वैदेशिक व्यापारको आकार बढ्यो, तेलको माग बढ्दा निर्यातमा ५७ प्रतिशतसम्मको वृद्धि

काठमाडौँ । केही वर्षदेखि खस्किदो क्रममा रहेको वैदेशिक व्यापारको आकार चालु आर्थिक वर्षको ८ महिनामा भने बढेको छ । भन्सार विभागका अनुसार साउनदेखि फागुनसम्म कुल १३ खर्ब ३ अर्ब रुपैयाँ बराबर वैदेशिक व्यापार भएको छ । गत आवको फागुनसम्म ११ खर्ब ३० अर्ब रुपैयाँ बराबरको व्यापार भएको थियो ।

चालु आवको आठ महिनामा ११ खर्ब ४५ अर्ब ५६ करोड ६२ लाख रुपैयाँको वस्तु आयात गरेको छ । जुन गत आवको सोही अवधिको तुलनामा ११.२० प्रतिशतले बढी हो । गत आवमा १० खर्ब ३० अर्ब २२ करोड २६ लाख रुपैयाँको वस्तु आयात भएको थियो ।

चालु आर्थिक वर्षमा निर्यात ५७.२० प्रतिशतले बढेको पाइएको छ । अघिल्लो आवको पहिलो आठ महिनामा १ खर्ब ६ अर्ब रुपैयाँको निर्यात गरेको नेपालले चालु आवको सोही अवधिमा १ खर्ब ५८ अर्ब १७ करोड रुपैयाँ बढी निर्यात गरेको हो ।

विभागको तथ्यांक अनुसार फागुन मसान्तसम्म ४७ अर्ब ९४ करोड ७१ लाख ५ हजार रुपैयाँ बराबरको २२ करोड ८५ लाख ४८ हजार १ सय ९४ किलो सोयाबिन तेल निर्यात भएको छ । भारतीय बजारमा सोयाबिन तेलको माग उच्च रहेका कारण यसको निकासी बढ्दा समग्र निर्यात बढेको हो ।

आठ महिनामा सबैभन्दा धेरै आयात हुने वस्तुहरुमा डिजेल, कच्चा सोयाविन तेल, पेट्रोल, एलपीजी ग्यास रहेका छन् । समीक्षा अवधिमा नेपालले सबैभन्दा धेरै ७८ अर्ब ८६ करोड ३७ लाख रुपैयाँका डिजेल आयात गरेको छ ।

दोस्रो स्थानमा सबैभन्दा धेरै आयात हुने वस्तुको सुचीमा कच्चा सोयाबिन तेल रहेको छ । ८ महिनाको अवधिमा ५१ अर्ब ३५ करोड ८ लाख रुपैयाँको कच्चा भटमास तेल आयात गरिएको छ । जसलाई नेपालमा प्रशोधन गरेर भारत निर्यात गरिएका कारण नेपालको समग्र निर्यात व्यापारमा वृद्धि देखिएको हो ।

त्यस्तै ४२ अर्ब ८० करोड १७ लाख रुपैयाँको पेट्रोल आयात हुँदा ४१ अर्ब ९ लाख रुपैयाँको एलपी ग्यास आयात भएको छ ।

विभागका अनुसार चालु आर्थिक वर्षको आठ महिनासम्म नेपालको व्यापार घाटा नौ खर्ब ८७ अर्ब ३९ करोड ३८ लाख रुपैयाँ पुगेको छ । २०८० फागुनसम्म नेपालको व्यापार घाटा नौ खर्ब २९ अर्ब ६० करोड ५२ लाख रुपैयाँ रहेको थियो । व्यापार घाटाको वृद्धि ६.२२ प्रतिशतमा रहेको छ ।

यद्यपि, निर्यातको हिस्सा बढेका कारण आयात निर्यात अनुपात अघिल्लो वर्ष १०.२४ रहेकोमा घटेर ७.२४ मा झरेको छ।