गङ्गा सोनाम बनिन् नेपाल आइडल सिजन–६ को विजेता

काठमाडौँ । गङ्गा सोनाम नेपाल आइडल सिजन–६ को विजेता भएकी छन्।

ललितपुरमा भएको ‘ग्राण्ड फिनाले’मा उत्कृष्ट ४ प्रतिस्पर्धीलाई पछि पार्दै सोनाम विजेता भएकी हुन्। विजेता सोनामले २५ लाख रुपैयाँ नगद पुरस्कार प्राप्त गरेकी छन् ।

त्यसैगरी बविता थापामगर दोस्रो, दर्शना गान्धारी तेस्रो, अभिनय खाती चौथो र मिनल मानन्धर पाँचाँ भएका छन् ।

विजेतालाई पुरस्कार वितरण गर्दै सञ्चार तथा सूचना प्रविधिमन्त्री पृथ्वीसुब्बा गुरुङले विजेतालाई शुभेच्छा प्रकट गरे। “नेपाल आइडल नेपालको हिरो कार्यक्रम हो । यो प्रतियोगिता सुरु भए पछि नै अरु नयाँनयाँ प्रतियोगिताहरु सुरु भएका छन् । नेपाल आइडल सधैँ हिरो कार्यक्रमका रुपमा रहनेछ”, उनले भने।

ललितपुर महानगरप्रमुख चिरीबाबु महर्जनले अति महत्त्वपूर्ण कार्यक्रममा विजेता हुनुहुने सबैलाई बधाई दिँदै ठूलो कार्यक्रम सफल भएकोमा खुसी व्यक्त गरे । एपी वान टेलिभिजनका अध्यक्ष राजेन्द्र शाक्यले ६ वटा सिजनसम्म पुग्दा नयाँनयाँ प्रतिभाहरुको जन्म भएको उल्लेख गरे ।

समारोहमा पूर्वमन्त्री शेरबहादुर तामाङ,  एपी वान टेलिभिजनका अध्यक्ष राजेन्द्र शाक्य , प्रमुख कार्यकारी अधिकृत सुरेश पौडेल, बिजनेस हेड केशरी बल्लव दाहाल लगायतको उपस्थिति थियोे ।

२०८२ जेठ २ गतेदेखि सुरु भएको नेपाल आइडल सिजन–६ को  निर्णायकमा न्ह्यू बज्राचार्य, इन्दिरा जोशी र कालीप्रसाद बाँसकोटा रहेका थिए ।