प्रथम बीमाशुल्क घट्दा जीवन बीमा व्यवसाय २.६४% मात्र बढ्यो, १ खर्ब ४२ अर्ब माथि बीमाशुल्क संकलन

नेपालमा सञ्चालित चौध जीवन बीमा कम्पनीहरुले गत आर्थिक वर्ष २०७९/८० मा १ खर्ब ४२ अर्ब ३० करोड ७४ लाख ७४ हजार रुपैयाँ कुल बीमाशुल्क संकलन गरेका छन् । अघिल्लो आवको तुलनामा २०७९/८० मा नवीकरण बीमाशुल्क १४.३२ प्रतिशतले बढेको भएपनि प्रथम बीमाशुल्क २४.७२ प्रतिशतले घटेपछि समग्र जीवन बीमा कम्पनीहरुले संकलन गर्ने बीमाशुल्कमा त्यसको असर देखिएको हो ।

गत आवमा जीवन बीमा कम्पनीहरुको नवीकरण बीमाशुल्क रकम ९७ अर्ब १९ करोड ३४ लाख ६९ हजार रहेकोमा गत आवमा १ खर्ब ११ अर्ब १० करोड ७४ लाख १ हजार रुपैयाँ पुगेको छ । उता प्रथम बीमाशुल्क रकम ४१ अर्ब ४४ करोड ७० लाख ४१ हजारबाट घटेर ३१ अर्ब २० करोड ७२ हजार रुपैयाँमा झरेको छ । गत आवमा जीवन बीमा कम्पनीहरुले संकलन गरेको प्रथम बीमाशुल्क १.१३ देखि ५०.३८ प्रतिशतसम्मले घटेको छ ।

नेपाल बीमा प्राधिकरणको तथ्याङ्क अनुसार आव २०७८/७९ को तुलनामा गत आव २०७९/८० मा समग्र जीवन बीमा व्यवसाय २.६४ प्रतिशत (३ अर्ब ६६ करोड ६९ लाख ६४ हजार रुपैयाँ) ले मात्र बढेको हो । आव २०७८/७९ मा १९ जीवन बीमा कम्पनीहरुले १ खर्ब ३८ अर्ब ६४ करोड ५ लाख १० हजार रुपैयाँ कुल बीमाशुल्क संकलन गरेका थिए । मर्जरका कारण पछिल्लो एक वर्षमा पाँच जीवन बीमा कम्पनीको अस्तित्व समाप्त भएको छ ।

नेपाल बीमा प्राधिकरणबाट प्राप्त आव २०७९/८० को तथ्याङ्क अनुसार नेपाल लाइफ इन्स्योन्स पहिलो नम्बरमा रहेको छ । कम्पनीले सबैभन्दा धेरै ३७ अर्ब १६ करोड ६९ लाख रुपैयाँ कुल बीमा शुल्क (कुल बीमाशुल्कको २६.१२ प्रतिशत) संकलन गर्दै शीर्ष स्थानमा छ । दोस्रो ठूलो बीमाशुल्क संकलन गरेको लाइफ इन्स्योरेन्स कर्पोरेसन (एलआईसी नेपाल) ले १७ अर्ब ४६ करोड १४ लाख ५० हजार रुपैयाँ (कुल बीमाशुल्कको १२.२७ प्रतिशत) बीमाशुल्क संकलन गरेको छ भने नेशनल लाइफ इन्स्योरेन्सले १६ अर्ब ४१ करोड ६९ लाख ४९ हजार रुपैयाँ (कुल बीमाशुल्कको ११.५४ प्रतिशत) संकलन गरेको छ । तीन कम्पनी (प्राइम, युनियन र गुराँस) मर्ज भएपछि बनेको हिमालयन लाइफ इन्स्योरेन्सको कुल बीमाशुल्क १४ अर्ब ९४ करोड ३६ करोड ८२ लाख रुपैयाँ (कुल बीमाशुल्कको १०.५० प्रतिशत) पुगेको छ ।

यस्तै गत आवमा सूर्यज्योति लाइफले ८ अर्ब ८१ करोड २७ लाख १८ हजार रुपैयाँ (कुल बीमाशुल्कको ६.१९ प्रतिशत) प्रिमियम कलेक्सन गरेको छ । यसैगरी राष्ट्रिय बीमा संस्थानले ८ अर्ब ३० करोड ९८ लाख ७२ हजार रुपैयाँ (कुल बीमाशुल्कको ५.८४ प्रतिशत), एशियन लाइफले ७ अर्ब १ करोड ४६ लाख ३७ हजार रुपैयाँ (कुल बीमाशुल्कको ४.९३ प्रतिशत), सिटिजन लाइफले ५ अर्ब ८९ करोड ४५ लाख २६ हजार रुपैयाँ (कुल बीमाशुल्कको ४.१४ प्रतिशत), सानिमा रिलायन्स लाइफले ५ अर्ब ६३ करोड ६० लाख ८९ हजार रुपैयाँ (कुल बीमाशुल्कको ३.९६ प्रतिशत), मेट लाइफले ५ अर्ब २६ करोड २२ लाख ९९ हजार रुपैयाँ (कुल बीमाशुल्कको ३.७० प्रतिशत) कुल बीमाशुल्क उठाएको छ ।

गत आवमा आइएमई लाइफ इन्स्योरेन्सले ४ अर्ब १८ करोड ६३ लाख १५ हजार रुपैयाँ (कुल बीमाशुल्कको २.९४ प्रतिशत) संकलन गर्दा रिलायबल नेपाल लाइफले ३ अर्ब ७९ करोड ४९ लाख ७६ हजार रुपैयाँ (कुल बीमाशुल्कको २.६७ प्रतिशत), सन नेपाल लाइफले ३ अर्ब ७५ करोड ५ लाख ३३ हजार (कुल बीमाशुल्कको २.६४ प्रतिशत) रुपैयाँ संकलन गरेको छ । प्रभु महालक्ष्मी लाइफ इन्स्योरेन्स सबैभन्दा अन्तिम चौधौं नम्बरमा रहेको छ ।

गत आवमा प्रभु महालक्ष्मी लाइफले ३ अर्ब ६५ करोड ६५ लाख ५१ हजार रुपैयाँ (कुल बीमाशुल्कको २.५७ प्रतिशत) बीमाशुल्क संकलन गरेको छ । जसमा प्रभु लाइफले २ अर्ब ५ करोड १९ लाख २४ हजार रुपैयाँ प्रिमियम कलेक्सन गर्दा महालक्ष्मी लाइफले १ अर्ब ६० करोड ४६ लाख २७ हजार रुपैयाँ बीमाशुल्क संकलन गरेको हो । दुई कम्पनीले गत असार २९ गतेदेखि एकीकृत कारोबार थालेका थिए ।

नौ कम्पनीको कूल बीमा शुल्क बढ्यो, पाँचको घट्यो

प्राधिकरणको तथ्याङ्क अनुसार गत आर्थिक वर्ष २०७९/८० मा ९ जीवन बीमा कम्पनीले बीमाशुल्क संकलन वृद्धि गरेका छन् भने पाँच कम्पनीको घटेको छ ।

कूल बीमा शुल्क रकम वृद्धिका आधारमा आइएमई लाइफले सर्वाधिक बढाउँदा उत्कृष्ट व्यवसाय विस्तार गर्नेमा दोस्रो स्थानमा नेशनल लाइफ र तेस्रो स्थानमा सन नेपाल लाइफ इन्स्योरेन्स रहेको छ । यस्तै सिटिजन लाइफ, नेपाल लाइफ, सानिमा रिलायन्स र एशियन लाइफको पनि बीमाशुल्क बढेको छ ।

वित्तीय विवरण अनुसार आइएमई लाइफ इन्स्योरेन्सले आव २०७९/८० को तुलनामा सबैभन्दा धेरै १८.२६ प्रतिशतले आफ्नो व्यवसाय विस्तार गरेको हो । यस्तै नेशनल लाइफले १४.४९ प्रतिशत, सन नेपाल लाइफको ११.५९ प्रतिशत, सिटिजन लाइफको ८.५४ प्रतिशत, नेपाल लाइफको ५.०४ प्रतिशतले कुल बीमाशुल्क संकलन बढेको छ ।

यस्तै अघिल्लो आवको तुलनामा सानिमा रिलायन्स लाइफ इन्स्योरेन्सले ३.६४ प्रतिशतले कुल बीमाशुल्क संकलन रकम बढाउँदा, एशियन लाइफले २.०१ प्रतिशत, मेट लाइफले ०.५९ प्रतिशत र सूर्याज्योति लाइफले सबैभन्दा कम ०.१० प्रतिशतले बीमाशुल्क वृद्धि गरेको छ ।

गत आवमा ९ वटा कम्पनीको कूल बीमा शुल्क वृद्धि गर्दा पाँच कम्पनीको घटेको छ । प्रभु महालक्ष्मी लाइफको सर्वाधिक ८.१२ प्रतिशतले कुल बीमाशुल्क संकलन रकम घट्दा हिमालयन लाइफको ४.२५ प्रतिशत, एलआईसी नेपालको ४.१८, रिलायबल नेपाल लाइफको ३.९१ प्रतिशत र राष्ट्रिय बीमा संस्थानले १.९६ प्रतिशतले अघिल्लो आवका तुलनामा गत आवमा आफ्नो व्यवसाय हिस्सा गुमाएको हो ।