रोकिएन अदक्ष कामदार बाहिरिने क्रम, एक महिनामा सीप नै नसिकी ११ हजार कामदार पलाएन

वैदेशिक रोजगारीमा जाने कामदारमा आफूले काम गर्ने क्षेत्रको बारेमा व्यावसायिक सीप तथा तालिम लिने प्रवृत्तिको विकास नहुँदा ११ हजार अदक्ष कामदार बाहिरिएका छन् ।

बैदेशिक रोजगार विभागका अनुसार माघ महिनामा मात्र ११ हजार ९७८ जना अदक्ष कामदार बाहिरिएका हुन् । जसमा १० हजार २८२ जना पुरुष रहेका छन् भने १ हजार ६९६ जना महिला रहेका छन् । माघमा ६२ हजार १४० जनाले श्रम स्वीकृती लिएका मध्ये ११ हजार ९७८ जना कामदार अदक्ष हुन् ।

विषेशगरी मलेसिया, कतार, साउदी अरबलगायतका खाडी मुलुकहरुमा अदक्ष कामदार जाने गरेका छन् । वैदेशिक रोजगारीमा जानेमध्ये घरेलु कामदार, कृषि मजदुर, क्लिनर, सेक्युरिटी गार्ड, होटेल मजदुर लगायत काम गर्ने कामदार काम नै नसिकी बाहिरिने गरेका छन् ।

वैदेशिक रोजगारीमा जान सीप जानेकै हुनुपर्ने नियम २०७६ असारबाट लागू गर्ने भनेपनि लागु हुन सकेको छैन । वैदेशिक रोजगारीको बारेमा प्रर्याप्त ज्ञान नहुँदा अदक्ष कामदार बढी मात्रामा विदेशीने गरेको वैदेशिक रोजगार व्यवसायी संघका पूर्व अध्यक्ष डिक बहादुर खत्री ‘कुमार’ बताउँछन् । स्थानिय तहमा नै विदेश जानु अघि सीप सिकेर मात्र जानुपर्छ भन्ने चेतनाको अभावमा रहेको बताउँदै उनले भने, “पालिकास्तरबाटै चेतना नहुँदा सीप बिना नै कम पारिश्रमिकमा बिदेशीन्छन् ।”

प्रतिवर्ष ५ लाख युवा विदेशीने गरेका छन् । तीमध्ये ३० प्रतिशत अदक्ष कामदार विदेशीने गरेका छन् । ती युवालाई पनि दक्ष बनाएर मात्रै पठाउने परिपाटीका व्यवस्था भए विदेशमा गएर भौतारिनु नपर्ने साथै नेपालमा पनि रेमिट्यास बढ्ने उनको भनाइ छ । सात वटै प्रदेशमा वैदेशिक रोजगार सम्बन्धि तालिम केन्द्रको स्थापना गरी युवालाई सचेत गराउनु पर्ने पूर्व अध्यक्ष खत्री बताउँछन् ।

उता, माघ महिनामा ४५ हजार नेपालीले काम सिकेर गएको पाइएको छ । ४१ हजार ६३९ पुरुष र ४ हजार ९ महिला गरी कूल ४५ हजार ६४८ जना सीप सीकेका कामदार बाहिरिएका छन् । यस्तै, माघमा सेमिस्किल नेपालीको संख्या ४ हजार ३ सय २७ छ भने प्रोफेसनल र हाइस्किल्ड नेपालीको संख्या क्रमशः १ सय ४० र ५४ मात्र रहेको तथ्यांक छ ।

यूएई जाने धेरै
माघ महिनामा कुन ९९ देशमा नेपादी गएकोमा सबैभन्दा धेरै नेपाली युएईको लागि गएका छन् । यूएईकोे लागि १५ हजार २४८ महिला र २ हजार ३५४ जना महिला गरी १७ हजार १०२ जना कामदार गएका छन् । यो नयाँ र पुनः श्रम स्वकृती लिनेको संख्या हो ।

यूएईपछि साउदी अरब जाने नेपालीको संख्या धेरै छ । साउदीमा १२ हजार २ सय ७६ श्रम स्वीकृति जारी भएको विभागले जनाएको छ । यस्तै कतारका लागि १२ हजार १ सय ६४ जना जादा मलेसियाको लागि ६ हजार ७ सय ९५ जना गएका छन् ।

त्यस्तै कुवेतमा ३ हजार २ सय ५३, कोरिया १ हजार ६ सय ६०, रोमानिया १ हजार ३ सय ९७, जापान १ हजार २ सय ८०, इजरायल ७२, बेलायत २ सय ६, अमेरिका ३८ र पोल्यान्डमा १ सय ९७ जना नेपालीले श्रम स्वीकृति लिएका छन् ।

कुन जिल्लाबाट कति ?

वैदेशिक रोजगार विभागका अनुसार माघ महिनामा सबैभन्दा धेरै धनुषाबाट बाहिएका छन् । एक महिनाको अवधिमा धनुषाबाट ३ हजार १ सय ४७ जना बाहिएका हुन् । यस्तै झापा २ हजार ९ सय ९१, मोरङ २ हजार ५ सय ७८, सिरहा २ हजार ५ सय ७२, रुपन्देही १ हजार ९ यस ५१, महोत्तरी २ हजार २ सय ७९, मुस्ताङ १५ र मनाङबाट १६ जना विदेशिएका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।