विस्तारै उकालो लाग्दै नेप्से, दैनिक कारोबार पनि बढ्दै

सेयर बजार परिसूचक नेप्सेको वृद्धिले तेस्रो कारोबार दिन बुधबार पनि निरन्तरता पाएको छ । यसअघि पौने दश अर्बसम्म कारोबार हुँदै २ अर्ब हाराहारीमा खुम्चिएको दैनिक कारोबार रकम पनि बढ्दै ३ अर्ब नजिक पुगेको छ ।

बैंकिङ्ग प्रणालीमा अधिक तरलता रहेर केन्द्रीय बैंकले विकास ऋणपत्र र निक्षेप बोलकबोल मार्फत रकम खिच्नु परेको अवस्था रहेको भएपनि त्यसको सकारात्मक असर सेयर बजारमा पर्न सकेको छैन । यद्यपी विस्तारै बढ्दै गएको सूचक र कारोबार रकमले लगानीकर्ता राष्ट्र बैंकले सार्वजनिक गर्ने चालु आर्थिक वर्षको मौद्रिक नीतिको अर्धवार्षिक समीक्षालाई पर्खेको देखिन्छ । राष्ट्र बैंक बोर्डले पारित गरेको खण्डमा माघ महीनाभित्रै मौद्रिक नीतिको अर्धवार्षिक समीक्षा गर्ने तयारीमा जुटेको छ । 

चालु आर्थिक वर्षको ६ महीनामा मुलुकको अवस्था सेवामुलक क्षेत्र बाहेक सबै क्षेत्रमा सबल बन्दै गएको प्रतिवेदन सार्वजनिक भएपनि त्यसको खास असर बुधबारको बजारमा परेको नदेखिएको हो । राष्ट्र बैंकले मंगलबार सार्वजनिक गरेको विवरण अनुसार वैदेशिक मुद्रा सञ्चिति, आन्तरिक र बाह्य क्षेत्रका अधिकांश सूचकमा उत्साहप्रद सुधार भएका छन् । चालु खाता बचतमा पुगेको छ भने सोधानान्तर बचतको अवस्था पनि निकै मजबुत बनेको छ । तर पनि सेयर लगानीकर्ताले त्यस अनुरुप बजारमा अपेक्षित सुधार देख्न पाएका छैनन् ।

• ६ महिनामा आयो ७ खर्ब ३३ अर्ब रेमिट्यान्स, पुसमा मात्रै १ खर्ब १९ अर्ब
• विदेशी मुद्रा सञ्चिति १८% ले बढ्यो, साढे १४ महिनाको वस्तु आयात धान्ने
• आयात घट्दा चालु खातामा १६१ अर्ब, शोधनान्तर स्थिति २७३ अर्बले बचतमा
• सकारात्मक लयमा आर्थिक र वित्तीय सूचक, मूल्यवृद्धि वाञ्छित सीमाभित्र कायम

यसअघि दैनिक पौने दश अर्बको कारोबारमा नाफा सुरक्षित गरेका लगानीकर्ता मौद्रिक नीतिको समीक्षापछि बजार प्रवेश गर्नेगरी अहिले राष्ट्र बैंकले सेयर बजारमा कसरी सम्बोधन गर्छ भनेर ‘पर्ख र हेर’ को अवस्थामा रहेका देखिन्छन् । ठूला लगानीकर्ताको प्रवेश नहुँदा नयाँ लगानीकर्ताले पनि बजारमा लगानी खन्याउन आँट नगरेको देखिएको हो ।

नेप्से बुधबार ४.९२ अंकले बढेर २,०९० को विन्दुमा कायम भएको छ । यसअघि मंगलबार ९.४४ र सोमबार १४.५७ अंकले बढेको थियो ।त्यसैगरी, यसदिन सेन्सेटिभ इण्डेक्स ०.१२ अंक बढेको छ भने फ्लोट इण्डेक्स ०.४७ अंक र सेन्सेटिभ फ्लोट इण्डेक्स ०.२८ अंक बढेको छ ।

सोमबार २ अर्ब ४३ करोड, मंगलबार २ अर्ब ५९ करोड हुँदै बुधबार दैनिक कारोबार रकम २ अर्ब ८४ करोड २५ लाख ५० हजार २३७ रुपैयाँ कायम भएको छ । आज दिनभरमा ३१३ कम्पनीका ७७ लाख ३२ हजार २३४ कित्ता सेयर ६५ हजार ४६३ ओटा सङ्ख्यामा किनबेच भएका हुन् । आज ९६८ कम्पनीको सेयर मूल्य बढेको छ भने १०१ कम्पनीको घटेको छ । यस्तै १४ कम्पनीको मूल्य स्थीर छ ।

कारोबारमा आएाक १३ उपसमूहगत सूचकमध्ये बुधबार ७ ओटा बढेको छ भने ६ ओटा घटेको छ। होटल तथा पर्यटन सर्वाधिक १.५० प्रतिशत र जीवन बीमाको इन्डेक्स पनि १.२९ प्रतिशत र जलविद्युत ०.९४ प्रतिशतले बढेको छ। कारोबारमा आएको अन्य उपसमूहगत सूचक सर्वाधिक १.५३ प्रतिशत र निर्जीवन बीमा ०.३९ प्रतिशतले घटेको छ । बाँकी समान्य घटबढ भएका छन् ।

कारोबार रकमका आधारमा आज पनि हिमालयन रिइन्स्योरेन्स कम्पनीको सर्वाधिक कारोबार भएको छ । कम्पनीको २४ करोड ८२ लाख ६८ हजार रुपैयाँको ३ लाख ५४ हजार २५८ कित्ता सेयर ७ हजार ९५ ओटा संख्यामा खरिद बिक्री भएको छ । यस्तै रिलायबल नेपाल लाइफ इन्स्योरेन्सको ६ करोड ६२ लाख, ङादी ग्रुप पावरको ६ करोड ५९ लाख, हाथवे इन्भेष्टमेन्टको ६ करोड ११ लाख र सोनापुर मिनरल्स एण्ड आयलको ५ करोड ८६ लाख रुपैयाँ बढीको कारोबार भएको छ ।

आजको बजारबाट गुराँस लघुवित्त वित्तीय संस्था, समाज लघुवित्त, बुद्धभुमी हाइड्रोपावर, इष्र्टन हाइड्रोपावरका लगानीकर्ताले सबैभन्दा धेरै नाफा कमाएका छन्। चार ओटै कम्पनीको सेयर मूल्य १० प्रतिशतका दरले बढेर सकारात्मक सर्किटलागेको हो । यस्तै एशियन हाइड्रोपावरको ९.९९ प्रतिशत, पिपुल्स पावरको ६.३६ प्रतिशत र इङ्वा हाइड्रोपावरको सेयर मूल्य ६.०१ प्रतिशतले बढेको छ ।

बुधबारको बजारबाट ९.५% एनसीसी डिबेञ्चर २०८६ का लगानीकर्ताले सबैभन्दा धेरै ५.२५ प्रतिशतले गुमाएका छन् । यस्तै आज युनाइटेड अजोड इन्स्योरेन्सको सेयर मूल्य ४.८७ प्रतिशत, सिटिजन सुपर ३० म्युचुअल फन्डको इकाईधनीले ४.८४ प्रतिशत, ९% नेपाल एसबिआई ऋणपत्र २०८९ को ३.९२ प्रतिशत र सिद्धार्थ इन्भेष्टमेन्ट ग्रोथ स्कीम–३ का इकाईधनीले ३.८७ प्रतिशतका दरले गुमाएका छन् ।

बुधबारको कारोबारपछि कुल बजार पुँजीकरण ३२ खर्ब ८६ अर्ब ३० करोड ८४ लाख ८९ हजार रुपैयाँमा समेटिएको छ । मंगलबार
३२ खर्ब ७८ अर्ब ५७ करोड २ लाख थियो । बुधबार मात्रै ७ अर्ब ७३ करोड ८२ लाख रुपैयाँले बढेको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।