बीआरआई प्रभावकारी बनाउँदै नेपालको कृषि तथा पूर्वाधार विकासमा सहयोग गर्न चीन इच्छुक

चीनले बेल्ट एन्ड रोड इनिसीएटीभ (बीएरआई) मार्फत नेपालमा सडक, रेलमार्ग, उड्डयन, सञ्चार तथा विद्युतीय पूर्वाधार विकासका योजनामा काम गर्न तयार रहेको जनाएको छ ।

सात दिने चीन भ्रमणमा रहेका प्रधानमन्त्री पुष्पकमल दाहालसँगको भेटमा चिनियाँ प्रधानमन्त्री लि कियाङले नेपालको पूर्वाधार विकासमा सहयोग गर्न आफूहरु तयार रहेको बताएका हुन् । चीनले नेपालबाट गुणस्तरीय कृषि उत्पादनहरू आयात गर्न, चिनियाँ उद्यमहरूलाई नेपालको विकास र निर्माणमा सहभागी हुन प्रोत्साहन गर्ने, शिक्षा, चिकित्सा सेवा, पर्यटनलगायतका क्षेत्रमा जनस्तरमा आदानप्रदान र सहयोगलाई सुदृढ गर्न इच्छुक रहेको उनले जानकारी दिएका छन् ।

भेटवार्तामा प्रधानमन्त्री पुष्पकमल दाहाल प्रचण्डले आर्थिक विकास र गरिबी निवारणमा चीनले हासिल गरेको उपलब्धिको उच्च प्रशंसा गर्दै बदलिँदो अन्तर्राष्ट्रिय परिस्थितिको सामना गर्नमा नेपाल–चीन सम्बन्ध सफल रहेको बताए । नेपालले राष्ट्रिय सार्वभौमसत्ता र भौगोलिक अखण्डताको रक्षामा चीनलाई साथ दिने र कुनै पनि बाह्य शक्तिलाई नेपाली भूमिमा चीन विरोधी गतिविधिका लागि प्रयोग गर्न नदिने बताए ।

यसका साथै प्रचण्डले नेपालको आर्थिक विकास र कोभिड–१९ विरुद्धको लडाइमा चीनले गरेको सहयोगप्रति कृतज्ञता व्यक्त गर्दै ‘बेल्ट एण्ड रोड इनिसिएटिभ’ अन्तर्गत सहयोग बढाउन आग्रह गरेका छन् । भेटवार्ता पछि प्रधानमन्त्री ली र प्रचन्डले १० वटा सम्झौतामा हस्ताक्षर गरेका छन् । जसअन्तर्गत व्यापार प्रवद्र्धन, कृषि तथा प्रविधिको विकास, हरित तथा डिजिटल अर्थतन्त्रको विकास, पूर्वाधार विकासमा सहयोग लगायतका विषय समावेश छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।