बैशाखसम्म आठ फाइनान्सको नोक्सानी ६९ करोड धेरै, सर्वाधिक नाफा कमाउनेमा मन्जुश्री

सेयर बजारमा सेयर मूल्य दैनिक बढेर लगानीकर्ताले राम्रो मुनाफा आर्जन गर्दै आएका धेरै फाइनान्स कम्पनीको वित्तीय अवस्था कमजाेर देखिएको छ । 

नेपाल राष्ट्र बैंकका अनुसार चालु आर्थिक वर्षको दश महिनासम्ममा ८ ओटा फाइनान्स कम्पनीले घाटा ब्यहोरेका छन् । बढ्दो खराब कर्जा अनुपात (एनपीएल) ह्वात्तै बढेका कारण अधिकांश फाइनान्स कम्पनीहरु नोक्सानमा पुगेका हुन् ।  सञ्चालनमा रहेका कुल १७ मध्ये १५ ओटा फाइनान्स नेपाल स्टक एक्सचेञ्ज (नेप्से)मा सूचीकृत छन् । १७ फाइनान्समध्ये वैशाखमसान्तसम्म ८ ओटा कम्पनीले घाटा ब्यहोरेका हुन् भने ९ ओटा मात्र नाफामा छन् ।

घाटामा रहेका आठ फाइनान्सको नोक्सानी ६९ करोड २६ लाख २० हजार रुपैयाँ छ भने ८ ओटा कम्पनीले ४१ करोड ५० लाख ६० हजार रुपैयाँ मुनाफा आर्जन गरेका छन् । समग्रमा फाइनान्स कम्पनीहरूकाे नोक्सानी २७ करोड ७५ लाख ६० हजार रुपैयाँ छ ।

पोखरा फाइनान्सको नोक्सानी सर्वाधिक

बैशाख मसान्तसम्ममा पोखरा फाइनान्स कम्पनीले सबैभन्दा धेरै घाटा व्यहोरेको छ । बैशाखसम्म आइपुग्दा कम्पनी १७ करोड ३३ लाख ५० हजार रुपैयाँ नोक्सानीमा छ ।

यस्तै समृद्धि फाइनान्स कम्पनीले पनि बैशाख मसान्तसम्मा १३ करोड ३६ लाख २० हजार रुपैयाँ बढी घाटा ब्यहोरेको छ । यस अवधिमा जानकी फाइनान्स ९ करोड ६९ लाख ६० हजार रुपैयाँ र गुडविल फाइनान्स ७ करोड ४८ लाख ६० हजार रुपैयाँ नोक्सानीमा छ । फाइनान्स कम्पनीहरुको खराब कर्जा नियन्त्रण नहुँदा घाटा ब्यहोर्न पुगेका हुन् ।

त्यसैगरी यस अवधिमा प्रोग्रेशिभ फाइनान्स ६ करोड १४ लाख २० हजार रुपैयाँ घाटामा रहँदा सेन्ट्रल फाइनान्स कम्पनीले ५ करोड २३ लाख ६० हजार रुपैयाँ, रिलायन्स फाइनान्सले ५ करोड २ लाख ९० हजार रुपैयाँ र गुहेश्वरी मर्चेन्ट बैंकिङ्ग एण्ड फाइनान्स पनि ४ करोड ९७ लाख ६० हजार रुपैयाँ नोक्सानीमा छ ।

मञ्जुश्री फाइनान्सले कमायो सर्वाधिक

राष्ट्र बैंकका अनुसार चालु आर्थिक वर्षको बैशाख मसान्तसम्मको तथ्याङ्ग अनुसार नाफा कमाएका कम्पनीमा मञ्जुश्री फाइनान्सले सर्वाधिक मुनाफा आर्जन गरेको छ । मञ्जुश्रीले बैशाख मसान्तसम्ममा २० करोड ४२ लाख ५०हजार रुपैयाँ नाफा आर्जन गरेको छ । त्यस्तै, गोर्खाज फाइनान्सले वैशाखसम्ममा ६ करोड ५३ लाख ७० हजार रुपैयाँ नाफा कमाएको छ । नाफाको आधारमा तेस्रो स्थानमा रहेको आइसिएफसि फाइनान्सले समीक्षा अवधिमा ४ करोड ८९ लाख ८० हजार रुपैयाँ नाफा आर्जन गरेको छ ।

यसैगरी बैशाख मसान्तसम्म श्री इन्भेष्टमेन्ट एण्ड फाइनान्सले ३ करोड ५७ लाख ७० हजार रुपैयाँ नाफा कमाएको छ । नेपाल सेयर मार्केट एण्ड फाइनान्सले २ करोड ८ लाख ७० हजार रुपैयाँ, मल्टीपर्पस फाइनान्सले १ करोड ९३ लाख ५० हजार रुपैयाँ, क्यापिटल मर्चेन्ट बैंकिङ्ग एण्ड फाइनान्सले १ करोड ५३ लाख १० हजार रुपैयाँ नाफा कमाएको छ ।

तथ्याङ्क अनुसार बेष्ट फाइनान्स ३९ लाख २० हजार रुपैयाँ र नेपाल फाइनान्सले १२ लाख ३० हजार रुपैयाँ नाफा कमाएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।