लाभांशको सिजनमा पनि शेयर कारोबारमा आउन सकेन सुधार, यसकारण बिक्रीमा चाप

शेयर बजारमा सूचीकृत कम्पनीहरुले गत आर्थिक बर्षको लाभांश घोषणा गर्दै धमाधम साधारण सभा बोलाउने क्रम चलिरहदा शेयर बजारको चमक भने हराउँदै गएको छ । लाभांशकै सिजनमा शेयर बजारको चमक हराएपछि कारोबारमा शिथिलता देखिन थालको छ।

हालसम्म नेप्सेमा सूचीकृत पाँच दर्जन बढी कम्पनीले गत आर्थिक बर्षको लाभांश घोषणा गरिसकका छन् । जसमध्ये धेरैजसो कम्पनीले साधारण सभा समेत आह्वान गरिसकेका छन् । तर, शेयर लगानीकर्ताहरुमा विगतका बर्षहरुका जस्तो शेयर किन्ने जागर भने देखिएको छैन्।

केहि साता यता बजारमा देखिएको तीब्र उतारचढाबले लगानीकर्तामा झन अन्योलता पैदा गरेको छ । नयाँ लगानीकर्ता बजार प्रवेश गर्ने आँट गर्न सकेका छैनन् भने पुराना लगानीकर्ताहरु लगानी बढाउने मुडमा पुगेका छैनन् । वित्तीय बजारमा लगानी योग्य रकमको अभाव हुने प्रक्षेपणहरु बाहिर आईरहदा शेयर लगानीकर्ताहरुको मनोबल कमजोर हुन पुगेको छ ।

दशैं नजिकिदै गर्दा कतिपय लगानीकर्ता दशैं खर्चको जोहो गर्न पनि शेयर बिक्रीमा लागेका छन् । यसले पनि बजारमा बिक्रीको चाप परेको लगानीकर्ताहरु नै बताउँछन् । जसले गर्दा कारोबार समेत बढ्न सकेको छैन । बजार घट्दै जाँदा मार्जिन कलको त्रास बढेको छ नै फेरि पहिलो त्रैमासको किस्ताले पनि लगानीकर्तालाई सताएको छ ।

बजारमा छोटो समयमा नाफा कमाउने लगानीकर्ता सक्रिय रहँदा बजारले केहि गति त पाएको छ । तर यस्ता गतिविधिले तीब्र उतारचढाब हुने गरेको छ । कम्पनीहरुका आधारभूत पक्ष सबल भएपनि भाषणवाजी र बजारका खबरहरुबाट अधिकांस लगानीकर्ताले लगानीको निर्णय लिने हु्ँदा पनि यस्ता गतिविधि नहुँदा बजार अस्थिर जस्तो देखिएको छ ।

कम्पनीहरुले तुलनात्मक रुपमा अपेक्षित लाभांश घोषणा गरेपनि लगानीकर्ता आर्कषित हुन नसक्नु बजारका लागि घाताक सावित भइरहेको छ । बजारका अधैर्य लगानीकर्ताको आत्मबल बलियो बनाउन सरकारले प्रत्यक्ष लाभ पाउने राहात प्याकेज दिनुपर्ने अवस्था समेत देखिन्छ ।

नेप्से सूचक मंगलबार ६.४२ अंकले घटेर ११३४.५६ विन्दुमा झरेको छ । १७१ कम्पनीको ८ लाख ७३ हजार ७९ कित्ता किनबेच भएको बजारमा २१ करोड ८२ लाख रुपैयाँ बराबरको कारोबार भयो ।

कारोबारमा आएका मध्ये ३ समूहका सूचक बढेका छन् अरु सबै घटेका छन् । होटेल समूह सबैभन्दा बढी १३.४८ अंकले बढेको छ । वाणिज्य बैंक समूह भने ४.१७ अंकले तल झरेको छ ।

मंगलबारको बजारमा सबैभन्दा बढी सानिमा बैंकको तीन करोड १६ लाख रुपैयाँ बराबरको शेयर कारोबार भएको छ। खानी खोला हाइड्रोपावरको शेयर मूल्य सबैभन्दा धेरै ८.१६ प्रतिशतले बढेको छ भने रैराङ हाइड्रोपावरको शेयर मूल्य सबैभन्दा धेरै ७.२७ प्रतिशतले घटेको छ ।