रेमिट्यान्स २१.६० प्रतिशतले बढ्यो, माघसम्ममा ८ खर्ब ३९ अर्ब भित्रियो

देशका यूवा जनशक्तिजति धमाधम वैदेशिक रोजगारीमा जान थालेपछि मुलुकमा भित्रने विप्रषण (रेमिट्यान्स) पनि उच्च रुपमा बढेको छ। नेपाल राष्ट्र बैंकका अनुसार चालु आर्थिक वर्षको सात महीना अर्थात माघसम्ममा नेपालमा ८ खर्ब ३९ अर्ब रुपैयाँ रेमिट्यान्स भित्रिएको हो ।  पुससम्म ७ खर्ब ३३ अर्ब २२ करोड रुपैयाँ रेमिट्यान्स आएकोमा माघ महीनामा मात्रै एक खर्ब ५ अर्ब ७८ करोड रुपैयाँले बढेको हो ।

गत आर्थिक वर्षको ७ महीनाको तुलनामा चालु आर्थिक वर्षको माघसम्ममा भित्रिउको रेमिट्यान्स २१.६० प्रतिशतले धेरै हो । २०७९–८० को माघसम्म २७.१ प्रतिशतले वृद्धि भई मुलुकमा ६ खर्ब ८९ अर्ब ८८ करोड रुपैयाँ भित्रिएको थियो । अघिल्लो वर्ष २०७८–७९ को सोही अवधिमा भने विप्रेषण आप्रवाह ४.४ प्रतिशतले घटेको राष्ट्र बैंकको तथ्याङ्क छ ।

माघसम्म अमेरिकी डलरमा पनि विप्रेषण आप्रवाह १९.१ प्रतिशतले वृद्धि भई ६ अर्ब ३१ करोड पुगेको छ । अघिल्लो वर्ष यस्तो आप्रवाह १६.४० प्रतिशतले बढेर ५ अर्ब ३० करोड पुगेको छ । अघिल्लो वर्ष २०७८–७९ मा भने यस्तो आप्रवाह ५.३ प्रतिशतले घटेको थियो ।

समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या २ लाख ४७ हजार १२ जना र पुनः श्रम स्वीकृति लिनेको संख्या १ लाख ५८ हजार ५४० जना रहेको छ । २०७९ माघ मसान्तसम्म वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या ५७.३ प्रतिशतले वृद्धि भई ३ लाख १४ हजार ७६७ जना र पुनः श्रम स्वीकृतिलिने नेपालीको संख्या १०.१० प्रतिशतले वृद्धि भई १ लाख ६७ हजार ७०८ थियो ।

समीक्षा अवधिमा खुद ट्रान्सफर २० प्रतिशतले बढेर ९ खर्ब १० अर्ब ७४ करोड पुगेको छ । अघिल्लो वर्षको सोही अवधिमा यस्तो ट्रान्सफर २५.२ प्रतिशतले बढेर ७खर्ब ५९ अर्ब ११ करोड पुगेको थियो । आव २०७८–७९ मा भने अवधिमा यस्तो ट्रान्सफर ३.७ प्रतिशतले घटेको थियो ।

यो अवधिसम्ममा पुँजीगत ट्रान्सफर २९ प्रतिशतले कमी आई ३ अर्ब ८० करोड कायम भएको छ भने खुद प्रत्यक्ष वैदेशिक लगानी ५ अर्ब १८ करोडले धनात्मक रहेको छ । अघिल्लो वर्षको सोही अवधिमा पुँजीगत ट्रान्सफर ५ अर्ब ३५ करोड कायम भएको थियो भने खुद प्रत्यक्ष वैदेशिक लगानी १ अर्ब ४ करोडले धनात्मक रहेको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।