पोखराको राजस्व सङ्कलन सात प्रतिशतले बढ्यो

आन्तरिक राजस्व कार्यालय पोखराको अघिल्लो आर्थिक वर्षको तुलनामा गत आर्थिक वर्ष २०८०\८१ मा राजस्व सङ्कलन सात प्रतिशतले वृद्धि भएको छ ।

विशेषगरी गत वर्ष यहाँको पर्यटकीय क्षेत्र चलायमान हुँदा यसको प्रभाव राजस्व वृद्धिमा देखिएको हो । गत आवमा पाँच अर्ब ५७ करोड ५५ लाख रुपैयाँ राजस्व सङ्कलन गरेको कार्यालयले जनाएको छ ।

कार्यालयले गत वर्ष छ अर्ब ३९ करोड ४७ लाख रुपैयाँ राजस्व उठाउने लक्ष्य राखेकामा लक्ष्यको ८७ दशमलव १९ प्रतिशत प्रगति भएको कार्यालय प्रमुख एवं प्रमुख कर अधिकृत शिव शर्माले जानकारी दिए । उनका अनुसार कार्यालयको अघिल्लो वर्षको तुलनामा सात प्रतिशतले राजस्व वृद्धि भएको छ ।

कार्यालयले आव २०७९\८० मा पाँच अर्ब २२ करोड ६० लाख रुपैयाँ राजस्व उठाएको थियो । अघिल्लो वर्षको तुलनामा गत वर्ष ३४ करोड ९५ लाख रुपैयाँ बढी राजस्व सङ्कलन गरिएको कार्यालयले जनाएको छ ।

आन्तरिक राजस्व कार्यालय पोखराले गत आवमा आयकरतर्फ तीन अर्ब ६६ करोड ८७ लाख रुपैयाँ , मूल्यअभिवृद्धि कर (भ्याट)बाट एक अर्ब ७३ करोड ३६ लाख रुपैयाँ र अन्तःशुल्कतर्फ १६ करोड ६७ लाख रुपैयाँ आम्दानी गरेको थियो ।

कार्यालय प्रमुख शर्माले राजस्व सङ्कलनको लक्ष्य पूरा नभए पनि अघिल्लो वर्षको तुलनामा वृद्धि हुनु सकारात्मक भएको बताए । अर्थतन्त्र चलायमान नभइरहेको अवस्थामा राजस्व वृद्धि हुनु राम्रो भएको उनले बताए ।

“पोखरामा राजस्व वृद्धिमा पर्यटन क्षेत्रको योगदान महत्वपूर्ण रहेको छ । पर्यटन चलायमान बनेकाले सहयोग पुग्यो”, कार्यालय प्रमुख शर्माले भने, “हामीले यस वर्ष पुरानो बक्यौता उठाउन बढी केन्द्रित भएर काम गरेका थियौँ, त्यसले गर्दा राजस्व बढ्यो ।” आन्तरिक राजस्व कार्यालय पोखरामा ६० हजार व्यावसायिक करदाता छन् । त्यसैगरी व्यक्तिगत प्यान लिनेको सङ्ख्या एक लाख ५० हजार र मूल्यअभिवृद्धि करमा दर्ता भएका करदाता १२ हजार हाराहारीमा रहेको कार्यालयले जनाएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।