बैंकहरुको प्रतिसेयर आम्दानी औसत ८ रुपैयाँले घट्यो, कृषि विकास बैंकको २८ रुपैयाँ ऋणात्मक

चालु आर्थिक वर्षको पहिलो त्रैमासमा वाणिज्य बैंकहरुको प्रतिसेयर आम्दानी औसत ८ रुपैयाँले घटेको छ । गत आर्थिक वर्षको असोज मसान्तसम्मको तुलनामा चालु आवको असोज मसान्तसम्म २० वाणिज्य बैंकहरुको प्रतिसेयर आम्दानी औसतमा ८ रुपैयाँ २ पैसाले घटेको हो ।

सञ्चालनमा रहेका २० वाणिज्य बैंकहरुमध्ये १४ बैंकको प्रतिसेयर आम्दानी (इपीएस) घटेको छ भने समीक्षा अवधिमा ६ वाणिज्य बैंकको मात्र इपीएस बढेकोे छ । समीक्षा अवधिकोे तुलनामा बैंकहरुको नाफा वृद्धि नभएपछि इपीएस घटेको हो ।

चालु आर्थिक वर्षको पहिलो त्रैमासको वित्तीय विवरण अनुसार २० वाणिज्य बैंकहरुको खुद नाफा १८ प्रतिशतले घटेको छ । बैंकहरुको खराब कर्जा बढेसंगै नोक्सानी व्यवस्था बढेपछि नाफा घटेको हो । चालु आर्थिक वर्षको पहिलो त्रैमासमा बैंकहरुले १३ अर्ब ४५ करोड रुपैयाँ खुद नाफा गरेका छन् । यो नाफा गत आवको सोही अवधिको तुलनामा १८.७ प्रतिशतले थोरै हो । गत आवको सोही अवधिमा बैंकहरुको खुद नाफा १६ अर्ब ५५ करोड रुपैयाँ रहेको थियो ।

असोज मसान्तसम्म स्ट्याण्डर्ड चार्टड बैंकको इपीएस सबैभन्दा धेरै रहेको छ । बैंकको प्रतिसेयर आम्दानी ३५ रुपैयाँ ११ पैसा छ । इपीएस उच्च हुनेमा दोस्रो स्थानमा रहेको एभरेष्ट बैंकको २९ रुपैयाँ १९ पैसा छ । तर यस अवधिमा नेपाल इन्भेष्टमेन्ट मेगा बैंकको प्रतिसेयर आम्दानी सबैभन्दा धेरै ११ रुपैयाँ ६१ पैसाले बढेको छ ।

गत आवको असोज मसान्तको तुलनामा चालु आवको असोज मसान्तसम्ममा ६ वाणिज्य बैंकको मात्र प्रतिसेयर आम्दानी बढेको छ । नेपाल इन्भेष्टमेन्ट मेगा बैंकको ६ रुपैयाँ २३ पैसाबाट १७ रुपैयाँ ८४ पैसा पुगेको छ । यस्तै प्राइम बैंकको १८ रुपैयाँ ७४ पैसाबाट बढेर २३ रुपैयाँ ७४ पैसा पुगेको छ । हिमालयन बैंकको १६ रुपैयाँ ४२ पैसाबाट १९ रुपैयाँ ५१ पैसा पुगेको छ । यसैगरी एनएमबी बैंकको इपीएस १ रुपैयाँ २९ पैसा, माछापुच्छ्रेको १ रुपैयाँ ७ पैसा र स्ट्याण्डर्ड चार्टड बैंकले ६९ पैसाले प्रतिसेयर आम्दानी बढेको छ ।

बैंकहरुले गर्ने खुद नाफा रकमलाई सम्बन्धीत बैंकको कुल चुक्ता भएको सेयर संख्याले भाग गरेर वार्षिक प्रतिसेयर आम्दानीको गणना गरिन्छ । बैंकहरुले प्रकाशित गरेको वित्तीय विवरण अनुसार चालु आवको ३ महिना अवधिमा १४ वाणिज्य बैंकहरुको वार्षिक प्रतिसेयर आम्दानी (इपीएस) गत आर्थिक वर्षको यसै अवधिको तुलनामा घटेको छ ।

समीक्षा अवधिमा कृषि विकास बैंकको वार्षिक प्रतिसेयर आम्दानी (इपीएस) सबैभन्दा धेरै ३३ रुपैयाँ ६ पैसाले घटेर २८ रुपैयाँ ८३ पैसा ऋणात्मक भएको छ । यस्तै एनआईसी एशिया बैंकको ३३ रुपैयाँ ४ पैसाले घटेको छ । कुमारी बैंकको २३ रुपैयाँ २० पैसा, लक्ष्मी बैंकको १५ रुपैयाँ ५३ पैसा, सिद्धार्थको १४ रुपैयाँ ४३ पैसा, राष्ट्रिय वाणिज्य बैंकको १३ रुपैयाँ ७८ पैसा र नेपाल बैंकको १२ रुपैयाँ ८९ पैसाले घटेको छ ।

यसैगरी एभरेष्टको बैंकको ७ रुपैयाँ ३९ पैसा, नेपाल एबिआईको ६ रुपैयाँ ६० पैसा, ग्लोबल आइएमईको ६ रुपैयाँ २९ पैसा, नबिलको ५ रुपैयाँ ७० पैसा, प्रभुको ४ रुपैयाँ ६२ पैसा, सानिमाको ३ रुपैयाँ ७८ पैसा र सिटिजन्स बैंकको २ रुपैयाँ ७८ पैसाले घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।