चीनसँगको व्यापार सम्झौताले अपेक्षा पूरा नगरेको इटालीको दावी

चीनसँगको विवादास्पद लगानी सम्झौताले इटालियाली अपेक्षालाई पूरा गर्न नसकेको रोमका उच्च कूटनीतिज्ञले बेइजिङ भ्रमणअघि शनिबार बताएका छन् । सन् २०१९ मा अत्यधिक ऋणग्रस्त अर्थतन्त्र इटालीले चीनको ‘बेल्ट एण्ड रोड इनिसिएटिभ’ मा सहभागी हुने औद्योगिक राष्ट्रहरूको जी–७ समूहबाट एक मात्र राष्ट्र बनेको थियो ।

बन्दरगाह, रेलमार्ग र विमानस्थलजस्ता पूर्वाधारमा ठूलो लगानी गर्ने चिनियाँ राष्ट्रपति सी चिनफिङको महत्वाकांक्षी कार्यक्रमले एसिया, अफ्रिका र युरोपबीचको व्यापारिक सम्बन्ध सुधार गर्ने लक्ष्य राखेको छ ।

आलोचकहरूले यो योजना बेइजिङको प्रभाव बढाउने ट्रोजन घोडा भएको बताएका छन् । इटालीले यस वर्ष फिर्ता नलिएमा सम्झौता मार्च २०२४ मा स्वतः नवीकरण हुनेछ ।

इटालीका विदेशमन्त्री एन्टोनियो ताजानीले एक आर्थिक मञ्चमा भने, “हामी चीनसँग नजिकबाट काम गर्न चाहन्छौं, तर हामीले निर्यातको पनि विश्लेषण गर्नुपर्छ: बेल्ट एन्ड रोड इनिसिएटिभले हामीले आशा गरेको परिणाम दिन सकेको छैन ।”

सन् २०२२ मा इटालीले चीनमा १६ अर्ब ५० करोड युरो (१७ अर्ब ८० करोड अमेरिकी डलर) बराबरको निर्यात गरेको छ भने फ्रान्स र जर्मनीको निर्यात क्रमशः २३ अर्ब र १०७ अर्ब युरो रहेको उनले बताए ।

ताजानीले आइतबारदेखि मङ्गलबारसम्म बेइजिङको भ्रमणका क्रममा चिनियाँ अधिकारीहरूसँग भेटघाट गर्नुका साथै प्रधानमन्त्री जियोर्जिया मेलोनीको योजनाबद्ध भ्रमणको तयारी गनेछन् । इटालियन ट्रेजरीका पूर्व प्रमुख अर्थशास्त्री लोरेन्जो कोडोग्नोले भनेका छन्,“सम्भवतः चिनियाँ अधिकारीहरूसँग सैद्धान्तिक सहमति भइसकेको छ ।” मेलोनीका पूर्ववर्ती मारियो ड्राघीले सम्झौतालाई स्थगन गर्दै रणनीतिक महत्वका क्षेत्रहरूमा ठूलो मात्रामा चिनियाँ लगानीलाई रोकेका थिए ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।