सगरमाथा सरसफाई अभियानमा नेपाल लाइफ र राउण्ड टेबल नेपालको सहकार्य

काठमाडौं । विश्वको सर्वोच्च शिखर सगरमाथा क्षेत्रको सरसफाइ गर्नका लागि नेपाल लाइफ इन्स्योरेन्स र राउण्ड टेबल नेपालले सहकार्य गरेका छन् । बिहीबार काठमाडौंको मध्यबानेश्वरस्थित ग्लोबल कलेजमा सहकार्य सम्बन्धि सम्झौता गर्दै दुवै संस्थाले अभियान सुरु गरिएको बताएका हुन् ।

नेपाल लाइफ इन्स्योरेन्सका प्रमुख कार्यकारी अधिकृत प्रविण रमण पराजुलीले सुरुवाती चरणमा ५ हजार किलोग्राम फोहोर व्यवस्थापनका लागि नेपाल लाइफले १० लाख रुपैयाँ सामाजिक उत्तरदायित्व अन्तरगत खर्च गर्न लागेको बताए । उनले भने, “सगरमाथा क्षेत्रमा पर्वतारोही तथा घुम्न जानेहरुले छाडेको फोहोरलाई काठमाडौं ल्याउने र मिल्नेजति फोहोरलाई रिसाइकल गर्नका लागि नेपाल लाइफले राउन्ड टेबलसँग सहकार्य गरेको हो ।”

नेपाल लाइफसँगै राउण्ड टेबलले पनि सगरमाथा क्षेत्रको सरसफाइका लागि १० लाख रुपैयाँ सहयोग गर्ने बताइएको छ ।

राउन्ड टेबल नेपालका अध्यक्ष प्रवेश अग्रवालले विश्वको ध्यान आकर्षण हुने नेपालको शान सगरमाथा सफा राख्न यो सफाइ अभियान गर्न लागेको बताए । उनले यो सफाइ आभियानमा प्राविधिक कामका लागि सगरमाथा प्रदुषण नियन्त्रण समितिसँग सहकार्य गरिएको जानकारी दिए ।

सगरमाथा क्षेत्रबाट ५ हजार किलो फोहोर काठमाण्डौंसम्म ल्याउन २५ लाख रुपैयाँ हाराहारी खर्च हुने बताइएको छ । नेपाल लाइफ र राउन्ड टेबलबीच भएको दुई पक्षीय सहमतिपछि सगरमाथा प्रदुषण नियन्त्रण समितिका अध्यक्ष छिरिङ शेर्पाले आफुहरुले ३० वर्षदेखि सफाइ गर्दै आउँदा पनि सबै नियन्त्रण नभएकोले अरु संस्थाको साथ सकारात्मक भएको बताए । सो क्षेत्रमा फोहोर संकलन तथा व्यवस्थापन गर्ने काममा लागत धेरै पर्ने भएकाले धेरै संस्थाहरुको सहयोग जरुरी हुने उनको भनाई थियो ।