मर्जर र प्राप्तिले बलियो बन्दै मिर्मिरे लघुवित्त, नाफामा उच्च सुधार

मिर्मिरे लघुवित्त वित्तीय संस्थाले चालू आर्थिक वर्षको तेस्रो त्रैमासमा गत आवको भन्दा झण्डै पाँच गुणा बढी खुद नाफा कमाएको वित्तीय विवरण सार्वजनिक गरेको छ ।

कम्पनीले चैत मसान्तसम्ममा १४ करोड ७५ लाख २ हजार खुद नाफा गरेको छ । जबकी गत आवको यसै अवधिमा उसको नाफा २ करोड ९९ लाख ३६ हजार मात्र थियो । स्वेडा, नागबेली लघुवित्त लगायतलाई गाभेपछि मिर्मिरेको प्रगति उच्च देखिएको हो। जसले श्रृजनशिल लघुवित्तलाई पनि एक्वायर गर्दैछ ।

कम्पनीले खराब कर्जा संकलन तथा खुद ब्याज आम्दानी बढाएर नाफा बढाएको हो। साथै अन्य सञ्चालन आम्दानी आएको सुधार र जोखिम व्यस्थापन खर्च नभएकाले लघुवित्तको खुद नाफामा उल्लेख्य वृद्धि देखिएको हो।

यसवर्ष कम्पनीले १ अर्ब ८७ करोड ६७ लाख निक्षेप संकलन गरेर ६ अर्ब ५० करोड ४७ लाख कर्जा प्रवाह गरेको छ । जसले अन्य संस्थाहरुबाट ४ अर्ब २२ करोड ९ लाख कर्जा सापटी लिएको छ । कम्पनीको निक्षेप संकलन गत वर्षभन्दा यस वर्ष ९६ प्रतिशत र कर्जा प्रवाह १५९ प्रतिशत बढी हो ।

हाल कम्पनीको चुक्तापूँजी ३९ करोड ८९ लाख २६ हजार रहेको छ भने जगेडा कोषमा २५ करोड ६२ लाख ८२ हजार छ । कम्पनीको प्रतिशेयर आम्दानी ४९.३४ रुपैयाँ र प्रतिशेयर नेटवर्थ १६४.२९ रुपैयाँ छ । लघुवित्तको निष्क्रिय कर्जा भने १.९५ प्रतिशतबाट बढेर २.२६ प्रतिशत पुगेको छ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।