हिमालयन रिको खुद नाफा साढे २५ करोड, अधिकांश सूचकमा सुधार

निजी क्षेत्रको लगानीमा स्थापित हिमालयन रि इन्स्योरेन्स कम्पनीले चालु आर्थिक वर्षको तेस्रो त्रैमाससम्ममा २५ करोड ४४ लाख ४४ हजार रुपैयाँ खुद नाफा आर्जन गरेको छ । गत आवको सोही अवधिमा १९ करोड ६४ लाख ५७ हजार रुपैयाँ खुद नाफा आर्जन गरेको कम्पनीको खुद नाफा समीक्षा अवधिमा २९.५१ प्रतिशतले वृद्धि भएको हो । यसै अवधिसम्म कम्पनीले अधिकांश वित्तीय सूचाङ्कमा प्रगति गरेको छ ।

नेपालका स्थापित मारवाडी घरानाहरुकाे लगानी धेरै रहेको कम्पनीमा नेपाल उद्योग वाणिज्य महासंघका निवर्तमान अध्यक्ष तथा चर्चित व्यवसायी शेखर गोल्छा अध्यक्ष र प्रमुख कार्यकारी अधिकृत पदमा भारतीय नागरिक चन्द्रशेखरन रामामुर्थी छन् । कम्पनीले भारतबाट प्रमुख कार्यकारी अधिकृत सहित तीन जना कर्मचारी भित्र्याएको थियाे ।

हिमालयन रिमा शंकर ग्रुप, केएल दुगड ग्रप, एमभी दुगड ग्रुप, गोल्छा ग्रुप, पशुपति मुरारका, भवानी राणा, सतिश मोर शेखर गोल्छा र सरकारको नजिक रहेर विकास आयोजनाहरुमा चलखेल गर्दै आएका दीपक भट्ट लगायतको लगानी रहेको छ । त्यस्तै राष्ट्रिय वाणिज्य बैंक र नेपाल बैंकले समेत कम्पनीमा कुल १ अर्ब लगानी गरेका छन् ।

तेस्रो त्रैमाससम्म कम्पनीले ३ अर्ब ३८ करोड ४६ लाख २४ हजार रुपैयाँ खुद बीमा शुल्क संकलन गरेको छ । गत आवको यसै अवधिसम्म कम्पनीले ४७ करोड ४९ लाख ६४ हजार रुपैयाँ खुद बीमा शुल्क संकलन गरेको थियो । समीक्षा अवधिमा खुद बीमा शुल्क ६ गुणा बढीले बढेको हो ।  गत वर्षको यसै अवधि (२०७८ चैत) सम्म १ करोड ४६ लाख ९ हजार रुपैयाँ दाबी भुक्तानी गरेकोमा २०७९ चैतसम्ममा हिमालयन रिले २४ करोड ७२ लाख ६१ हजार रुपैयाँ खुद दाबी भुक्तानी गरेको छ ।

चैतसम्ममा कम्पनीले लगानी, कर्जा तथा अन्यबाट आय शीर्षकबाट १५ करोड ७५ लाख ९४ हजार र अन्य अप्रत्यक्ष आयबाट १२ करोड २४ लाख ९७ हजार रुपैयाँ आम्दानी गरेको छ । यस्तै कम्पनीले पुनर्बीमा कमिशन खर्च वापत ८२ करोड ५० लाख ९६ हजार रुपैयाँ र व्यवस्थापन खर्च वापत १२ करोड ६५ लाख ४ हजार रुपैयाँ खर्च गरेको छ ।

अघिल्लो आवको सोहीी अवधिमा कम्पनीले लगानी, कर्जा तथा अन्यबाट आय शीर्षकबाट २ करोड १ लाख ७६ हजार र अन्य अप्रत्यक्ष आयबाट १ करोड १३ लाख ८५ हजार रुपैयाँ आम्दानी गरेको थियो । यस्तै पुनर्बीमा कमिशन खर्च वापत ९ करोड ८५ लाख ८५ हजार रुपैयाँ र व्यवस्थापन खर्च वापत ८ करोड २२ लाख ९६ हजार रुपैयाँ खर्च गरेको थियो । गत आवको तुलनामा कम्पनीको पुनर्बीमा कमिशन खर्च बढ्नुले कम्पनीको व्यवसाय पनि उत्तिकै रुपमा वृद्धि भएको बुझ्न सकिन्छ ।

कम्पनीले यस अवधिमा ७ अर्ब २१ करोड ९४ लाख रुपैयाँ दीर्घकालीन कर्जा तथा लगानी र १ अर्ब ८४ करोड ४९ लाख रुपैयाँ अल्पकालीन लगानी तथा कर्जा गरेको छ । गत आवको सोही अवधिमा ३ अर्ब ९० करोड रुपैयाँ दीर्घकालीन कर्जा तथा लगानी र ३ अर्ब ४४ करोड ५० लाख रुपैयाँ अल्पकालीन लगानी तथा कर्जा गरेको थियो ।

विसं २०७८ असारसम्म सरकारी स्वामित्व रहेको एक मात्र नेपाल पुनर्बीमा कम्पनी रहेकोमा त्यसपछि हिमालयन रि इन्स्योरेन्स नेपालको रिइन्स्योरेन्स बजारमा दोस्रो ‘प्लेयर’ को रुपमा ‘इन्ट्री’ भएको थियो । घुस दिएर इजाजत लिएको भन्दै स्थापनाको समयमा नै कम्पनी विवादित भएपनि कम्पनीले व्यवसाय विस्तारमा आकर्षक वृद्धि गर्दै आएको छ ।

करिब दुई महिना ढिलो गरी प्रकाशत गरेको वित्तीय विवरण अनुसार कम्पनीको चुक्ता पुँजी ७ अर्ब रहँदा वार्षिक प्रतिसेयर आम्दानी ४ रुपैयाँ ८५ पैसा कायम भएको छ । गत आवको सोही अवधिमा ३ रुपैयाँ ७४ पैसा इपीएस थियो । यस्तै समीक्षा अवधिमा बीमा कोष २७ गुणा तथा जगेडा कोष ९ गुणा बढीले वृद्धि भएको छ । चैतसम्म आइपुग्दा कम्पनीले बीमा कोषमा १३ करोड ६९ लाख ७८ हजार रुपैयाँ तथा जगेडा कोषमा ३८ करोड ५८ लाख ३१ हजार रुपैयाँ सञ्चित गरेको छ । गत आवको सोही अवधिमा बीमा कोषमा ४८ लाख १९ हजार रुपैयाँ तथा जगेडा कोषमा २० करोड ६ लाख रुपैयाँ रुपैयाँ सञ्चित थियो । प्रकाशित विवरण अनुसार कम्पनीको बीमा कोषको आकारमा २७४२ प्रतिशत र जगेडा कोषको आकारमा ९२.३३ प्रतिशतले वृद्धि भएको हो । साथै महाविपत्ती कोष ४ लाख ६० हजारबाट मा १ करोड ५० लाख ५९ हजार रुपैयाँ सञ्चित गरेको छ ।

चैत मसान्तसम्म कम्पनीको कुल बीमा शुल्क संकलन रकम ३ अर्ब ५८ करोड ९१ लाख ३४ हजार रुपैयाँ पुगेको छ । गत आवको सोही अवधिमा कुल बीमा शुल्क ५२ करोड ५९ लाख ६६ हजार रुपैयाँ थियो । गत आवको यसै अवधिमा ६ करोड ८८ लाख ८९ हजार रहेकोमा चैतसम्म कम्पनीको भुक्तानी हुन बाँकी रकम ६२ करोड ६९ लाख २९ हजार रुपैयाँ रहेको छ । तेस्रो त्रैमाससम्म असामाप्त जोखिम वापतको व्यवस्था २ अर्ब २१ करोड १९ लाख र भुक्तानी हुन दाबी वापतको व्यवस्था ७२ करोड ९ लाख रुपैयाँ छ ।

बीमा प्राधिकरणले नेपाल पुनर्बीमा कम्पनीले पाउँदै आएको २० प्रतिशत व्यवसाय पनि आधा आधा बाँडेपछि त्यसले कम्पनीको व्यवसाय विस्तारमा छलाङको वृद्धि देखिएको हो । नेपाल रि–इन्स्योरेन्सले पाउँदै आएको २० प्रतिशत आरक्षित पुनर्बीमा व्यवसायको आधा हिस्सा निजी लगानीको हिमालयन रि इन्स्योरेन्सलाई दिने निर्णय गरेको थियो । यो निर्णयले बीमालेखमा उल्लेखित बीमाङ्कको कम्तीमा २० प्रतिशत हिस्सामध्ये १० प्रतिशत व्यवसाय नेपाल पुनर्बीमा कम्पनी र १० प्रतिशत व्यवसाय हिमालयन रिले पाएका हुन् । साथै आरक्षित पुनर्बीमा व्यवसायको हिस्सा प्रत्येक वर्ष दुई प्रतिशतका दरले घटाउँदै छैटौं वर्षदेखि आरक्षित व्यवसाय शुन्यमा झार्ने नीति प्राधिकरणले लिएको छ ।

बीमा कम्पनीहरुको नियामक निकाय नेपाल बीमा प्राधिकरणले २०७८ मंसिर ९ गते सबै जीवन र निर्जीवन बीमा कम्पनीहरु नेपालका रिइन्स्योरेन्स कम्पनीमा आबद्ध हुनुपर्ने अनिवार्य नीति लियो। यसले कम्पनीको व्यवसाय विस्तारलाई सहयोगी भएको हो। कम्पनीमा सबै निर्जीवन बीमा कम्पनी र जीवन बीमा कम्पनी आबद्ध भैसकेका छन् । नेपालको पुनर्बीमा क्षेत्रमा केही वर्षसम्म पूर्ण रुपले विदेशी कम्पनीमा निर्भर रहेकोमा प्राधिकरणको निर्णयसँगै हाल पूर्ण रुपमा सबै पुनर्बीमा नेपालमै हुन थालेको छ । सरकारको समेत लगानी रहेको नेपाल पुनर्बीमा कम्पनीमा अनिवार्य २० प्रतिशत सहित नेपाली कम्पनीमा शतप्रतिशत बीमा गर्नुपर्ने निर्णय प्राधिकरणले गरेको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।