वाणिज्य बैंकको दोस्रो त्रैमासिक प्रगतिः ग्लोबल आईएमईलाई उछिन्दै प्राइम कमर्सियल बन्यो दोस्रो

सञ्चालनमा रहेका २० ओटै वाणिज्य बैंकले चालु आर्थिक वर्ष २०८०–८१ को दोस्रो त्रैमासको अपरिष्कृत वित्तीय विवरण सार्वजनिक गरेका छन् । यस अवधिमा वाणिज्य बैंकहरुले २८ अर्ब ७६ करोड ५२ लाख रुपैयाँ खुद नाफाआर्जन गरेका छन् । यो नाफा अघिल्लो आवको सोही अवधिको तुलनामा ९.९५ प्रतिशत कम हो ।

पछिल्लो समय बैङ्कहरूको कर्जा असुली प्रभावित हुँदा खराब कर्जा बढेको छ । बढ्दो खराब कर्जा वापत गर्नुपरेको प्रोभिजनिङका कारण वाणिज्य बैंकहरुको खुद नाफा करिब दोहोरो अंकले घटेको हो । गत आवको दोस्रो त्रैमाससम्म बैंकहरुले ३१ अर्ब ९४ लाख २३ हजार ४२ हजार रुपैयाँ खुद नाफा आर्जन गरेका थिए । समीक्षा अवधिमा ३ अर्ब १७ करोड ७० लाख ९७ हजार रुपैयाँले खुद नाफा घटेको हो ।

आर्थिक गतिविधि चलायमान नहुँदा बैङ्कहरूको कर्जा लगानी पनि विस्तार हुन सकेको छैन । केन्द्रीय बैंकले सहज कर्जा प्रवाह हुने क्षेत्रको कर्जामा कडाई गरेपछि बैंकहरुको व्यवसाय खुम्चिएको छ । यसले खुद ब्याज आम्दानी घट्न गई समग्र नाफामा समेत असर पुगेको हो । सञ्चालनमा रहेका २० मध्ये तीन ओटा बैङ्कहरू हिमालयन बैंक, प्राइम कमर्सियल र एभरेष्ट बैंकले मात्रै खुद नाफा बढाएका छन् । १७ ओटा बैंकको नाफा घटेको छ ।

यस अवधिमा खुद नाफाका आधारमा नबिल बैंकले सर्वाधिक ३ अर्ब २० करोड ३० लाख रुपैयाँ नाफा आर्जन गर्दै पहिलो स्थानमा रहेको छ । अघिल्लो पुसको तुलनामा चालु आवको पुसमा बैंकको खुद नाफा ६.२८ प्रतिशतले घटेको छ ।

चालु आर्थिक वर्षको दोस्रो त्रैमासमा आइपुग्दा चुक्ता पुँजीका आधारमा सबैभन्दा ठूलो ग्लोबल आईएमईलाई उछिन्दै प्राइम कमर्सियल बैंक नाफाका आधारमा दोस्रो बनेको छ । प्राइमले पुस मसान्तसम्म प्राइम बैङ्कले पुस मसान्तसम्ममा २ अर्ब १८ करोड २९ लाख रुपैयाँ नाफा कमाएको छ । यो नाफा गत आवको पुसको तुलनामा ३२.१३ प्रतिशत धेरै हो ।

तेस्रो पोजिसनमा रहेको ग्लोबल आइएमई बैङ्कको नाफा भने २ अर्ब ४ करोड २३ लाख रुपैयाँ मात्रै छ । बैंकको नाफा गत आवको पुसको तुलनामा २६.६० प्रतिशतले खुम्चिएको हो । सरकारी स्वामित्वको राष्ट्रिय वाणिज्य बैङ्कले पुस मसान्तसम्म २ अर्ब १ करोड ५३ लाख रुपैयाँ खुद नाफा कमाएको छ । यस बैंकको नाफा पनि २६.६८ प्रतिशतले घटेको छ ।

तथ्याङ्क अनुसार एनआईसी एशिया बैंकको स्थान पाँचौं नम्बरमा रहेको छ । बैंकको नाफा १ अर्ब ९० करोड ३८ लाख ७ हजार रुपैयाँ खुद नाफा आर्जन गरेको छ । गत पुकिो तुलनामा बैंकको खुद नाफा ४१.८४ प्रतिशतले घटेको हो । समीक्षा अवधिमा नेपाल इन्भेष्टमेन्ट मेगा बैंकको खुद नाफा अघिल्लो पुसको तुलनामा १३.६३ प्रतिशत घटेर १ अर्ब ८० करोड १९ लाख रुपैयाँमा संकुचित बनेको छ। स्टण्डर्ड चार्टर्ड बैंकको नाफामा पनि १.५५ प्रतिशतले संकुच आई १ अर्ब ७२ करोड ६४ लाख रुपैयाँमा सीमित भएको छ ।

गत पुसको तुलनामा एभरेष्ट बैंकले ७.८८ र हिमालयन बैंकले ५७.५३ प्रतिशतले खुद नाफा वृद्धि गरेका छन् । २०८० पुस मसान्तसम्ममा एभरेष्ट बैंकले १ अर्ब ३१ करोड ७१ लाख र हिमालयन बैंकले १ अर्ब ५० करोड ३९ लाख रुपैयाँ रहेको छ । समीक्षा अवधिमा थप पाँच बैंकहरु एनएमबि, कृषि विकास बैंक, सानिमा, सिद्धार्थ, र लक्ष्मी सनराइज गरी चौध बैंक अर्बपति क्लबमा उक्लिएका छन् । गत पुसमा १७ बैंकको नाफा अर्बभन्दा माथि थियो ।

पुस मसान्तसम्ममा एनएमबि बैंकको खुद नाफा १ अर्ब ३७ करोड ५९ लाख, कृषि विकास बैंकको १ अर्ब ३५ करोड ५२ लाख, सानिमा बैंकको १ अर्ब १३ करोड ८६ लाख, सिद्धार्थ बैंकको १ अर्ब १३ करोड ६८ लाख र लक्ष्मी सनराइज बैंकको १ अर्ब ५ करोड ९२ लाख रुपैयाँ खुद नाफा आर्जन गरेका छन् । गत वर्षको दोस्रो त्रैमासमा १२ करोड ८९ लाख रुपैयाँ नोक्सानीमा कृषि विकास बैङ्क नाफा उक्लिएको हाे ।

आइतबार सार्वजनिक अपरिष्कृत वित्तीय विवरण अनुसार ६ ओटा वाणिज्य बैंकको खुद नाफा एक अर्बभन्दा कम छ । यस अवधिमा कुमारी बैंकले ८६ करोड ७२ लाख रुपैयाँ, नेपाल एसबिआई बैंकको ८४ करोड ५ लाख, माछापुच्छ्रे बैंकको ८० करोड ५३ लाख रुपैयाँ खुद नाफा आर्जन गरेको हो । गत पुसको तुलनान २०८० पुस मसान्तसम्मको कुमारी बैंकको नाफा १४.३१, नेपाल एसबिआई बैंकको २८.६० र माछापुच्छ्रे बैंकको २१.४५ प्रतिशतले घटेको हो । पुस मसान्तसम्म प्रभु बैंकको खुद नाफा ३९.९७ प्रतिशतले घटेर ७२ करोड ३ लाख रुपैयाँ कायम हुँदा नेपाल बैंकको खुद नाफा ४९.६० प्रतिशतले घटेर ५९ करोड ५१ हजार कायम रहेको छ ।

नबिल बैंकको खुद नाफा ३ अर्ब, वितरणयोग्य मुनाफा १ अर्ब माथि

कुमारी बैंकको नाफा १४.३१ प्रतिशतले घट्यो, इपीएस कति ?

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।