अमेरिका–रूस वार्ता : युद्धविरामको सम्भावना कति ?

युक्रेनमा जारी युद्ध रोक्ने पहलस्वरूप साउदी अरबमा अमेरिका र रूसबीच वार्ता सुरु भएको छ । पछिल्ला घटनाक्रमले यो वार्ता आंशिक युद्धविरामतर्फ अग्रसर हुने सम्भावना देखाए पनि रणनीतिक हिसाबले दुवै पक्ष आ–आफ्ना स्वार्थलाई प्राथमिकता दिने संकेत गरेका छन् ।

रियादमा भइरहेको छलफलमा अमेरिकी राष्ट्रपति डोनाल्ड ट्रम्पले शान्ति स्थापना गर्न वार्ताले मार्ग प्रशस्त गर्ने विश्वास व्यक्त गरे पनि रूसले तत्कालीन सहमति हुने सम्भावना कम रहेको संकेत गरेको छ । युक्रेनका प्रवक्ता दिमित्री पेस्कोभले युद्धविरामका लागि थप कठिनाइहरू रहेको बताएका छन् ।

वार्ताको प्रमुख विषयहरूमा युक्रेनी कृषि उत्पादनको सुरक्षित निकासीका लागि ‘ब्ल्याक सी’ हुँदै मालवाहक जहाजको ओसारपसारको विषय रहेको छ । रुस यसअघि सो सम्झौताबाट पछि हटेको थियो, पश्चिमी मुलुकले प्रतिबन्ध फुकुवा नगरेको भन्दै अहिले वार्तामा ‘ब्ल्याक सी’ सम्झौतामार्फत नयाँ सहमतिको सम्भावनाबारे छलफल भइरहेको छ ।

युद्धविरामको सम्भावना कम

अमेरिका र युक्रेनले ३० दिने युद्धविरामको प्रस्ताव गरे पनि रुसी राष्ट्रपति भ्लादिमिर पुटिनले सो प्रस्ताव अस्वीकार गरेका छन् । पछिल्ला दिनमा दुवै पक्षले ड्रोन आक्रमण बढाउँदा वार्ता सफल हुने सम्भावना झन् कमजोर रहेको छ ।

शनिबार राति रुसले गरेको हमलामा एक बालिका सहित तीन जनाको मृत्यु भएको छ भने युक्रेनले पनि प्रतिक्रिया स्वरूप हमला गरेको छ ।

यस वार्ताले तत्काल युद्धविराम ल्याउने भन्दा पनि दुवै पक्षको रणनीतिक अवस्थालाई प्रस्ट्याउने सम्भावना बढी छ । रूसले साउदी वार्तालाई अमेरिका र युक्रेनसँगको सम्बन्ध सुधार्ने अवसरका रूपमा हेरेको देखिन्छ भने अमेरिकाले शान्ति वार्तामा आफ्नो पहल देखाउने प्रयास गरिरहेको छ ।