५ सय दरका २३ करोड नयाँ नोट छाप्दै राष्ट्र बैंक, अन्तर्राष्ट्रिय बोलपत्र आह्वान

काठमाडौँ। नेपाल राष्ट्र बैंकले पाँच सय दरका नोट छाप्ने भएको छ । राष्ट्र बैंकले आइतबार एक सूचना जारी गर्दै पाँच सय दरका २३ करोड थान नयाँ नोट प्रचलनमा ल्याउनका लागि अन्तर्राष्ट्रिय बोलपत्र आह्वान गरेको हो ।

राष्ट्र बैङ्कको मुद्रा व्यवस्थापन विभागले नोट छाप्न योग्य भेन्डरहरूका लागि अन्तर्राष्ट्रिय टेन्डर आह्वान गरेको हो । नोट छाप्न पूर्वसर्त पूरा गरे अनुरूप छ वटा विदेशी कम्पनीलाई छनोट गरिसकेको राष्ट्र बैंकले जनाएको छ ।

छनोटमा परेका विदेशी कम्पनीमा चीनको चाइना बैंकनोट प्रिन्टिङ एन्ड मिन्टिङ कर्पोरेसन, युकेको डेला रुई इन्टरनेसनल लिमिटेड, जर्मनीको गिएसेकी डेभिरेन्ट करेन्सी टेक्नोलोजी, रसियाको ज्वाइन्ट स्टक कम्पनी ‘गोज्नाक’, फ्रान्सको ओबेरथुर फिडुसिआयर एसएएस र पोल्यान्डको पोलिस सेक्युरिटी प्रिन्टिङ वर्कस छन् ।

पूर्वसर्त पूरा गरेका छ वटा कम्पनीले बैंक नोट छाप्न राष्ट्र बैंकमा बोलपत्र पेस गर्न सक्ने आइतबार जारी सूचनामा उल्लेख छन् । उक्त कम्पनीहरु मध्ये कम लागतमा बैंक नोट छाप्ने प्रस्ताव पेस गर्ने कम्पनीलाई राष्ट्र बैङ्कले नोट छाप्ने ठेक्का दिने बैंकको सूचनामा जनाइएको छ ।

राष्ट्र बैङ्कले नयाँ नोट छाप्न इच्छुक आपूर्तिकर्ताबाट गोप्य सिलबन्दी बोलपत्र पेस गर्न आह्वान गरेको छ । इच्छुक आपूर्तिकर्ताले आगामी मे ३ तारिखसम्म कार्यालय समयभित्र बोलपत्र पेस गर्न सक्ने छन् ।