सात लघुवित्तले गरे लाभांश घोषणा, कसको कति ?

नेप्सेमा सूचीकृत ५५ वटा लघुवित्तीय संस्थाहरुमध्ये मङ्सिर ८ गते शुक्रबार बिहानसम्म ७ वटाले लाभांश वितरण गर्ने प्रस्ताव गरेका छन् । अझै ४८ संस्थाले लाभांश घोषणा गर्न बाँकी छ ।

गत आर्थिक २०७९–८० को नाफाबाट लाभांश घोषणा गरेका सबै लघुवित्तको २० प्रतिशतभन्दा कम लाभांश छ । ग्रामीण विकास लघुवित्तले भने गत आर्थिक वर्षको नाफाबाट सेयरधनीलाई कुनैपनि लाभांश वितरण नगर्ने भएको छ । युनिक नेपाल लघुवित्तले सर्वाधिक २०५ प्रतिशत लाभांश वितरणको प्रस्ताव गरेको छ । कम्पनीले चुक्ता पुँजीको १९ प्रतिशत बोनस र कर प्रयोजनका लागि १ प्रतिशत नगद प्रस्ताव गरेको छ ।

यसैगरी नेस्डो समृद्ध लघुवित्तले चुक्ता पुँजीको कर सहित १७.९३ प्रतिशत र एनआईसी एशिया लघुवित्तले १५ प्रतिशत नगद लाभांश वितरणको प्रस्ताव गरेको छ । धौलागिरी लघुवित्तले चुक्ता पुँजीको १४.२५ प्रतिशत बोनस र कर प्रयोजनका लागि ०.७५ प्रतिशत नगद गरी १५ प्रतिशत तथा समीट लघुवित्तले चुक्ता पुँजीको १३ प्रतिशत बोनस र कर प्रयोजनका लागि ०.६८ प्रतिशत नगद गरी कुल १३.६८ प्रतिशत लाभांश वितरण गर्ने भएको छ ।

गत आर्थिक वर्षको नाफाबाट स्वावलम्बन लघुवित्तले चुक्ता पुँजीको १२.३६ प्रतिशत बोनस र कर प्रयोजनका लागि ०.६५ प्रतिशत नगद गरी १३.०१ प्रतिशत र आरएसडिसी लघुवित्तले चुक्ता पुँजीको ८.६० प्रतिशत बोनस र कर प्रयोजनका लागि ०.४५ प्रतिशत नगद गरी ९.०५ प्रतिशत लाभांश वितरण गर्ने प्रस्ताव गरेको छ ।

लाभांश घोषणा गरेका लघुवित्तमध्ये नेस्डो समृद्धले असोज २६ गते साधारण सभा समेत सम्पन्न गरिसकेको छ भने आरएसडिसी लघुवित्तले मंङ्सिर १५ गते तथा ग्रामीण विकास लघुवित्तले मंङ्सिर ३० गते साधारण सभा आह्वान गरेका छन् । साधारण सभा तथा लाभांश वितरण प्रयोजनार्थ आरएसडिसी लघुवित्तले मंङ्सिर ७ गते बुकक्लोज गरिसकेको छ । सेयरधनीको हात खाली पारेको ग्रामीण विकास लघुवित्तले मंङ्सिर १४ गते बिहीबार बुकक्लोज गर्दैछ । बाँकी पाँच लघुवित्तको साधारण सभा तथा बुकक्लोज मिति निर्धारण हुन बाँकी छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।