काठमाडौँ । केही दिनअघिको अविरल वर्षाका कारण सिन्धुलीको गड्तिर भेगमा सडक, पुल, भवन, खानेपानीलगायत पूर्वाधार र कृषिबालीमा ठुलो नोक्सानी भएको छ ।
यस भेगका विभिन्न क्षेत्रमा आवासीय तथा व्यावसायिक भवन डुबानमा परेका छन् भने विद्यालय भवन र स्वास्थ्य संस्थाहरू पनि ठुलो संख्यामा प्रभावित भएका छन् । खानेपानी र विद्युत् आपूर्तिमा समस्या देखिएको छ । पाक्ने बेलाको धानबालीमा नदी र खोला पसेर क्षति पुर्याएको छ ।
विपद्पछि ३ वटै तहका सरकारको सहयोग र समन्वयमा प्राथमिकता निर्धारण गरी राहत तथा पुनर्स्थापनाका कार्यक्रमहरू सुरु गरिएका छन् । घर आवास नै गुमाएका परिवारलाई अस्थायी आवास र खाद्यान्नलगायत आधारभूत आवश्यकताका सामग्री वितरणमा स्थानीय सरकार जुटेका छन् ।
यसै सन्दर्भमा सिन्धुली जिल्लामा बाढीपहिरो र डुबानले गरेको क्षति, राहत तथा पुनर्स्थापना तथा विपद्पछिको व्यवस्थापनको अवस्थाबारे त्यहाँका जनप्रतिनिधिसँगकाे कुराकानीः
‘विपद् प्रभावितलाई दसैँअघि नै घर पस्ने वातावरण बनाउँछौँ’ : सांसद लेखनाथ दाहाल
बाढी, पहिरो र डुबानका कारण सिन्धुली जिल्लाको सुनकोसी, गोलन्जोर र फिक्कल गाउँपालिकामा मात्रै करिब १ हजार ५०० बिघा क्षेत्रफलमा लगाएको धानबाली नष्ट भएको छ । विपद्का कारण जिल्लाका यी ३ वटा पालिका सबैभन्दा बढी प्रभावित भएका छन् ।
त्यस्तै, सुनकोसी गड्तिर क्षेत्रमा मात्रै करिब ६०० बिघा खेतीयोग्य जमिनमा सुनकोसी नदी र रोशी खोलाले पुरेर बालीनालीमा क्षति पुर्याएको छ । खेत खण्डहरमा परिणत भएका छन् ।
जिल्लामा प्राकृतिक प्रकोपको असर अकल्पनीय र क्षति ठुलो छ । छोटो समयमा आधुनिक र पर्यटकीय सहरतर्फ उन्मुख भइरहेका खुर्कोट, नेपालथोक र मूलकोटमा अर्बौंको लगानीमा खोलिएका होटल र रिसोर्टमा ठुलो क्षति पुगेको छ ।
फाँटहरू नदी कटानमा परेका छन् । निजी घर, विद्यालय, वडा कार्यालयलगायत संरचना र बस्ती डुबानमा परेर क्षति पुगेको छ । बाढीले घर पुरिएकाले घरभित्रका सामानहरू के–कस्तो अवस्थामा छ भन्ने हालसम्म यकिन नभएकाले पीडितहरू चिन्तामा छन् ।
कैयौँ घरका सटर बाढीको बालुवाले छोपेको छ । अहिले प्रभावित क्षेत्रमा १०/१२ वटा ‘ब्याकहो लोडर’ र डोजर लगाएर पुरिएको र बिग्रे/भत्केको ठाउँको मर्मतसम्भार गर्ने कार्य भइरहेको छ । जनतालाई दसैँअघि घरभित्र पस्ने वातावरण बनाउने लक्ष्यका साथ पुनःनिर्माण र उद्धार कार्यलाई तीव्र तुल्याइएको छ ।
नदी कटान भएको ठाउँमा व्यवस्थित योजनासहित वैकल्पिक मार्ग निर्माण गर्ने र कोसी किनारलाई तटबन्ध गर्ने कार्यलाई प्राथमिकतामा राखेर धमाधम काम सुरु भएको छ ।
नेपालथोकदेखि भकुण्डेसम्म मुख्य रूपमा सडकमा ठुलो समस्या छ । करिब ३ किलोमिटर सडक पूर्ण रूपमा क्षति भएको छ । त्यस स्थानमा वैकल्पिक मार्ग बनाएर सवारी आवागमन सहज बनाउने प्रयासमा लागेका छौँ । सुनकोसी माथिको सित्खा, खुर्कोट र रोशीका विभिन्न ठाउँमा पक्की पुलसमेत बाढीले बगाएको अवस्था छ ।
बाटो मर्मतका लागि भाडामा लिइएका लोडर, डोजरहरू स्थानीय सरकारबाट इन्धनको व्यवस्था मिलाइएको छ । खानेपानी र विद्युत्को ठुलो समस्या समाधान हुँदै गएको छ । यो समस्या केही दिनभित्रै हल हुनेछ ।
सबै स्थानीय सडकहरू क्षतिग्रस्त छन् । सडकसँगै विद्युत्का पोलहरू पनि ढलेका छन् । रोशी र कोसीदेखि फिक्कलसम्ममा ५२ वटा विद्यालय भत्केको र डुबानमा परेको प्रारम्भिक विवरण आएको छ । केही स्वास्थ्य चौकीका बाहिरी पर्खालहरू भत्किएका छन् ।
प्रदेश र सङ्घ सरकारबाट राहत र पुनर्स्थापनाको प्रतीक्षामा छौँ । उधारोमा काम गरिएको छ । आवश्यक स्वास्थ्यकर्मी परिचालन, इन्धनलगायत सुविधाका लागि विभिन्न निकायसँग समन्वय भइरहेको छ । सामूहिक भोजन र अत्यावश्यक सामग्रीसहित राहतका प्याकेट पनि वितरण गराइएको छ । तत्कालका लागि दाल चामल, नुनतेल जस्ता आधारभूत खाद्य सामग्री स्थानीय सरकारबाट उपलब्ध गराइएको छ ।
‘सडक खुलाउने कार्य प्राथमिकतामा छ’ : राजु बराल, उपाध्यक्ष–फिक्कल गाउँपालिका
फिक्कलमा नदी कटान र डुबानबाट निकै ठुलो क्षति भएको छ । खेतीयोग्य जमिनमा नदीको भँगालो पसेका छन् । केही घर बगाएको छ । पालिकाको सुम्नाङबेँसी, झहरे, सोखुबेँसी, सर्किनीबेँसी, बान्द्रेबेँसीलगायत स्थान बढी प्रभावित भएका छन् । विद्यालय भवन, झोलुङ्गे पुल, स्वास्थ्यचौकीहरूमा क्षति पुगेको छ ।
उद्धार, राहत र पुनर्स्थापनाका कार्यक्रम सुरु भइसकेका छन् । अब व्यवस्थित रूपमा कसरी जाने भनेर सर्वदलीय बैठक बोलाएर त्यसको निर्णयका आधारमा हामी अघि बढ्छौँ । क्षतिका आधारमा राहत दिनेगरी तयारी भइरहेको छ । डोजरहरू प्रयोग गरेर बाटो खोल्ने काम भइरहेको छ । हामी सडक खुलाउन लागिरहेका छौँ ।
‘खुर्कोटमा ३५ घर पूर्ण रूपमा क्षति भएका छन्’ : ज्वालाप्रसाद न्यौपाने, उपाध्यक्ष–गोलन्जोर गाउँपालिकाका
पालिकाको खुर्कोट क्षेत्रमा मात्र करिब ३५ घरमा क्षति हुँदा ६२ परिवार पूर्ण रूपमा प्रभावित भएका छन् । त्यो क्षेत्रमा ४० वटाको हाराहारी पसलमा क्षति पुगेको छ । के–कति धनजनको क्षति भएको भन्ने विवरण संकलन हुँदै छ ।
त्यस्तै, बलेनी क्षेत्रमा ११ घर डुबाएको छ । मुर्की, च्याकुटारबेँसी, र बलेनीका तीनवटा प्राथमिक विद्यालय डुबानमा परेका छन् । पालिकाको ६ नम्बर वडा कार्यालयमा पनि बाढी पसेर क्षति पुगेको छ ।
मध्यपहाडी लोकमार्गअन्तर्गत हैबार, हर्देनी, कुखुरेटारमा ठुलो पहिरोका साथै त्यहाँका झोलुंगे पुलमा क्षति पुगेको छ । खुर्कोटका दुइटा र दिङदिङको माथिल्लो क्षेत्रको पुल बगेको छ ।
मध्यपहाडी राजमार्ग पूरैजसो पुनर्निर्माण गर्नुपर्ने भएको छ । सबै बिग्रिएको छ, त्यसमा करोडौँ खर्च हुने देखिएको छ । सिन्धुलीमा सुनकोसीपछि गोलन्जोर गाउँपालिकामा बढी क्षति देखिएको छ ।
गोलन्जोर गाउँपालिका क्षेत्रको मध्यपहाडी राजमार्गमा भएको अवरोध हटाउन दुइटा डोजर प्रयोज भइरहेका छन् ।
मंगलबार अक्करे भिर क्षेत्रको अवरोध हटाइएको छ । नेपालथोकबाट घुर्मीसम्म बिपी राजमार्ग र मध्यपहाडी राजमार्गका धेरै ठाउँमा सडक भत्किएको, भासिएको, माथिबाट पहिरो खसेर ठुलो क्षति भएको छ । सडक भएको ठाउँमा नदीको भँगालो र खोलो पसेको छ ।
गोलन्जोरको मात्र करिब ३० बिघा धान खेतमा क्षति पुगेको छ । खुर्कोट, दिङदिङ, हैबार, मुर्की, कुखुरेटारलगायत क्षेत्र बढी प्रभावित भएका छन् ।
About Us
प्रतिक्रिया