पाँच सातामा एक खर्ब १७ अर्ब कर्जा विस्तार हुँदा निक्षेप ५३ अर्ब थपियो

कोरोना कारण प्रभावित भएको आर्थिक क्षेत्रले गति लिएसँगै बैंकहरुमा कर्जाको माग बढेपछि बैंकहरु कर्जा विस्तारमा आक्रमक देखिएका छन् । पछिल्लो पाँच महिनाको अवधिमा बैंकहरुमा थपिएको निक्षेपको तुलनामा कर्जा प्रवाह दोब्बर बढी हो।

पछिल्लो ५ सातामा अर्थात फागुन लागेयता नै बैंकहरुले १ खर्ब १७ अर्ब कर्जा प्रवाह गरेका छन् । यस अवधिमा बैंकहरुमा ५३ अर्ब मात्र निक्षेप थपिएको छ । पछिल्ला दिनहरुमा आयातमा आएको वृद्धि र शेयर तथा घरजग्गाको कारोबारमा आएको उत्साहले बैंकहरुमा कर्जाको माग बढेको हो । व्यापार व्यावसायहरुमा आएको गतिका कारण बैंकहरुमा कर्जाको माग बढेको हो ।

बैंक वित्तीय संस्थामा कर्जाको माग उच्च भएपछि बैंकहरुले लगानी गर्नका लागि स्रोत व्यवस्थापन गर्नका लागि निक्षेपको ब्याजदर बढाउनु पर्ने बाध्यता हुन्छ । पछिल्ला दिनहरुमा बैंकहरुले आन्तरिक रुपमा ब्याजदर बढाउन समेत थालिसकेको अवस्था छ । पछिल्लो समयमा सस्तो ब्याजदरका कारण पनि कर्जाको माग उच्च देखिन्छ । ब्याजदर सस्तो भएका कारण दिर्घकालिन योजनाका सञ्चालकहरु पनि यहि समयमा कर्जा माग बढेको छ ।

आर्थिक गतिविधिमा सुधार आएसँगै आयातको वृद्धिले आन्तरिक आर्थिक क्रियाकलाप बढेको छ । कोरोनाका कारण आयात घट्ने र निर्यात बढ्ने अवस्थामा थियो । अति आवश्यक बस्तु भन्दा अन्य बस्तु आयत गर्ने अवस्था थिएन । त्यसले गर्दा पनि बैंकहरुमा कर्जाको माग व्यक्तिगत प्रकृतिमा सीमित थियो । तर, पछिल्ला दिनहरुमा आर्थिक गतिविधि पुर्ववत रुपमा सूचारु हुनु तथा विकास निर्माणका काम समेत सुरु भएकाले कर्जाको माग उच्च रहेको बैंकहरु बताउछन् ।

कोरोनाका कारण बैंकिङ प्रणालीमा निक्षेप थपिने, कर्जा रोकिने हुँदा अधिक तरलताको समस्या देखियो। अधिक तरलताका कारण बैंकहरुले निक्षेपमा दिन ब्याजदर घटाएपछि बैंकहरुबाट निक्षेपमा राखिएको पैसा समेत बाहिरिन थालेको थियो । 

चैतको पहिलो सातामा मात्रै बैंकहरुले २३ अर्ब कर्जा प्रवाह गरेका छन् भने यसअवधिमा १४ अर्ब निक्षेप संकलन गरेका छन् । फागुन महिनाभरीमा बैंकहरुमा ३९ अर्ब निक्षेप थपिदा सो अवधिमा ९४ अर्ब रुपैयाँ कर्जा विस्तार गरेका छन् ।

चैत ६ गतेसम्ममा वाणिज्य बैंकहरुले ३८ खर्ब ४० अर्ब रुपैयाँ निक्षेप संकलन गरेको छन् । यो अवधिमा बैंकहरुले ३४ खर्ब ३५ अर्ब रुपैयाँ कर्जा प्रवाह गरेका छन्।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।