नक्कली नेपाली रुपैयाँ सहित दुई पक्राउ

नेपाल प्रहरीले ४ लाख ८६ हजार नक्कली रुपैयाँ सहित २ जनालाई बुधबार दिउँसो पक्राउ गरेको छ । प्रहरीले पर्सा, वीरगञ्ज महानगरपालिका–१६ चालिसफिटे सडकबाट १ हजार दरको ४५० थान र ५ सय दरको ७२ थान रकम सहित दुई जनालाई नियन्त्रणमा लिउको हो ।

पक्राउ पर्नेहरूमा सर्लाही गोडैता नगरपालिका–१२ मधुवनी बस्ने ३४ वर्षीय आनन्द बर्दन सिंह र बारा परवानीपुर गाउँपालिका–३ बस्ने ३६ वर्षीय ओम प्रकाश साह रहेका छन् ।

मधेश प्रदेश प्रहरी कार्यालय जनकपुर र जिल्ला प्रहरी कार्यालय पर्साबाट खटिएको प्रहरीले बसपार्कतर्फबाट प्रतिमा चोकतर्फ जादै गरेको बीआर ०१ पीजी ६५७७ नम्बरको भारतीय गाडीलाई जाँच गर्ने क्रममा उक्त नक्कली नोटसहित फेला पारी चालक सिंह र गाडीमा सवार साहलाई पक्राउ गरेको हो ।

घटनाका सम्बन्धमा प्रहरीले आवश्यक अनुसन्धान गरिरहेको जनाएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।