आइतबार २ हजार ७१ संक्रमित थपिए, उपत्यकामा १ हजार ४१६ जनामा पुष्टि

आइतबार देशभर कूल २ हजार ७१ जनामा कोरोना भाइरस संक्रमण पुष्टि भएको छ । पछिल्लो २४ घण्टामा १२ हजार ४२७ जनाको पीसीआर परीक्षण गर्दा सो संख्यामा संक्रमण पुष्टि भएको हो ।

स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार १ हजार ४१६ जनामा संक्रमण पुष्टि भएको छ । काठमाडौंमा १ हजार १४५, ललितपुरमा १६१ जना र भक्तपुरमा ११० जनामा संक्रमण पुष्टि भएको हो ।

आइतबार थपिएका कोरोना संक्रमित समेत जोड्दा हालसम्म नेपालमा कुल १ लाख ७ हजार ७५५ जनामा कोरोना संक्रमण पुष्टि भएको छ । जसमध्ये ३१ हजार ३१५ जना सक्रिय संक्रमित रहेका छन् । यो सँगै नेपालमा कुल पीसीआर परीक्षण संख्या ११ लाख ७६ हजार ९८४ पुगेको छ ।

पछिल्लो २४ घण्टामा कोभिड १९ संक्रमण पराजित गरी १ हजार ५५२ जना अस्पतालबाट डिस्चार्ज भएका छन् । हालसम्म कुल ७५ हजार ८०४ जनाले संक्रमण जितिसकेका छन् ।

कोभिड १९ संक्रमणका कारण थप १७ पुरुष र ५ महिला सहित २२ को मृत्यु भएको छ । यससँगै नेपालमा कोरोना भाइरस संक्रमणका कारण हालसम्म ६३६ जनाले मृत्युवरण गरेको स्वास्थ्य तथा जनसंख्या मन्त्रालयले जनाएको छ ।

देशभरका क्वारेन्टिनमा ४ हजार ६१३ जना छन् भने होम आइसोलेसनमा १७ हजार ६६६ जना र संस्थागत आइसोलेसनमा १३ हजार ६४९ जना रहेका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।