ज्योति बैंकले दियो दुर्गम स्थानमा बेबी वार्मर

काठमाडौँ । ज्योति विकास बैंकले देशका ग्रामीण क्षेत्रहरूमा बेबी वार्मर प्रदान गरेको छ । जीवनरक्षक चिकित्सा उपकरणहरूको महत्वलाई ध्यानमा राखी सुदूरपश्चिम प्रदेशका विभिन्न जिल्लाका अस्पताल तथा बर्थिंग सेन्टरहरूमा नवजात शिशुको शारीरिक तापक्रमलाई उचित राख्न र हाइपोथर्मिया (अल्पताप) को जोखिमबाट जोगाउन आवश्यक बेबी वार्मर (न्यानो नानी) मेसिनहरू प्रदान गरेको छ । दुर्गम क्षेत्रमा सुरक्षित प्रसुति सेवाको आवश्यकतालाई मध्यनजर गर्दै सो मेसिन प्रदान गरेको हो ।

बैंकले संस्थागत सामाजिक उत्तरदायित्व प्रयोजनार्थ स्थापना गरेको ‘हाम्रो विकास प्रवद्र्वन कोष’ मार्फत बैतडी जिल्लाको दोगडाकेदार गाउँपालिका स्थित श्रीकोट हेल्थ पोस्ट, दार्चुला जिल्लाको लेकम नगरपालिका शर्मौली स्थित शर्मौली हेल्थ पोस्ट, अपिहिमाल गाउँपालिका सौगन्ना स्थित सौगन्ना आधारभूत स्वास्थ्य केन्द्र, बाजुरा जिल्लाको बुढीगंगा नगरपालिका ब्रह्मटोल स्थित ब्रह्मटोल हेल्थ पोस्ट लगायत हालसम्म देशभर ५९ वटा बेबी वार्मर मेसिनहरू प्रदान गरिसकेको बैंकले जानकारी दिएको छ ।

विभिन्न कार्यक्रमहरु मार्फत बैंकका मार्केटिंङ्ग, ब्रान्डिङ्ग तथा डिपोजिटसेल्स विभाग प्रमुख कुशल जंग अधिकारीद्वारा सम्बन्धित क्षेत्रका पदाधिकारीहरुको उपस्थितिका बीच सो मेसिन औपचारिक रुपमा हस्तान्तरण गरिएको हो । साथै, अस्पतालका डाक्टर, नर्स लगायत सम्बन्धित कर्मचारीहरुलाई विज्ञ मार्फत मेसिन सञ्चालन सम्बन्धी विशेष तालिम पनि प्रदान गरिएको थियो ।

हरेक वर्ष करिब २०६५ भन्दा बढी नेपाली शिशुहरुलाई यो सुविधा उपलब्ध गराई अमूल्य जीवन रक्षा गर्न सफल भएको छ । हालसम्मको करिब १० हजार ३२५ भन्दा बढी शिशुहरु प्रत्यक्ष रुपमा उक्त सेवाबाट लाभान्वित भएका छन् ।