आठ महीनाको नाफामा मुक्तिनाथलाई गरिमाको टक्कर, विकास बैंकहरुको कुल नाफा कति ?

चालु आर्थिक वर्ष २०८०–८१ को आठ महिनामा सञ्चालनमा रहेका १७ विकास बैंकहरुले कुल ३ अर्ब ५१ करोड ३९ लाख ८० हजार रुपैयाँ नाफा आर्जन गरेका छन् । माघ मसान्तसम्ममा विकास बैंकहरुको नाफा २ अर्ब ८५ करोड २९ लाख ६० हजार रुपैयाँ रहेकोमा फागुनमा ६६ करोड १० लाख २० हजार रुपैयाँले बढेको हो ।

हाल राष्ट्रियस्तर आठ सहित कुल १७ ओटा विकास बैंक सञ्चालनमा छन् । यस अवधिमा १७ मध्ये १३ वटा विकास बैंकले नाफा आर्जन गर्दा ४ वटाले घाटा व्यहोरेका छन् । फागनुसम्म चार विकास बैंकको नोक्सानी ३८ करोड ९३ लाख ६० हजार पुगेको छ । माघसम्म यस्तो नोक्सानी ३० करोड ९० लाख २९ हजार रहेकोमा पछिल्लो एक महीनामा मात्रै ८ करोड ३ लाख ३१ हजार रुपैयाँले बढेको हो ।

समग्रमा विकास बैंकको नाफा फागुन मसान्तमा ३ अर्ब १२ करोड ४६ लाख २० हजार रुपैयाँमा समेटिएको छ ।

नेपाल राष्ट्र बैंकले बुधबार प्रकाशित गरेको चालु आर्थिक वर्ष २०८०–८१ को फागुन मसान्तसम्मको तथ्याङ्क अनुसार मुक्तिनाथ विकास बैंक र गरिमा विकास बैंकको टक्कर देखिएको छ । राष्ट्र बैङ्कका अनुसार विकास बैंकमध्ये यसअघि पनि नाफामा ‘नम्बर वान’ रहँदै आएको मुक्तिनाथ विकास बैंक शीर्ष स्थानमा पुगेको छ । माघमा मुक्तिनाथलाई गरिमा विकास बैंकले उछिनेको थियो ।

चालु आवको आठ महीनामा मुक्तिनाथको नाफा गरिमाको तुलनामा ७७ लाख ३० हजार रुपैयाँ बढी छ । फागुन मसान्तसम्ममा मुक्तिनाथ विकास बैंकले ६५ अर्ब ९९ करोड ५० हजार नाफा आर्जन गर्दा गरिमा विकास बैंकले ६५ करोड २२ लाख २० हजार रुपैयाँ नाफा कमाएको हो ।
तेस्रो स्थानमा रहेको शाइन रेसुङ्गा डेभलपमेन्ट बैंकले ५२ करोड २७ लाख ६० हजार रुपैयाँ, महालक्ष्मी विकास बैंकले ४० करोड ७४ लाख ६० हजार र कामना सेवा विकास बैंकले ३८ करोड १५ लाख ४० हजार रुपैयाँ रुपैयाँ नाफा कमाएको छ । समीक्षा अवधिमा लुम्बिनी विकास बैंकले २७ करोड ९७ लाख ६० हजार, ज्योति विकास बैंकले २५ करोड ७७ लाख र र सांग्रिला डेभलपमेन्ट बैंकले २१ करोड ४९ लाख ५० हजार रुपैयाँ खुद कमाएको छ ।

क्षेत्रियस्तरका बैंकहरुमा कर्णाली डेभलपमेन्ट बैंकले फागुन मसान्तसम्मको अवधिमा ५ करोड ५४ लाख ४० हजार रुपैयाँ, मितेरी डेभलपमेन्ट बैंकले ४ करोड २ लाख २० हजार, सिन्धु विकास बैंकले २ करोड ६ हजार, ग्रीन डेभलपमेन्ट बैंकले १ करोड ९४ लाख रुपैयाँ र कर्पोरेट डेभलपमेन्ट बैंकले १ करोड २५ लाख २० हजार रुपैयाँ नाफा आर्जन गरेको छ ।

चार विकास बैंक घाटामा

सञ्चालनमा रहेका १७ मध्ये चार ओटा वटा विकास बैंकले नोक्सानी ब्यहोरेका छन् । यस अवधिमा एक्सेल डेभलपमेन्ट बैंक, सप्तकोशी डेभलपमेन्ट बैंक, नारायणी डेभलपमेन्ट बैंक र सालपा विकास बैंक घाटामा पुगेका हुन् ।

राष्ट्र बैङ्कका अनुसार एक्सेल डेभलपमेन्ट बैंक फागुन मसान्तसम्म सबैभन्दा धेरै घाटामा छ । सो बैंकले २४ करोड ३० लाख ७० हजार रुपैयाँ नोक्सानी ब्यहोरेको हो । अघिल्लो महीना माघमा १८ करोड ६७ लाख ५० हजार रुपैयाँ थियो ।

यस्तै समीक्षा अवधिमा सप्तकोशीले १३ करोड ६२ लाख ४० हजार रुपैयाँ घाटामा छ । माघसम्म १२ करोड १६ लाख ७० हजार रुपैयाँ घाटामा थियो । नारायणी डेभलपमेन्टको नोक्सानी माघमा ३ लाख ३० हजार रहेकोमा फागुनसम्म ७४ लाख ७० हजार पुगेको छ ।

यस्तै खोटाङमा कार्यालय रहेको एकजिल्ले विकास बैंक सालपाको नोक्सानी पनि माघमा २ लाख ७९ हजार रुपैयाँ रहेकोमा फागुनमा बढेर २५ लाख ८० हजार रुपैयाँ पुगेको छ । बैंक विसं २०६७ सालमा खोटाङको दिक्तेलमा स्थापना भएको थियो।यस विकास बैंकले अहिलेसम्म पनि सर्वसाधारणलाई सेयर जारी गरेको छैन ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।