यहि सातादेखि पाइप लाइनबाट पेट्रोल ल्याइने, प्रतिलिटर १.५० पैसा बचत हुने

काठमाडौँ । यहि साताबाट पाइप लाइनबाट पेट्रोल आयात हुने भएको छ । पाइप लाइनबाट पेट्रोल ल्याउँदा प्रतिलिटर १.५० पैसा मूल्य ढुवानी रकम बचत हुने नेपाल आयल निगमले जनाएको छ ।

पाइप लाइनबाट पेट्रोल आयात गर्दा मासिक पाँचदेखि छ करोड रुपैयाँ र वार्षिक ६० देखि ७० करोड रुपैयाँ ढुवानी रकम बचत हुने निगमले जनाएको छ । हाल बरौनीबाट दैनिक १४ लाख लिटर पेट्रोल ट्याङ्रबाट आयात भइरहेको छ ।

यसअघि डिजेल मात्र आयात हुने गरेकोमा अब पाइप लाइनबाट पेट्रोल र मटितेल आयात गर्न लागिएको हो । निगमले २०७६ देखि नै पाइप लाइनमार्फत डिजेल आयात गरिरहेको छ ।

निगमले भारतको मोतीहारीदेखि बाराको अमलेखगन्जसम्म पाइप लाइनबाट डिजेलसँगै पेट्रोल र मटितेल ल्याउन लागेको हो । गत जनवरीदेखि नै पाइप लाइनबाट पेट्रोल ल्याउने भनिए पनि परीक्षणकै क्रममा रहेकाले ल्याउन ढिलाइ भएको थियो ।

पाइप लाइनबाट बजार माग अनुसार दैनिक छ हजार किलोलिटर पेट्रोल आयात गरिने कार्यालयले जनाएको छ ।