बन्दीपुर केबलकार आगामी अप्रिलबाट सञ्चालनमा आउने, आईपीओको लागि पायो ‘डबल बी’ रेटिङ

पहाडकी रानी उपनामले परिचित बन्दीपुरमा बन्दीपुर केवलकार एन्ड टुरिजम लिमिटेडले निर्माण गरिरहेको केबलकार सहितको पाँच तारे होटल आगामी अप्रिल महिनाबाट सञ्चालनमा आउने भएको छ ।

सन् २०१३ मा स्थापना भएको बन्दीपुर केवलकार एन्ड टुरिजम लिमिटेडले सोही वर्षदेखि नै केवलकार सञ्चालनका लागि अध्ययन गर्ने, जग्गा अधिग्रहण गर्ने कार्य सुरु गरेको थियो । तथापि सन् २०२० मा विश्वव्यापी रुपमा फैलिएको कोभिड–१९ का कारण सन् २०२१ सम्म निर्माण कार्य रोक्किदा कम्पनीको लागत खर्च र सञ्चालनमा आउने समय दुवै बढेको छ ।

प्रारम्भिक चरणमा केवलकार तथा होटलको निर्माण लागत १ अर्ब ६६ करोड ९० लाख रुपैयाँ तोकिएता पनि हाल उक्त लागत रकम बढेर ३ अर्ब १० करोड पुगेको छ । परियोजनाको लागतमा भएको वृद्धिका कारण कम्पनीले १ अर्ब २ करोड बराबरको कर्जाका लागि रेटिङ समीक्षा गराएको छ । रेटिङ एजेन्सी केयर नेपालले १ अर्ब २ करोड बराबरको कर्जाका लागि डबल बी रेटिङ पुनपुष्टि गरेको छ ।

कम्पनीले दुई चरणमा केवलकार र होटलको निर्माण गरिरहेको छ । पहिलो चरणमा केवलकार र दोस्रो चरणमा केवलकारको समिट स्टेशनमा पाँच तारे होटल निर्माण गर्ने कम्पनीको लक्ष्य छ । हाल केवलकार र होटल निर्माण अन्तिम चरणमा पुगेको छ । सन् २०२४ को अप्रिल महिनादेखि केवलकार र जुलाई महिनादेखि होटल सञ्चालनमा आउने कम्पनीले जनाएको छ ।

पोखरा र काठमाडौँ बीचमा रहेको पर्यटकीय स्थल बन्दीपुरमा १८औँ शताब्दी देखि संरक्षण गरिएको कलात्मक घर तथा काष्ठकला, चित्रकलाका कारण आन्तरिक तथा बाह्य पर्यटकका लागि आकर्षणको केन्द्र बन्दै आएको छ । साथै रामकोट गाउँ तथा सिद्ध गुफासम्म पदयात्रा गर्न इच्चुक व्यक्तिहरु पनि बन्दीपुरबाट नै आवतजावत गर्ने गर्छन् । जसकारण कम्पनीको आम्दानी दीर्घकालीन रुपमा बढ्ने देखिन्छ ।

कम्पनीमा ५ संस्थागत सेयरहोल्डर र केही व्यक्तिहरुको लगानी रहेको छ । कम्पनीका अध्यक्ष रियल स्टेट, फाइनान्स लगायतका क्षेत्रमा एक दशक बढीको अनुभव बटुलेका रामचन्द्र शर्मा रहेका छन् ।

सन् २०२१ मा पब्लिक लिमिटेडमा परिणत भएपछि कम्पनीले आइपीओ जारी गर्ने तयारी गरिरहेको छ । सार्वजनिक निष्काशनको तयारीमा रहेको कम्पनीले साख मूल्यांकन गराएको छ । रेटिङ एजेन्सी केयर नेपालले कम्पनीलाई डबल बी रेटिङ गरेको छ ।

कम्पनीले १०० रुपैयाँका दरले २५ लाख ८० हजार कित्ता बराबरको साधारण सेयर निष्काशनको तयारीमा रहेको छ । कम्पनीले चुक्ता पुँजीको २ प्रतिशत अर्थात ४ करोड ३० लाख रुपैयाँ बराबरको सेयर परियोजना प्रभावित क्षेत्रका स्थानीय वासिन्दालाई र १० प्रतिशत अर्थात २१ करोड ५० लाख रुपैयाँ बराबरको सेयर सर्वसाधारणहरुको लागि छुट्टाएको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।