कार्तिकमा २३ करोड १२ लाख कम निर्जीवन बीमाशुल्क संकलन

सञ्चालनमा रहेका निर्जीवन बीमा कम्पनीहरुले कात्तिक महिनामा २ अर्ब २८ लाख ४८ लाख ६३ हजार हजार रुपैयाँ कुल बीमा शुल्क आर्जन गरेका छन् ।

नेपाल बीमा प्राधिकरणले आज प्रकाशित गरेको निर्जीवन बीमा कम्पनीहरुको कात्तिक महिनासम्मको वित्तीय विवरण अनुसार अघिल्लो आर्थिक वर्षको कार्तिक महीनामा संकलित बीमाशुल्कभन्दा २३ करोड १२ लाख ६८ हजार रुपैयाँ कम अर्थात ९.१९ प्रतिशत कम बीमाशुल्क उठेको हो ।

यसैगरी असोजमा संकलित बीमाशुल्कभन्दा कार्तिकमा ३२.०१ प्रतिशत अर्थात १ अर्ब ७ करोड ५८ लाख २९ हजार रुपैयाँ कम बीमाशुल्क संकलन भएको छ । निर्जीवन बीमा कम्पनीहरुले असोज महीनामा ३ अर्ब ३६ करोड ६ लाख ९२ हजार रुपैयाँ बीमाशुल्क उठाएका थिए । कम्पनीहरुको दशै, तिहार लगायत छठ पर्वहरु कार्तिकमा परेकाले पनि यस महीनामा संकलित बीमाशुलक कम भएको हो । प्राधिकरणको तथ्याङ्क अनुसार कार्तिकमा पाँच कम्पनीको बीमाशुल्क अघिल्लो कार्तिकको तुलनामा बढेको छ भने ९ वटाको घटेको छ ।

कुन कम्पनीले कति संकलन गरे ?

कात्तिक महिनामा सगरमाथा लुम्बिनी इन्स्योरेन्सले २८ करोड ७६ लाख ७९ हजार रुपैयाँ, सिद्धार्थ प्रिमियर इन्स्योरेन्सले २६ करोड ८२ लाख ७८ हजार रुपैयाँ, शिखर इन्स्योरेन्सले २३ करोड २२ लाख ९० हजार रुपैयाँ, कुल बीमा संकलन गरेका छन् ।

यसैगरी आइजिआई प्रुडेन्सियलले कात्तिक महीनामा २३ करोड २१ लाख ८८ हजार रुपैयाँ, नेको इन्स्योरेन्सले २१ करोड ९० लाख ५९ हजार रुपैयाँ, हिमालयन एभरेष्ट इन्स्योरेन्सले १८ करोड ५३ लाख रुपैयाँ, युनाइटेड अजोड इन्स्योरेन्सले १६ करोड ६४ लाख ६४ हजार रुपैयाँ, एनएलजी इन्स्योरेन्सले १६ करोड ७ लाख १० हजार रुपैयाँ, सानिमा जिआईसी इन्स्योरेन्सले ११ करोड ७३ लाख १६ हजार रुपैयाँ, प्रभु इन्स्योरेन्सले १४ करोड १ लाख २५ हजार रुपैयाँ, नेपाल इन्स्योरेन्सले १२ करोड ९ लाख ८४ हजार रुपैयाँ, राष्ट्रिय बीमा कम्पनीले ३ करोड ६ लाख ६१ हजार रुपैयाँ, नेशनल इन्स्योरेन्सले ५ करोड ९७ लाख २७ हजार रुपैयाँ बीमाशुल्क संकलन गरेको छ ।

कार्तिकमा १२ कम्पनीको जारी बीमालेख सङ्ख्या घट्यो

यस वर्षको कार्तिक महीनामा निर्जीवन बीमा कम्पनीले २ लाख ७ हजार ४१० वटा बीमालेख जारी गरेका छन् । यो संख्या अघिल्लो कार्तिकको तुलनामा २२ हजार २६० वटाले थोरै हो । अघिल्लो कार्तिकमा २ लाख २९ हजार ६७० वटा बीमालेख जारी भएको थियो ।

सञ्चालनमा रहेका चौधमध्ये १२ वटाको जारी बीमालेख घटेको छ । राष्ट्रिय बीमा कम्पनी र नेको इन्स्योरेन्सको मात्र कार्तिकमा बीमालेख बढेको छ ।अघिल्लो कार्तिकभन्दा १३ हजार ९०४ वटा धेरै बीमलेख जारी गरेपनि राष्ट्रिय बीमा कम्पनीको प्रिमियम संकलन भने १ करोड ५९ लाख ५२ हजारले घटेको छ । नेकोले भने ४८ लाख ८३ हजारले प्रिमियम संकलन वृद्धि गरेको छ ।

कार्तिकमा नेको इन्स्योेरेन्सले सबैभन्दा धेरै २३ हजार ७३४ वटा बीमालेख जारी गरेको छ भने सिद्धार्थ प्रिमियरले २१ हजार ३७६ वटार सगरमाथा लुम्बिनीले २० हजार ७६३ वटा जारी गरेको छ। सबैभन्दा कम नेशनल इन्स्योरेन्सले २ हजार १४० तथा दि ओरियन्टल इन्स्योरेन्सले २ हजार ८६७ वटा जारी गरेको छ ।