डिभि लट्री २०२४ को नतिजा शनिबार राती सार्वजनिक हुँदै

संयुक्त राज्य अमेरिकाले हरेक वर्ष सञ्चालन गर्दै आएको डाभर्सिटी भिसा कार्यक्रम अन्तरगत सन् २०२४ को लट्री नतिजा नेपाली समय अनुसार शनिबार राती सार्वजनिक हुने भएको छ ।

युएस डिपार्टमेण्ट अफ स्टेट्सका अनुसार सन् २०२४ को डिभि लट्रीको नतिजा मे ६ तारिखका दिन इष्टर्न डे लाइट टाइम को मध्यान्हमा सार्वजनिक हुनेछ । उक्त समयमा नेपालमा मध्य रात हुनेछ ।

नेपाल लगायत विश्वभरका डिभिका आवेदकहरुले इलेक्ट्रोनिक डाइभर्सिटी भिसा प्रोग्रामको आधिकारिक वेबसाइटमा गएर आफ्नो कन्फरमेशन नम्बर राखी नतिजा हेर्नुपर्ने हुन्छ ।

युएस डिपार्टमेण्ट अफ स्टेट्स कन्सुलर अफेयर्सका अनुसार कुनै पनि आवेदकलाई इमेल वा अन्य कुनै माध्यमबाट डिभि लट्रीमा छनौट भएको सूचना प्रवाह गरिने छैन । हरेक आवेदकले माथि उल्लेख भए अनुसार नतिजा हेर्नुपर्ने बताइएको छ ।

युएस डिपार्टमेण्ट अफ स्टेट्स कन्सुलर अफेयर्सले डिभि भिसाका आवेदकहरुलाई सन् २०२३ को सेप्टेम्बर ३० तारिखसम्म आफ्नो कन्फरमेशन नम्बर सुरक्षित राख्न आग्रह गरेको छ । विभिन्न चरणमा लट्रीको नतिजा सार्वजनिक हुने भएकाले कन्फरमेशन नम्बर सुरक्षित राख्न आग्रह गरिएको हो ।

सन् २०२२ को अक्टोबर १९ अर्थात गत असोज १९ गते बुधबारबाट खुला भएको डिभि भिसाको आवेदन नोभेम्बर ८ अर्थात कात्तिक २२ गतेसम्म खुल्ला गरिएको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।