एक अर्ब २० करोडको ‘सानिमा ग्रोथ फन्ड’ को इकाई बिक्री बुधबारदेखि खुल्दै

सानिमा क्यापिटल लिमिटेडले कात्तिक १६ गते बुधबारदेखि एक अर्ब २० करोड मूल्य बराबरको ‘सानिमा ग्रोथ फन्ड’ को १२ करोड इकाईको बिक्री खुला गर्दैछ ।

सानिमा म्युचुअल फण्ड अन्तर्गत सञ्चालनमा आउने उक्त योजनाको प्रतिइकाई १० रुपैयाँको दरले कुल १२ करोड इकाई बिक्रीमा आउन लागेको हो । जसमध्ये सानिमा ग्रोथ फन्डको १२ करोडमध्ये १५ प्रतिशत अर्थात १ करोड ८० हजार इकाई बिज पुँजी वापत छुट्टाइएको छ ।

कुल १ करोड ५६ लाख इकाई वा कुल बिक्री भएको इकाईको १३ प्रतिशत विज पुँजीवापत कोष प्रवद्र्धक सानिमा बैंकलाई र २ प्रतिशत अर्थात् २४ लाख इकाई योजना व्यवस्थापक सानिमा क्यापिटललाई सुरक्षित गरिएको हो ।

कात्तिक १६ गतेदेखि निष्कासन हुुने फण्डको १० करोड २० लाख इकाई खरिदका लागि आम सर्वसाधारण लगानीकर्ताले आवेदन दिन पाउने योजना व्यवस्थापक सानिमा क्यापिटलले जनाएको छ ।

कात्तिक २० गतेसम्म इकाई बिक्री खुला रहनेछ भने उक्त समयमा सबै इकाई बिक्री नभएमा कात्तिक ३० गतेसम्म आवेदन समय लम्बिनेछ । उक्त इकाई खरीदका लागि लगानीकर्ताले न्युनतम १०० कित्तादेखि अधिकतम १ करोड २० लाख कित्तासम्म माग गर्न सकिनेछ ।

इकाई खरिदका लागि मेरो सेयरको मोबाइल एप, मेरो सेयर सफ्टवेयर तथा नेपाल धितोपत्र बोर्डबाट सी–आस्वा सदस्यता प्राप्त सम्पूर्ण बैंक तथा वित्तीय संस्थाहरुबाट आवेदन दिन सकिनेछ ।

इच्छुक खरीदकर्ताहरूले योजना व्यवस्थापक तथा विक्री प्रबन्धक सानिमा क्यापिटलसँगै आस्बा सेवामा सहभागी सम्पूर्ण बैंक तथा वित्तीय संस्था र तिनका शाखा कार्यालयसँगै मेरो सेयर वेबसाइट र एपमार्फत समेत आवेदन दिन सक्नेछन् ।

११ वर्षे अवधिको बन्दमुखी प्रकृतिको यो योजनाको इकाई बाँडफाँड पश्चात धितोपत्र दोस्रो बजारमा सूचीकृत गरी कारोबार गर्न सकिने व्यवस्था मिलाएको योजना व्यवस्थापकले जानकारी दिएको छ । योजनाले कमाएका खुद मुनाफाको अनुपातमा इकाईको अंकित मूल्यको आधारमा मुनाफा वितरण गर्नेछ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।