युनिलिभर नेपालको हालसम्मकै सर्वाधिक लाभांश घोषणा

नेपाली सेयर बजारमा सबैभन्दा महङ्गो सेयरमूल्य रहेको युनिलिभर नेपाल लिमिटेडले हालसम्मकै धेरै लाभांश वितरणको प्रस्ताव गरेको छ । असोज २६ गते बसेको कम्पनीको सञ्चालक समितिको बैठकले हालसम्मकै उच्च दरमा लाभांश वितरण गर्ने घोषणा गरेको हो ।

कम्पनीले गत आर्थिक वर्ष २०७९/८० को मुनाफाबाट सेयरधनीहरुलाई प्रतिसेयर १ हजार ५८० रुपैयाँका दरले नगद लाभांश वितरण गर्ने घोषणा गरेको हो । कम्पनीले प्रस्ताव गरेको यो लाभांश हालसम्मकै सर्वाधिक हो । कम्पनीले सञ्चालनको ३० वर्ष पुगेको खुशियालीमा कम्पनीले सर्वाधिक लाभांश वितरण गर्ने घोषणा गरेको जनाएको छ ।

पछिल्ला १३ वर्ष अवधिमा यसअघि कम्पनीले आव २०७३।७४ बाट १ हजार २७० प्रतिशत लाभांश वितरण गरेको थियो । उत्पादनमुलक समुहमा सूचीकृत बहुर्राष्ट्रिय कम्पनी युनिलिभर नेपाल लिमिटेडको सेयरमूल्य हाल धितोपत्रको दोस्रो बजारमा प्रतिकित्ता ३७ हजार ५०० रुपैयाँ रहेको छ ।

लाभांश वितरण तथा साधारण सभा प्रयोजनार्थ कम्पनीले मङ्सिर १२ गते मंगलबारदेखि मङ्सिर २६ गतेसम्म बुकक्लोज गर्ने जनाएको छ ।बुकक्लोज अनुसार मंसिर ११ गते सोमबारसम्म नेप्सेमा सेयर कारोबार भई कायम रहने सेयरधनीहरुले मात्र प्रस्तावित लाभांश प्राप्त गर्न र साधारण सभामा सहभागिता जनाउन सक्नेछन् । साधारण सभाबाट लाभांश पारित भएको ४५ दिनभित्र लगानीकर्तालाई वितरण गर्ने कम्पनीले जनाएको छ ।

कम्पनीले लक्स, लाइफब्वाय, रिन, ह्वील, पोन्ड्स, भ्यासलिन, सनसिल्क, ल्याक्मे, क्लिनिक प्लस, पेप्सोडेण्ट, क्लोजअप लगायत अन्य ब्राण्डको उत्पादन तथा बिक्री गर्दै आएको छ । लन्डनमा मुख्यालय रहेको कम्पनी युनिलिभरले नेपालमा युनिलिभर इन्डियामार्फत ८० प्रतिशत सेयर लगानी गरेको छ । युनिलिभरले लगानीकर्तालाई आकर्षक लाभांश पनि दिँदै आइरहेको छ । कम्पनीमा हिन्दस्थान युनिलिभर मुम्बईको ७ लाख ३६ हजार ५६० कित्ता, सिवक्रिम होल्डिङ्ग प्राली नेपालको ४६ हजार ३५ कित्ता र सर्वसाधारणमा १ लाख ३८ हजार १०५ कित्ता सेयर रहेको छ ।

यस्तो छ युनिलिभरको लाभांश इतिहासः–

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।