कोरोना बीमाको ६० हजार ५८७ दाबीबापत ५ अर्ब ८५ करोड भुक्तानी

विश्व महामारी रुपमा फैलिएको कोरोना भाइरस (कोभिड १९) बाट नेपाली नागरिकलाई रक्षावरण गर्न सुरु गरिएको कोरोना बीमा वापत हालसम्म ५ अर्बभन्दा बढी रकम बीमितहरुलाई भुक्तानी भएको छ । जसमध्ये सरकारको दायित्वमा दुई अर्ब ३५ करोड १५ लाख रुपैयाँ परेको छ ।

बीमा समितिले उपलब्ध गराएको चैत्र ३० गते सोमबारसम्मको तथ्यांक अनुसार कोरोना बीमा दाबी वापत ५ अर्ब ८५ करोड १५ लाख रुपैयाँ भुक्तानी भएको हो । कुल ६० हजार ५८७ वटा दाबी वापत सो रकम भुक्तानी भएको हो ।

२०७७ बैशाख ४ गतेदेखि ५० हजार रुपैयाँ र १ लाख रुपैयाँ बीमाङ्कको गरी दुई वटा कोरोना बीमालेखको बिक्री सुरु भएको थियो ।समितिका अनुसार चैत्र ३० गतेसम्म कारोना बीमा वापत कुल ९१ हजार ६७३ वटा दाबी परेका छन् । ती मध्ये दाबीका लागि आवश्यक कागजात नपुगेका १ हजार ९८९ वटा दाबीका फाइल सम्बन्धीत कम्पनीमा नै फिर्ता भएका छन्।

समितिका अनुसार १८ हजार ८५९ वटा दाबीका फाइल इपिडिमियोलोजी तथा रोग नियन्त्रण महाशाखाबाट स्वीकृत हुन बाँकी छन् । महाशाखामा अध्ययनका लागि पठाइएका ३७ हजार ३८६ वटा फाइलमध्ये १८ हजार ५२७ वटा फाइल स्वीकृत भइसकेका छन् ।

समितिका अनुसार आवश्यक अध्ययनका लागि १ हजार ४९५ वटा दाबीका फाइल लागि इपिडिमियोलोजी तथा रोग नियन्त्रण महाशाखामा पठाईने क्रममा रहेका छन् । समितिले उपलब्ध गराएको तथ्यांकअनुसार ५ हजार ४३६ वटा दाबीका फाइल इपिडिमियोलोजी तथा रोग नियन्त्रण महाशाखाबाट स्वीकृत भएका तर कोरोना बीमा पुलबाट स्वीकृत हुन बाँकी रहेका छन् ।

त्यस्तै, ६६६ वटा दाबीका फाइल पन्ध्र दिनभित्र दोहोरो आवेदनका कारण नो क्लेममा राखिएको छ । भने २ हजार २०३ वटा दाबीका फाइल प्रमाणीकरण हुने प्रक्रियामा रहेको समितिले जनाएको छ ।

कोरोना बीमा मापदण्डमा कोरोना बीमालेख खरिद गरेका बीमितलाई कोरोना भाइरसको संक्रमण पुष्टि भएको सात दिनभित्र दाबी भुक्तानी गर्नु पर्ने प्रावधान छ

कोरोना बीमाको दाबी भुक्तानीमा भएको ढिलाईलाई मध्यनजर गर्दै अर्थमन्त्रालयले भुक्तानी प्रक्रियालाई छिटो छरितो बनाउन निर्देशन दिएको थियो । मापदण्डमा भएको व्यवस्था र अर्थमन्त्रालयले दिएको निर्देशन भने लागु भएको देखिदैन् । कोरोना भाइरस संक्रमण पुष्टि भई कोरोना बीमाको दाबी गरेका कयौँ बीमितले महिनौँ वित्दा समेत भुक्तानी वापतको रकम पाएका छैनन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।