राजनितिक घटनाक्रमको असर सेयर बजारमा, डिबेञ्चर तथा सामुहिक लगानी कोषतिर मोडिए लगानीकर्ता

पछिल्ला दिनमा बढेको राजनितिक घटनाक्रमको सिधा असर सेयर बजारमा परेको छ । राजावादीहरुको सक्रियता बढेसँगै मुलुकको राजनितिमा आएको तरंगका कारण बजार दिनदिनै घटिरहेको छ ।

पछिल्ला दिनहरुमा राजनितिक अस्थिरताका कारण सेयर बजार सधैँजसो घटिरहेको छ । सोमबार राती नेप्सेको नयाँ प्रमुख कार्यकारी अधिकृत नियुक्त भएपछिको पहिलो दिन मंगलबार सेयर बजारमा भारी अंकको गिरावट आएको हो । यस अर्थमा नेप्सेका नवनियुक्त प्रमुख कार्यकारी अधिकृत नारद लुईटेललाई लगानीकर्ताले खासै नरुचाएको पनि मंगलबारको बजारले देखाउँछ ।

मंगलबार सेयर बजार परिसुचक नेप्से ५८.०५ अंकले घटेको छ । बजार खुलेदेखि नै क्रमिक रुपमा ओरालो लाग्न थालेको थियो । मंगलबार कुल ३२५ कम्पनीको सेयर कारोबार भएकोमा २ कम्पनीको सेयर मूल्य मात्र बढेको छ । गार्जियन माइक्रोलाइफ र उपकार लघुवित्तको मात्र सेयर मूल्य बढेको बजारमा ऋणपत्र र सामुहिक लगानी कोषका इकाईको मूल्य बढेको छ ।

लगानीकर्ताहरुले मंगलबार कम्पनीका सेयरलाई छोडेर विभिन्न बैंक वित्तीय संस्थाका ऋणपत्र तथा सामुहिक लगानी कोषमा लगानी विकेन्द्रित गरेका छन् । जसका कारण सेयर मूल्य बढ्ने कम्पनीहरुको सूचीमा ऋणपत्र तथा सामुहिक लगानी कोषका इकाईहरु मात्र परेका छन् ।

९.५ प्रतिशत एनसीसी डिबेञ्चरको मूल्य साढे ४ प्रतिशतले बढेको बजारमा ११ प्रतिशत केबिएल डिेबेञ्चर, प्रभु स्मार्ट फण्ड, १० प्रतिशत नेपाल एसबिआई बैंक डिबेञ्चर लगातको इकाईमूल्य धेरै बढेको छ ।

नारायणी डेभलपमेण्ट बैंकको सेयर मूल्य ८ प्रतिशतले घटेको बजारमा सपोर्ट माइक्रोफाइनान्स, इष्टर्न हाइड्रोपावर, सुन्धु विकास बैंक, विन नेपाल लघुवित्त लगायत कम्पनीको सेयर मूल्य धेरै घटेको छ ।

हिमालयन रिइन्स्योरेन्सको सबैभन्दा धेरै रकमको सेयर कारोबार भएको बजारमा घलेम्दी हाइड्रोको सबैभन्दा धेरै कित्ता सेयर किनबेच भएको हो ।

बजारमा आएको निरन्तरको गिरावट आउँदा पनि कारोबार रकम भने स्थिरप्राय रहेको छ । मंगलबार ३२५ कम्पनीका १ करोड ११ लाख ५५ हजार ९५५ कित्ता सेयरहरु ६२ हजार २१ पटक किनबेच हुँदा ५ अर्ब १८ करोड ७ लाख १८ हजार रुपैयाँमा किनबेच भएका छन् ।

समुहगत आधारमा सबै सूचकहरुमा भारी गिरावट आएको बजारको पुँजीकरण तिब्र दरमा घटेको छ । मंगलबार समग्र बजार पुँजीकरण ४२ खर्ब ८८ अर्ब ६७ करोड ५८ लाख १७ हजार रुपैयाँमा झरेको छ ।

गत फागुन १८ गते आइतबार ४७ खर्ब ९९ अर्ब १९ करोड ४४ लाख रुपैयाँ रहेको बजार पुँजीकरण मंगलबारसम्ममा आउँदा ५ खर्ब १० अर्ब ५२ करोडले घटेको हो । यो रकम लगानीकर्ताले गुमाएको सम्पत्तीको आँकडा हो ।

नेपाल राष्ट्र बैंकका गभर्नर नियुक्तिको विषय पनि कुनै न कुनै रुपमा सेयर बजारको गतिसँग जोडिएको छ । नयाँ गभर्नरले ल्याउने योजना तथा राष्ट्र बैंकको अबको नीति के होला भन्ने चासो लिएका लगानीकर्ता पर्ख र हेरको अवस्थामा छन् ।
मुलभुत रुपमा राजनितिमा देखिन सक्ने हलचलको नतिजा पर्खेका लगानीकर्ता बजारमा पनि पर्ख र हेरको अवस्था छन् ।