सूचीकृत सबैजसो बीमा कम्पनीहरुको लाभांश घोषणा, १४ ले साधारण सभा पनि सकाए

सञ्चालनमा रहेका बीमा कम्पनीहरुमध्ये अधिकांश सूचीकृत कम्पनीले सेयरधनीलाई लाभांश वितरण गर्ने प्रस्ताव गरिसकेका छन् ।

नेप्सेमा १६ निर्जीवन तथा ११ जीवन बीमा कम्पनी मात्र सूचीकृत छन् । सूचीकृत २७ मध्ये १९ कम्पनीले लाभांश घोषणा गरेका हुन् । यस्तै सूचीकृत २ निर्जीवन र २ जीवन गरी ४ कम्पनीले लाभांश वितरण नगर्ने घोषणा गरेका छन् । यसो हुँदा कुल २३ कम्पनीको लाभांश वितरण गर्ने नगर्ने टुङ्गो लागेको छ । जुन कुल सूचीकृत कम्पनीको ८५ प्रतिशत हो ।

सूचीकृत एक निर्जीवन बीमा कम्पनी र तीन जीवन बीमा गरी कुल ४ कम्पनीले भने लाभांश घोषणा गरेका छैनन् । सूचीकृतमध्ये राष्ट्रिय बीमा कम्पनी, लाइफ इन्स्योरेन्स कर्पोरेसन नेपाल, सूर्यज्योति लाइफ इन्स्योरेन्स र प्रभु लाइफको लाभांश घोषणा हुन बाँकी रहेको हो । 

हाल १८-१८ निर्जीवन तथा जीवन बीमा कम्पनी गरी ३६ बीमा कम्पनीहरु सञ्चालनमा रहेका छन् । दुई वटा पुनरबीमा समेत जाेड्दा कुल ३८ सञ्चालनमा छन्  । मर्जरपछि दुई निर्जीवन बीमा र एक जीवन बीमा कम्पनी घटेका छन् । दुई निर्जीवन बीमा कम्पनी र सात जीवन बीमा कम्पनी धितोपत्र बजारमा सूचीकृत छैनन् ।

पुनरबीमा सहित कुल ३८ मध्ये १९ कम्पनीले सेयरधनीलाई लाभांश वितरण गरेका छन् । समीक्षा अवधिमा १३ निर्जीवन बीमा कम्पनी तथा ६ जीवन बीमा कम्पनीले सेयरधनीलाई लाभांश वितरणको प्रस्ताव गरेका हुन् ।  यस अवधिमा निर्जीवन बीमा कम्पनीहरु सगरमाथा, नेको, प्रिमियर, सगरमाथा, एनएलजी, सिद्धार्थ, नेपाल इन्स्योरेन्स, लुम्बिनी जनरल, प्रभु, प्रुडेन्सियल, आईएमई जनरल, युनाइटेड र हिमालयन एभरेष्ट इन्स्योरेन्सले लाभांश वितरण गरेका छन् ।

यस्तै जीवन बीमातर्फ नेपाल लाइफ, नेशनल लाइफ, एशयिन लाइफ, प्राइम लाइफ, युनियन लाइफ र गुराँस लाइफ इन्स्योरेन्सले लाभांश लाभांश वितरणको प्रस्ताव गरेका हुन् ।

माघ १६ गतेसम्ममा एक पुनरबीमा कम्पनी, दुई निर्जीवन तथा तीन जीवन बीमा गरी कुल कम्पनीले लाभांश वितरण नगर्ने घोषणा गरेका छन् । हिमालयनर रि, अजोड, र सानिमा जीआईसी, रिलायबल लाइफ, सानिमा लाइफ र सिटिजन्स लाइफले सेयरधनीलाई लाभांश वितरण नगर्ने घोषणा गरेका हुन् ।

अब एक पुनरबीमा कम्पनी, तीन निर्जीवन तथा नौं जीवन बीमा कम्पनीको लाभांश घोषणा भएको छैन । लाभांश घोषणा गर्न बाँकी १३ मध्ये ५ कम्पनी मात्र सूचीकृत छन् । जसमम्धे तीन कम्पनी जीवन बीमा, एक।एक निर्जीवन तथा रि इन्स्योरेन्स रहेका छन् । सूचीकृतमध्ये लाइफ इन्स्योरेन्स कर्पोरेसन नेपाल, सुर्यज्योति, प्रभु लाइफ राष्ट्रिय बीमा कम्पनी र नेपाल रि इन्स्योरेन्सको लभांश घोषणा हुन बाँकी रहेको हो । सरकारी स्वामित्वको राष्ट्रिय बीमा कम्पनीले दशकौंदेखिको लेखापरीक्षण टुङ्गाउन नसक्दा सेयरधनीले लाभांश पाउने गरेका छैन । नेपाल रिको जीवन बीमा कम्पनीहरुबाट वित्तीय विवरण आउन ढिलाइ हुँदा साधारण सभा सम्पन्न हुन सकेको छैन ।

भारतीय स्वामित्वमा सञ्चालित नेशनल इन्स्योरेन्स कम्पनी र ओरियन्टल इन्स्योरेन्स तथा अमेरिकी लगानीमा रहेको मेट लाइफले पनि लाभांश घोषणा गर्दैनन् । लाभांश वितरण नगरेका अन्य कम्पनीहरु महालक्ष्मी लाइफ, सन् नेपाल लाइफ, आईएमई लाइफ र रियालबल नेपाल लाइफ तथा राष्ट्रिय बीमा कम्पनी नेप्सेमा सूचीकृत छैनन् ।

१४ कम्पनीले सकाए साधारण सभा

सञ्चालनमा रहेकामध्ये माघ १६ गतेसम्म १४ कम्पनीले साधारण सभा सम्पन्न गरेका छन् । १ पुनरबीमा, ७ निर्जीवन र ६ वटा जीवन बीमा गरी कुल १४ कम्पनीले साधारण सभा सम्पन्न गरेका हुन् । दुई कम्पनीले माघभित्रै साधारण सभा सम्पन्न गर्नेगरी आह्वान गरेका छन् ।

यस अवधिसम्ममा पुनरबीमातर्फ हिमालयन रि इन्स्याेरेन्स, निर्जीवन बीमातर्फ नेपाल इन्स्योरेन्स, नेको, प्रिमियर, सिद्धार्थ, आइएमई जनरल, युनाइटेड र अजोड इन्स्योरेन्सले साधारण सभा सम्पन्न गरेका हुन् । यस्तै जीवन बीमातर्फ नेपाल लाइफ, नेशनल लाइफ, एशयिन लाइफ, प्राइम लाइफ, गुराँस लाइफ इन्स्योरेन्स र सिटिजन्स लाइफ इन्स्योरेन्सले सभा सम्पन्न गरेका हुन् ।

शिखर र युनियन लाइफ इन्स्योरेन्सले क्रमशः माघ २५ र २६ गते साधारण सभा आह्वान गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।