कोशी प्रदेशका बैंक तथा वित्तीय संस्थामा साढे २१ लाख निक्षेप खाता निष्क्रिय, उपभोग्य कर्जा एक खर्ब

कोशी प्रदेशका बैंक तथा वित्तीय संस्थामा लामो समय कारोबार नभएका निक्षेप खाताको संख्या साढे २१ लाख भन्दा धेरै रहेका छन् । ग्राहकले बैंकहरुमा खाता खोले पनि कारोबार नगर्ने तथा बहु संस्थामा खाता खोल्ने अभ्यासले निष्क्रिय खाता उच्च दरमा बढेका हुन ।

ग्राहकले कुनै एक संस्थामा मात्र नभई बहु संस्थामा खाता खोल्ने र कारोबार नगर्ने तथा खाता बन्द नगर्ने प्रवृत्तिले पनि निष्क्रिय खाताको संख्या उच्च देखिएको हो। नेपाल राष्ट्र बैंकका अनुसार निष्क्रिय निक्षेप खाताको संख्या २१ लाख ४८ हजार ६ सय ४७ रहेका छन । कोसी प्रदेशका बैंक तथा वित्तीय संस्थामा ७२ लाख ७१ हजार २ सय ३८ निक्षेप खाता रहेका छन् । उक्त प्रदेशका निक्षेप खाताका देशै भरका बैंक तथा वित्तीय संस्थाका निक्षेप खाताको १३.३७ प्रतिशत हो । देशभरका बैंक तथा वित्तीय संस्थामा ५ करोड ४४ लाख ७ सय २० निक्षेप खाता रहेको केन्द्रीय बैंकले जनाएको छ।

राष्ट्र बैंकका अनुसार बैंक तथा वित्तीय संस्थाले कारोबार नभएका बचत खाताको हकमा ३ वर्ष एवम् कल खाता र चल्ती खाताको हकमा १ बर्ष भन्दा बढी समयावधि व्यतित भएपछि त्यस्तो खाता निष्कृय गर्नु पर्छ । ती खाता सक्रिय गर्दा संस्थाको ग्राहक पहिचान सम्बन्धी नीति बमोजिम अद्यावधिक भएको खाताको हकमा सम्बन्धित ग्राहकको निवेदन बाहेक अन्य कागजात लिन आवश्यक हुँदैन । विद्युतीय माध्यमबाट समेत ग्राहक पहिचान अद्यावधिक गरी/गराई सो को पुष्टि गर्ने व्यवस्था गरी निष्क्रिय खाता सुचारु गर्न सकिने व्यवस्था छ ।

देशैभर बैंक तथा वित्तीय संस्थाको शाखा ११ हजार ५ सय ९४ वटा रहेका छन । सो मध्ये कोशी प्रदेशमा मात्रै एक हजार ८ सय ६२ बटा शाखा रहेका छन् । त्यसैगरी कोसी प्रदेशमा रहेका बैंक वित्तीय संस्थाको एटिएम संख्या ६ सय ६६ रहेको कन्द्रीय बैंकले जनाएको छ। यो संख्या कुल एटिएसको १३.०८ प्रतिशत हो । देशैभर ५ हजार ९१ वटा एटिएम छन् । देशका ७५२ स्थानिय तहमा वाणिज्य बैंक पुगेको अवस्था छ । कोसी प्रदेश मात्रै वाणिज्य बैंकहरुका कुल एक सय ३७ वटा शाखा रहेका छन् ।

चालु आर्थिक वर्षको फागुनसम्ममा वित्तीय प्रणालीको कुल निक्षेप ६१ खर्ब ८७ अर्ब रहेकोमा कोसी प्रदेशको हिस्सा ७.१३ प्रतिशत रहेको छ। कोसी प्रदेशको कुल निक्षेप ४ खर्ब ४१ अर्ब रहेको केन्द्रीय बैंकले जनाएको छ । त्यसैगरी सो अवधिमा बैंक तथा वित्तीय संस्थाको कुल कर्जा लगानी ५० खर्ब ८४ अर्ब रहेकोमा कोसी प्रदेशको हिस्सा ११.२६ प्रतिशत छ । कोसी प्रदेशका बैंक तथा वित्तीय संस्थाले सो अवधिसम्ममा ५ खर्ब ७२ अर्ब कर्जा प्रबाह गरेका छन ।

त्यसैगरी चालु आवको फगुनसम्ममा कोसी प्रदेशमा बैंक तथा वित्तीय संस्थाले जारी गरेको डेविट कार्य १७ लाख ७४ हजार, क्रेडिट कार्ड ३१ हजार ५ सय र प्रिपेड कार्डको संख्या ६ हजार एक सय ४७ रहेको केन्द्रीय बै.कले जनाएको छ । सो अवधिमा सम्ममा कोसी प्रदेशकमा मोवाइल बैंकिङ प्रयोगकर्ताको संख्या ३४ लाख ११ हजार र इन्टरनेट बैंकिङ प्रयोगकर्ता एक लाख ८५ हजार रहेको राष्ट्र बैंकले जनाएको छ ।

चालु अवाको दोस्रो त्रैमाससम्ममा कोसी प्रदेशको कृषि क्षेत्रमा ८८ अर्ब ३५ करोड रुपैयाँ बराबरको कर्जा लगानी भएको छ । सो अवधिमा उर्जामा ५ करोड २४ लाख, साना तथा मझौला उद्योगमा ६० अर्ब ८६ करोड र पर्यटन क्षेत्रमा ७ अर्ब ८० करोड रुपैयाँ कर्जा लगानी भएको केन्द्रीय बैंकले जनाएको छ । सो अवधिमा कोसी प्रदेशका बैंक तथा वित्तीय संस्थाले एक खर्ब ११ अर्ब रुपैयाँ उपभोग्य कर्जा प्बाह गेका छन भने १८ अर्ब ४९ करोड रियलस्टेट क्षेत्रमा कर्जा लगानी गरेका छन ।

केन्द्रीय बैंकका अनुसार चालु आवको फागुनसम्ममा कोसी प्रदेशमा सहुलियतपुर्ण कर्जा लिनेको संख्या २२ हजार एक सय ७ रहेको छ । सहुलियपुर्ण कर्जामा पनि महिला उद्यमशील कर्जा लिनेको संख्या सबैभन्दा धेरै १२ हजार ८ सय ६३ रहेको केन्द्रीय बैंकले जनाएको छ। सो अवधिसम्म विभिन्न ८ शिर्षकमा कुल ३४ अर्ब २ करोड रुपैयाँ बरावरको सहुलियत कर्जा कोसी प्रदेशमा परिचालन भएको छ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।