एनसीसी बैंकको चुक्ता पुँजी साढे ११ अर्ब नाघ्यो, कुमारी बैंकसँग गाभिँदै

नेपाल क्रेडिट एण्ड कमर्स बैंक लिमिटेड (एनसीसी) को चुक्ता पुँजी ११ अर्ब ५१ करोड ४६ लाख ७८ हजार १४ रुपैयाँ पुगेको छ ।

बैंकको मंसिर २ गते शुक्रबार सम्पन्न भएको २५ औं वार्षिक साधारण सभाबाट पारित भएको ३.३६६३ प्रतिशत बोनस सेयर पश्चात बैंकको पुँजी साढे ११ अर्ब नाघेको हो ।

नेपाल प्रज्ञा–प्रतिष्ठान, कमलादी काठमाण्डौंमा सम्पन्न भएको सभाले ३.३६६३ प्रतिशत बोनस सेयर र ७.६३३७ प्रतिशत नगद लाभांश (लाभांशमा लाग्ने कर समेत) गरी जम्मा ११ प्रतिशत लाभांश वितरणको प्रस्ताव पारित गरेको हो । यस्तै सभाले कुमारी बैंकसँग एक आपसमा गाभ्ने/गाभिने तथा मर्जर तथा प्राप्तीसँग सम्बन्धीत भए गरेका काम कारवार्ही अनुमोदन र आवश्यक काम गर्न सञ्चालक समितिलाई अख्तियारी समेत दिएको छ ।

आर्थिक वर्ष २०७८/७९ मा बैंकको निक्षेप परिचालन २७.७१ प्रतिशतले वृद्धि भई १ खर्ब ४१ अर्ब ५० करोड रुपैयाँ पुगेकोे छ । त्यसैगरी बैंकले १ खर्ब २४ अर्ब ८७ करोड खुद कर्जा प्रवाह गरी २७.०१ प्रतिशतको वृद्घि हासिल गरेको छ ।

हाल बैंकले ७ वटै प्रदेशमा गरी जम्मा १५६ शाखा र १४४ एटिएम र १५ एक्टेन्सन काउण्टर मार्फत आफ्ना ग्राहकहरुलाई स्तरीय सेवा प्रदान गरिरहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।