चार विकास बैंकले बनाए सेयरधनीको हात खाली, मख्ख बनाउने सात मात्रै

सञ्चालनमा रहेका सोह्र विकास बैंकमध्ये गत आर्थिक वर्ष २०७९–८० को मुुनाफाबाट चार ओटा विकास बैंकले सेयरधनीलाई लाभांश वितरण गरेनन् । यी कम्पनीले लाभांश वितरण नगरेसँगै ती बैंकका लगानीकर्ताको यस वर्ष हात खाली भएको छ ।  यसरी लाभांश वितरण नगर्नेमा ज्योति विकास बैंक, कामना सेवा विकास बैंक, सप्तकोशी डेभलपमेन्ट बैंक र सिन्धु विकास बैंक रहेका छन् ।

उक्त आर्थिक वर्षबाट सात ओटा विकास बैंकले भने सेयरधनीलाई लाभांश वितरण गरेका छन् । लाभांश वितरण गरेका बैंकमध्ये गत आवबाट शाइन रेसुङ्गा डेभलपमेन्ट बैंकले सर्वाधिक ११.०५ प्रतिशत लाभांश वितरण गरेको छ । शाइनले उक्त आवबाट चुक्ता पुँजीको १०.५० प्रतिशत बोनस सेयर र कर प्रयोजनका लागि ०.५५ प्रतिशत नगद लाभांश वितरण गरेको हो ।

यस्तै सांग्रिला विकास बैंकले सबैभन्दा कम लाभांश वितरण गरेको छ। सांग्रिलाले चुक्ता पुँजीको ५ प्रतिशत बोनस सेयर र कर प्रयोजनका लागि ०.२६ प्रतिशत नगद लाभांश वितरण गरेको हो ।

पाँच विकास बैंकले अझै गरेनन् घोषणा

माघ २२ गते सोमबारसम्म पनि अझै पाँच विकास बैंकले लाभांश घोषणा गरेका छैनन् । एक्सेल डेभलपमेन्ट बैंक, ग्रीन डेभलपमेन्ट बैंक, कर्णाली डेभलपमेन्ट बैंक, कर्पोरेट डेभलपमेन्ट बैंक र नारायणी डेभलपमेन्ट बैंकले हालसम्म पनि लाभांश घोषणा नगरेका हुन् ।

लाभांश घोषणा गरेका सात र लाभांश नदिएका चार गरी एघार मध्ये सिन्धु विकास बैंक बाहेक सबैले साधारण सभा समेत सम्पन्न गरिसकेका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।