ता हकप्रद सेयर बैशाख ५ गते सोमबार बाँडफाँड गरेको हो ।

उक्त हकप्रद सेयरमा ९८.५३ प्रतिशतको आवेदन परेको थियो । आवेदन नपरेको उक्त ७७ हजार ७२२ दशमलव ८८ कित्ता सेयरको बोलकबाेल खुला गरिएको हो । लगानीकर्ताले न्यूनतम १०० कित्तादेखि अधिकतम १० ले भाग जानेगरी बीमा समितिले तोकेको प्रतिव्यक्तिको सीमाभित्र रही माग गरिए बराबरकाे कित्ताका लागि आवेदन दिन सक्नेछन् ।

लगानीकर्ताले बिक्री प्रबन्धक एनआईबिएल एस क्यापिटल लिमिटेड, लाजिम्पाट, काठमाडौं तथा शाखा कार्यालयहरुः पुतलीसडक काठमाडौं, लगनखेल ललितपुर, चिप्लेढुङ्गा पोखरा, ट्राफिकचोक बुटवल, आदर्शनगर वीरगञ्ज र गोल्छाचोक विराटनगर कार्यालयबाट आवेदन दिन सक्नेछन् ।

यसैगरी नेपाल इन्भेष्टमेन्ट बैंक लिमिटेडको शाखा कार्यालयहरु, नारायणगढ, हेटौंडा, बिर्तामोड, जनकपुर, तुल्सीपुर दाङ, सुर्खेत, नेपालगञ्ज र धनगढी शाखा कार्यालयबोलपत्र आवेदन प्राप्त गर्न र बुझाउन सकिने बिक्री प्रबन्धक एनआईबिएल एस क्यापिटलले जनाएको छ ।
बोलपत्र पेश गर्दा प्रतिकित्ता १०० रुपैयाँभन्दा माथि प्रतिस्पर्धात्मक मूल्यमा आवेदन दिन सक्नेछन् ।

हाल दोस्रो बजारमा शिखरको सेयर मूल्य प्रतिकित्ता १ हजार १३५ रुपैयाँ छ । एक वर्ष अवधिमा कम्पनीको बजार मूल्य अधिकतम २ हजार ३४० र न्यूनतम १ हजार १०८ रुपैयाँसम्ममा कारोबार भएको छ ।

आर्थिक वर्ष २०७६।७७ बाट चुक्ता पूँजीको २७.७६ प्रतिशत बोनस र कर प्रयोजनका लागि १.४६ प्रतिशत नगद गरी कुल २९.२२ प्रीतशत लाभांश वितरण गरेको कम्पनीले गत आव २०७७।७८ बाट समेत लाभांश वितरण गर्न बाँकी रहेको छ । यसअुसार लिलामी हकप्रद सेयर खरीद गर्नेले लाभांश समेत पाउनेछन् ।

हाल १ अर्ब ७५ करोड ८५ लाख २४ हजार रुपैयाँ चुक्ता पूँजी रहेको शिखरको हकप्रद सेयरको लिलामी बिक्री प्रक्रिया सकिएपछि कम्पनीको चुक्ता पूँजी २ अर्ब २८ करोड ६० ालख ८१ ह्जार २०० रुपैयाँ पुग्नेछ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।