पहेँलपुर फाँटहरू र ‘फेस्टिभ मुड’सँगै मुरी भित्र्याउने चटारो [तस्बिरहरू]

काठमाडौँ । नेपालीहरूको महान् चाड दसैँ बिदा भइसकेको छ । दसैँका लागि सहर रित्तै बनाएर गाउँ फर्किएका जागिरे र विद्यार्थीहरू फेरि गाउँ रित्तै बनाएर सहर भर्न आइसकेका छन् ।

यो वर्षको दसैँ प्राकृतिक विपत्तिले केही खल्लो बनायो । सयौँ परिवारका मानिस खाली निधार बस्नुपर्‍यो । धेरै परिवार निधारमा टीका र कानमा जमरा सिउरेर हिँड्नुपर्ने बेलामा एकसरो कपडा बेरेर कोरामा बस्नुपर्ने बाध्यतामा पुगे ।

तैपनि बाँकी परिवारले दसैँ मनाए, भत्के/बिग्रेको बाटो हुँदै दोब्बर/तेब्बर समय लगाएर घर गए, र त्यसैगरी फर्किए पनि ।

अब दोस्रो ठुलो चाड तिहार आँगनमै आइसकेको छ । सहरियाहरू तिहारका लागि सपिङ गर्ने र योजना बनाउन व्यस्त भइसकेका छन् । व्यापारीहरू तिहार लक्षित सामानको जोहो गरेर ग्राहकको पर्खाइमा बसिरहेका छन् ।

दिदीबहिनीहरूले दाजुभाइलाई भाइटीकाको निम्ता दिन थालिसके भने दाजुभाइहरू दिदीबहिनीलाई दक्षिणाको जोहो लागेका छन् ।

सबैतिर फेस्टिभ मुडले छपक्कै छोपेका बेला किसानलाई भने असार–साउनमा रोपेको मानोबाट मुरी भित्र्याउने चटारो परेको छ । गत ११ र १२ असोजको बाढी र पहिरोले बाँकी राखेको धान समेट्ने चिन्ता र व्यस्तता किसानलाई छ ।

अधिकांश स्थानमा धान पाकिसकेको छ । केही स्थानमा त दसैँअघि नै धान भित्र्याइसकिएको छ भने अधिकांश स्थानमा भने तिहारअघि नै धान भित्र्याइसक्नुपर्ने हतारो देखिन्छ ।

मौसम अलि चिसो भएको ठाउँमा भने तिहारपछि मात्रै धान पाक्ने भएकाले त्यस क्षेत्रका किसान भने तिहारमा त्यति हतारोमा देखिँदैनन् ।

यतिबेला तिहार नजिकिँदै गर्दा बारीमा ढकमक्क फुलेका फूलसँगै पहेँलपुर भएका धान खेतका फाँटले तिहारलाई साँच्चिकै स्वागत गरिरहेको भान हुन्छ ।

किसानलाई धान भित्र्याउने हतारो त छँदै छ । किनकि वर्षभरि खाने अन्न भित्र्याउने बेला यही हो । अर्कातिर वर्षमै एक पटक आउने पर्व मनाउनुपर्ने उत्साह र बाध्यता पनि छ ।

त्यसकारण पनि बरु केही काँचोकचिलो नै भए पनि तिहारअघि नै धान भित्र्याइसकेर तिहारमा फुर्सदिलो भएर चाड मनाउने दाउमा अधिकांश किसान देखिन्छन् ।

केही तस्बिरमा हेरौँ तिहारको मुखमा पहेँलपुर भएका फाँट र किसानको व्यस्तता ।

तस्बिरहरू सबै : रासस