गोल्यान समूहले सोलार प्लान्टबाट ५०० मेगावाट बिजुली उत्पादन गर्दै

व्यापारिक घराना गोल्यान समूहले आगामी २ वर्ष भित्र सोलार प्लान्टबाट ५०० मेगावाट उर्जा उत्पादन गर्ने भएको छ। समुहले सैर्य उर्जा उत्पादनका लागि भारतीय सोलार कम्पनी प्रोजिल ग्रिन इनर्जीसंग सम्झौता गरेर प्रक्रिया अघि बढाएको हो ।

प्रोजिल इनर्जीले भारतका विभिन्न स्थानमा सोलार प्लान्टबाट २ हजार मेगावाट बिजुली उत्पादन गरिसकेको छ। एक हजार मेगावाट उत्पादनको चरणमा रहेको समहुले जनाएको छ । गोल्यान समुहसंगको सहकार्यले नेपालको स्वच्छ र हरियाली भविष्यका लागि महत्वपूर्ण भूमिका खेल्ने प्रोजिल ग्रिन इनर्जीका प्रबन्ध निर्देशक शोभित राईले बताए।

विद्युत नियमन आयोगका अध्यक्ष रामप्रसाद धितालले नेपालको नवीकरणीय ऊर्जा उत्पादनमा उत्साह थपिएको बताए। त्यस्तै स्वतन्त्र उर्जा उत्पादकहरूको संस्था (इप्पान) का अध्यक्ष गणेश कार्कीले सोलार प्लान्टबाट ५०० मेगावाट बिजुली उत्पादन गर्नु निकै राम्रो योजना रहेको बताए। सरकारले नवीकरणीय ऊर्जा उत्पादनमा प्रोत्साहन गर्न धेरै नीतिगत सुधार गर्नुपर्ने उनले बताए ।

कार्यक्रममा गोल्यान ग्रुपका निर्देशक अक्षय गोल्यानले सूर्यको भविष्य रहेसम्म सौर्य ऊर्जाको भविष्य उज्जवल रहेको भन्दै अब यसतर्फ लाग्नुपर्ने आवश्यकता औँल्याए । प्रोजिल ग्रिन इनर्जी नेपालले नेपालमा सौर्य ऊर्जाको प्रयोगलाई तीव्र पार्न र राष्ट्रको नवीकरणीय ऊर्जा क्षमतामा उल्लेखनीय योगदान पु¥याउने प्रयासमा रुफटप सोलार र जमिनमा माउन्ट गरिएको फोटोभोल्टेइक सौर्य प्लान्टहरू दुवै विकास गर्नेछ ।